សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Weforum បង្ហាញថា ក្នុងរយៈពេលត្រឹមតែ ៧ ឆ្នាំប៉ុណ្ណោះ ប្រមាណជា ៣,៨ ភាគរយនៃម៉ោងធ្វើការសរុបនៅទូទាំងពិភពលោក អាចនឹងត្រូវបាត់បង់ដោយសារបម្រែបម្រួលអាកាសធាតុ។ តួរលេខនៃអត្រានេះស្មើនឹងការងារពេញម៉ោងចំនួន ១៨៦ លាននាក់ និងខាតបង់សេដ្ឋកិច្ចចំនួន ២ ៤០០ ពាន់លានដុល្លារ។
ទន្ទឹមនឹងនោះ អ្នកដែលទទួលរងផលប៉ះពាល់ខ្លាំងរួមមាន បុគ្គលិកធ្វើការនៅខាងក្រៅ អ្នកសង្គ្រោះបន្ទាន់ និងមនុស្សដែលធ្វើការក្នុងបរិយាកាសក្តៅ។ ទីភ្នាក់ងារការពារបរិស្ថានសហរដ្ឋអាមេរិក (EPA) និយាយថា វាមិនមែនគ្រាន់តែជាកំដៅខ្លាំងដែលបុគ្គលិកនឹងត្រូវប្រឈមមុខនោះទេ ប៉ុន្តែគុណភាពខ្យល់មិនល្អ សត្វល្អិតដែលនាំជំងឺ ទឹកជំនន់ និងភ្លើងឆេះព្រៃ នឹងកាន់តែធ្ងន់ធ្ងរឡើងដោយវិបត្តិអាកាសធាតុ។ បញ្ហាទាំងនេះនឹងជះឥទ្ធិពលយ៉ាងខ្លាំងដល់ផលិតភាពការងាររបស់បុគ្គលិក។ ក្រុមហ៊ុន Deloitte ប៉ាន់ស្មានថា ការងារជាង ១៣ លាននៅក្នុងសហរដ្ឋអាមេរិកគឺងាយរងគ្រោះទៅនឹងផលប៉ះពាល់នៃអាកាសធាតុ និងការផ្លាស់ប្តូរសេដ្ឋកិច្ច។
យោងតាមការិយាល័យស្ថិតិការងាររបស់សហរដ្ឋអាមេរិកបង្ហាញថា មានករណីការស្លាប់ពាក់ព័ន្ធនឹងបញ្ហាការងារចំនួន ៣៦ ករណីនៅសហរដ្ឋអាមេរិកនៅឆ្នាំ២០២១ ដែលជាលទ្ធផលមកពីការឡើងកម្តៅ។ ស្របពេលនេះដែរ បុគ្គលិកជាង ៦៥ លាននាក់កំពុងស្ថិតក្នុងការងារដែលទាក់ទងនឹងហានិភ័យសុខភាពទាក់ទងនឹងអាកាសធាតុ។ ទីភ្នាក់ងារការពារបរិស្ថានសហរដ្ឋអាមេរិក EPA បានបង្ហាញពីផលវិបាកសុខភាពដែលទាក់ទងនឹងអាកាសធាតុសំខាន់ៗចំនួន ៥ ដូចជា៖
១. ជំងឺដែលពាក់ព័ន្ធនឹងកំដៅរួមមាន Heat Stroke និង Heat Exhaustion ដែលបង្កមកពីរាងកាយទទួលរងនឹងកម្ដៅខ្លាំងជ្រុលពេក រហូតធ្វើឱ្យកម្ដៅក្នុងរាងកាយឡើងខ្ពស់ជាង ៤០ អង្សាសេ។ វាបង្កគ្រោះថ្នាក់ដល់បុគ្គលិកដែលធ្វើការក្រោមកំដៅថ្ងៃ ដែលធ្វើឲ្យពួកគេងាយនឹងអស់កម្លាំង និង នាំឱ្យមានរបួស ឬ ស្លាប់ផងដែរ។
២. ជំងឺផ្លូវដង្ហើម៖ បង្កពីគុណភាពអាក្រក់នៃខ្យល់ និង ការបំពុលខ្យល់។ នៅពេលដែលវិបត្តិអាកាសធាតុកាន់តែកើនឡើង ភ្លើងឆេះព្រៃ និងធូលីកាន់តែច្រើនពីគ្រោះរាំងស្ងួតនឹងបង្កើនបរិមាណបំពុលខ្យល់។ ទន្ទឹមនឹងនេះ ការកើនឡើងសីតុណ្ហភាពនឹងផ្លាស់ប្តូររយៈពេលនៃរដូវនិទាឃរដូវ និងរដូវក្តៅ ដែលនឹងធ្វើឱ្យបញ្ហាកាន់តែធ្ងន់ធ្ងរឡើងដូចជាជំងឺគ្រុនក្តៅ និងជំងឺហឺតសម្រាប់បុគ្គលិកធ្វើការនៅខាងក្រៅផ្ទះ។
