បរទេស ៖ យោងទៅតាមប្រភពព័ត៌មានពីរ៉យទ័របានរាយការណ៍ថា ភាពតានតឹងរវាងសហរដ្ឋអាមេរិក និងចិននៅលើវិស័យបន្ទះឈីបដែលចាប់ផ្តើមកើតឡើងតាំងពីរដ្ឋបាលអតីតប្រធានាធិបតីអាមេរិក Donald Trump មកម្ល៉េះ ក្នុងគោលបំណងចង់ដាក់សម្ពាធលើឧស្សាហកម្មបច្ចេកវិទ្យារបស់ចិន ដែលជាដៃគូប្រកួតប្រជែងធំបំផុតរបស់ខ្លួន។

ថ្មីៗនេះ រដ្ឋាភិបាលហូឡង់ បានប្រកាសពីច្បាប់ថ្មីដែលរឹតបន្តឹងការនាំចេញបន្ទះឈីបមួយចំនួនទៅកាន់ប្រទេសចិន ដែលស្រដៀងគ្នានឹងសហរដ្ឋអាមេរិកផងដែរ។ សហរដ្ឋអាមេរិក និងហូឡង់ គ្រោងនឹងផ្តល់ការនាំចេញមួយភាគពីរប៉ុណ្ណោះដល់ក្រុមហ៊ុនផលិតបន្ទះសៀគ្វីរបស់ប្រទេសចិន ដើម្បីទប់ស្កាត់ការលក់ឧបករណ៍ផលិតបន្ទះសៀគ្វី រួមទាំងផលិតផលមួយចំនួនពីក្រុមហ៊ុនហូឡង់ ASML (ASML.AS) ដែលជាក្រុមហ៊ុននាំមុខគេលើពិភពលោកក្នុងដំណើរការដ៏សំខាន់នៃបច្ចេកវិទ្យា lithography។ នេះគឺជាព្រឹត្តិការណ៍ដែលសហរដ្ឋអាមេរិកប្រឆាំងនឹងឧស្សាហកម្មបន្ទះឈីបរបស់ចិន៖

កាលពីខែតុលា ឆ្នាំ២០១៨ រដ្ឋបាលរបស់អតីតប្រធានាធិបតីអាមេរិក Donald Trump បានកាត់ផ្តាច់ក្រុមហ៊ុនផលិតបន្ទះឈីបចិន Fujian Jinhua Integrated Circuit ពីអ្នកផ្គត់ផ្គង់អាមេរិក បន្ទាប់ពីក្រសួងយុត្តិធម៌សហរដ្ឋអាមេរិកបានចោទប្រកាន់ក្រុមហ៊ុនចិនដែលគាំទ្រដោយរដ្ឋពីបទលួចអាថ៌កំបាំងពាណិជ្ជកម្ម។ ករណី​នេះ​ចាប់​ផ្តើម​ដំបូង​គឺជា​ជម្លោះ​រវាង​ក្រុមហ៊ុន Micron Technology (MU.O) និង​ក្រុមហ៊ុន​ចិន ហើយចំណាត់ការរបស់លោក DonaldTrump បានបង្កើនភាពតានតឹងនៃជម្លោះពាណិជ្ជកម្មអន្តរជាតិរវាងសហរដ្ឋអាមេរិក និងចិន។

នៅខែមករា ឆ្នាំ២០២០ យុទ្ធនាការដ៏ទូលំទូលាយមួយរបស់រដ្ឋបាល Trump ដើម្បីទប់ស្កាត់ការលក់បច្ចេកវិទ្យាផលិតបន្ទះឈីបរបស់ហូឡង់ទៅប្រទេសចិនដែលមានតាំងពីឆ្នាំ២០១៨  ហើយវាបណ្តាលឱ្យក្រុមហ៊ុនហូឡង់ ASML មិនអាចលក់ម៉ាស៊ីន lithography ទំនើបបំផុតរបស់ខ្លួនទៅឱ្យចិនបានទេ។

