បញ្ហាបម្រែបម្រួលអាកាសធាតុ គឺជារឿងដ៏ស្មុគ្រស្មាញបំផុតមួយក្នុងចំណោមវិបត្តិផ្សេងៗដែលកំពុងកើតឡើងរបស់ពិភពលោក ហើយមានប្រទេសកាន់តែច្រើនឡើងកំពុងតែប្រញាប់ប្រញាល់បំផុតក្នុងការអនុវត្តការងារដើម្បីដោះស្រាយបញ្ហាមួយនេះរួមគ្នា។ យុទ្ធសាស្ត្រ និងវិធីសាស្ត្រជាច្រើនចាប់តាំងពីការផ្លាស់ប្តូររបៀបរស់នៅដែលពឹងផ្អែកលើវិស័យថាមពលកកើតឡើងវិញរហូតដល់ការជួយថែរក្សា និងសន្សំសំចៃធនធានចេញពីធម្មជាតិរហូតទៅដល់ការកែច្នៃឡើងវិញត្រូវបានអនុវត្ត។

តើអ្នកដឹងទេ សូម្បីតែព្រៃកោងកាង (Mangroves) ក៏អាចចូលរួមចំណែកក្នុងការទប់ស្កាត់បញ្ហាបម្រែបម្រួលអាកាសធាតុដ៏មានប្រសិទ្ធភាពមួយផងដែរ ពោលគឺមានប្រសិទ្ធភាពខ្លាំងជាងព្រៃត្រូពិច ឬព្រៃឈើធម្មតាថែមទៀតផងជាពិសេសក្នុងមុខងារស្រូបចាប់យកកាបូន។

គម្រោងព្រៃកោងកាងមួយនៅប្រទេសកូឡំប៊ីបានបង្ហាញភស្តុតាងយ៉ាងច្បាស់អំពីអំណះអំណាងនេះ ហើយនឹងអាចកំណត់បានថាព្រៃកោងកាងគឺជាអាវុធដ៏មានប្រសិទ្ធភាពចុងក្រោយបំផុតដែលត្រូវបានណែនាំដើម្បីចូលរួមប្រយុទ្ធប្រឆាំងទៅនឹងបញ្ហាបម្រែបម្រួលអាកាសធាតុ។

អង្គការអភិរក្សអន្តរជាតិ Conservational International បានចាប់ដៃគូជាមួយនឹងអង្គការក្នុងស្រុកជាច្រើនបានបង្កើតទីតាំងអភិរក្សព្រៃកោងកាងមួយកន្លែងនៅក្នុងប្រទេសកូឡំប៊ីដើម្បីប្រតិបត្តិគម្រោងដែលមានឈ្មោះថា Vida Manglar project។

គម្រោងនេះត្រូវបានចាត់ទុកថាជាគម្រោងបែបលក់ឥណទានកាបូន Blue Carbon ដំបូងបំផុតរបស់ពិភពលោកដោយប្រើប្រាស់យុទ្ធសាស្ត្រថ្មីតាមរយៈការលក់កាបូនប្តូរជានឹងសាច់ប្រាក់ ហើយត្រឹមតែមួយឆ្នាំប៉ុណ្ណោះឥណទានរបស់គម្រោងត្រូវបានលក់ទាំងអស់។

ប្រាក់ចំណូលដែលគម្រោង Vida Manglar ប្រមូលបានប្រមាណជា៩២ភាគរយត្រូវបានបង្វែរយកទៅវិនិយោគលើគម្រោងអភិរក្សាប្រព័ន្ធអេកូឡូស៊ីតាមឆ្នេរសមុទ្ររបស់កូឡូប៊ី ហើយបានផ្តល់អត្ថប្រយោជន៍ជាច្រើនទៀតដល់ពលរដ្ឋដែលរស់នៅពឹងផ្អែកលើព្រៃកោងកាងនេះប្រមាណណ ១២,០០០នាក់។ ការអនុវត្តគម្រោង Vida Manglar មិនត្រឹមតែប៉ុណ្ណោះ ថែមទាំងអាចការពារដល់ជីវិតសត្វរស់នៅក្នុងទឹកជាច្រើនប្រភេទ ហើយអាចស្រូបទាញយកឧស្ម័នកាបូនដល់ទៅ១លានតោនទៀតផងដែរ ដែលទាំងនេះសុទ្ធតែជាប្រភពចំណូលដែលមានសក្តានុពល និងនិរន្តភាពបំផុតសម្រាប់គ្រប់គ្នា។

គួរឲ្យដឹងដែរថា ព្រៃកោងកាងអាចស្រូបយកកាបូនបានច្រើនបំផុតជាងប្រភេទព្រៃឈើផ្សេងៗដោយក្នុងនោះត្រឹមផ្ទៃក្រឡាមួយគីឡូម៉ែត្រការ៉េវាអាចទាញយកកាបូនប្រចាំឆ្នាំបានទៅដល់ទំហំដែលស្មើទៅនឹងការបញ្ចេញកាបូនដោយរថយន្ត៣៥ម៉ឺនគ្រឿង។ ប៉ុនន្តែទោះបីជាយ៉ាងណាក្តី ព្រៃកោងកាងវានឹងផ្តល់ផលអាក្រក់បំផុតប្រសិនបើវាត្រូវបានកាប់បំផ្លាញ ពីព្រោះវានឹងបំភាយកាបូនដែលស្តុកទុកអស់រយៈពេលរាប់សិបទសវត្សនោះត្រឡប់ចូលបរិយាកាសយើងវិញ។ចាប់តាំងតែពីឆ្នាំ១៩៩៦ព្រៃកោងកាងនៅទូទាំងពិភពលោកដល់ទៅ១០០០០គីឡូម៉ែត្រការ៉េត្រូវបានបំផ្លិចបំផ្លាញ៕