៣. ផលប៉ះពាល់ដល់សុខភាពផ្លូវកាយ និងផ្លូវចិត្ត៖ វាប៉ះពាល់ជាពិសេសអ្នកពន្លត់អគ្គីភ័យ និងបុគ្គលិកផ្នែកសុខាភិបាល។ បញ្ហានេះប៉ះពាល់ទាំងសុខភាពរាងកាយ និងផ្លូវចិត្តក្នុងការដោះស្រាយជាមួយនឹងព្រឹត្តិការណ៍អាកាសធាតុធ្ងន់ធ្ងរ។
៤. ការឆ្លងជំងឺ៖ កើតឡើងដោយសារការឡើងនឹងសីតុណ្ហភាពកាន់តែក្តៅ នោះកំណើនសត្វល្អិតក៏កើនឡើងផងដែរ។ កំណើនសត្វល្អិតដូចជា មូស និង សត្វល្អិតបង្ករោគផ្សេងៗនឹងបង្កជាការឆ្លងមេរោគដ៏គ្រោះថ្នាក់ដល់មនុស្ស។
៥.ផលប៉ះពាល់ពីថ្នាំសម្លាប់សត្វល្អិត៖ ការកើនឡើងសត្វល្អិតនឹងធ្វើឲ្យកំណើននៃការប្រើប្រាស់ថ្នាំសម្លាប់កើនឡើងផងដែរ ហើយអ្នកធ្វើការផ្នែកកសិកម្មនឹងត្រូវរងប៉ះពាល់ពីសារធាតុគីមីពុល។
អង្គការពលកម្មអន្តរជាតិ ILO បង្ហាញថា ផលិតភាពការងារថយចុះនៅពេលដែលសីតុណ្ហភាពឡើងលើសពី ២៤-២៦ អង្សាសេ។ នៅសីតុណ្ហភាព ៣៣-៣៤ អង្សាសេ កម្រិតផលិតភាពអាចត្រូវបានកាត់បន្ថយពាក់កណ្តាលនៃការងារប្រើកម្លាំងពលកម្ម។ ប្រសិនបើវាមិនប៉ះពាល់ដល់ផលិតភាពនោះទេ ប៉ុន្តែបុគ្គលិកការងារនៅតែរងផលប៉ះពាល់ដែលទាក់ទងនឹងអាកាសធាតុផ្សេងទៀតដូចជា ការបំពុលបរិយាកាសធ្វើឱ្យបញ្ហាសុខភាពដែលមានស្រាប់កាន់តែធ្ងន់ធ្ងរ សុខភាពផ្លូវចិត្តកាន់តែយ៉ាប់យ៉ឺន និង ការឆ្លងមេរោគពីសត្វល្អិត។ ទន្ទឹមនឹងនោះ តំបន់ដែលរងប៉ះពាល់ខ្លាំងមានដូចជា តំបន់សាហារ៉ា អាស៊ីខាងត្បូង និងអាស៊ីអាគ្នេយ៍ ដែលមានហានិភ័យខ្ពស់បំផុតនៃការថយចុះផលិតភាពការងារដោយសារវិបត្តិអាកាសធាតុ។
លើសពីនេះ អង្គការ ILO និយាយថា គ្រោះធម្មជាតិធ្ងន់ធ្ងរដូចជា ទឹកជំនន់ គ្រោះរាំងស្ងួត ភ្លើងឆេះព្រៃ និងខ្យល់ព្យុះនឹងធ្វើឱ្យខូចខាតទ្រព្យសម្បត្តិអាជីវកម្ម ផ្លូវដឹកជញ្ជូន ហេដ្ឋារចនាសម្ព័ន្ធឧស្សាហកម្ម និង កសិកម្ម ដែលនាំឱ្យបាត់បង់ការងារ។ កាលពីឆ្នាំ ២០២២ កន្លងទៅនេះ ព្រឹត្តិការណ៍អាកាសធាតុ និង គ្រោះធម្មជាតិបានធ្វើឱ្យសេដ្ឋកិច្ចពិភពលោកខាតបង់ ៣១៣ ពាន់លានដុល្លារ៕
Account
Security
Favourite Content