នៅខែឧសភា ឆ្នាំ២០២០ រដ្ឋបាលអតីតប្រធានាធិបតី Donald Trump រារាំងការដឹកជញ្ជូនរបស់ក្រុមហ៊ុនផលិតបន្ទះឈីបទូទាំងពិភពលោកទៅកាន់ក្រុមហ៊ុនចិន Huawei Technologies ដោយធ្វើឱ្យប៉ះពាល់ធ្ងន់ធ្ងរដល់ផ្នែកបន្ទះឈីប HiSilicon និងផ្នែកទូរស័ព្ទដៃស្មាតហ្វូន។

នៅខែធ្នូ ឆ្នាំ២០២០ សហរដ្ឋអាមេរិកបានដាក់បញ្ចូលក្រុមហ៊ុនផលិតបន្ទះឈីបកំពូលរបស់ចិន SMIC (0981.HK) និងក្រុមហ៊ុនចិនជាច្រើនផ្សេងទៀតទៅក្នុងបញ្ជីខ្មៅពាណិជ្ជកម្ម ព្រមទាំងបដិសេធអាជ្ញាប័ណ្ណរបស់ចិន ដើម្បីទប់ស្កាត់ SMIC ពីការទទួលបានបច្ចេកវិទ្យាដើម្បីផលិតឈីបនៅបច្ចេកវិទ្យាកម្រិតខ្ពស់ ១០ nanometers ឬទាបជាងនេះ។ .

នៅខែកញ្ញា ឆ្នាំ២០២២ អ្នករចនាបន្ទះឈីបរបស់សហរដ្ឋអាមេរិក Nvidia (NVDA.O) និង Advanced Micron Devices (AMD.O) ត្រូវបានបញ្ឈប់ដោយរដ្ឋាភិបាលអាមេរិក​ ក្នុងការនាំចេញបន្ទះឈីបកុំព្យូទ័រកំពូលមួយចំនួនសម្រាប់ការងារបញ្ញាសិប្បនិម្មិតទៅកាន់ចិន។

នៅខែតុលា ឆ្នាំ២០២២​ រដ្ឋបាលប្រធានាធិបតី​ Joe Biden ប្រកាសនូវការត្រួតពិនិត្យការនាំចេញដ៏ទូលំទូលាយមួយ រួមទាំងវិធានការដើម្បីកាត់ផ្តាច់ចិនចេញពីការផលិតនៅគ្រប់ទីកន្លែងក្នុងពិភពលោកដែលប្រើបច្ចេកវិទ្យា ឬឧបករណ៍របស់អាមេរិក។ ក្រោយមកទៀត នៅក្នុងខែធ្នូ សហរដ្ឋអាមេរិកបន្ថែមក្រុមហ៊ុនផលិតបន្ទះឈីបរបស់ចិន YMTC និងក្រុមហ៊ុនផ្សេងបន្ថែមទៀតទៅក្នុងបញ្ជីខ្មៅពាណិជ្ជកម្មរបស់ខ្លួន។ កាលពីខែមិថុនាកន្លងទៅនេះ ប្រទេសហូឡង់ មានផែនការទប់ស្កាត់ការលក់ឧបករណ៍មួយចំនួនរបស់ក្រុមហ៊ុន ASML ទៅឱ្យក្រុមហ៊ុនបច្ចេកវិទ្យារបស់ប្រទេសចិន។ ទន្ទឹមនឹងនេះដែរគេ​រំពឹង​ថា សហរដ្ឋអាមេរិកអាច​នឹង​ឈាន​ទៅ​មួយ​ជំហាន​ទៀត​ ដោយការហាមឃាត​ឧបករណ៍​ហូឡង់​បន្ថែម​ទៀត​ពី​រោងចក្រ​ផលិត​របស់​ចិន​៕