សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី ABC News បានរាយការណ៍ថា សហភាពអឺរ៉ុបបានសម្រេចដាក់ទណ្ឌកម្មថ្មីលើរុស្ស៊ីជុំវិញសង្គ្រាមរបស់ខ្លួនប្រឆាំងនឹងអ៊ុយក្រែន ដោយផ្តោតលើឧស្សាហកម្មពេជ្រ រួមទាំងរឹតបន្តឹងលើបុគ្គល និងអង្គការជាង ១៤០ ដែលបានគេចវេសពីទណ្ឌកម្មមុន។
ទន្ទឹមនឹងនេះ វាគឺជាជុំទី ១២ នៃទណ្ឌកម្ម ដែលសហភាពអឺរ៉ុបបានរឹតបន្តឹងលើរុស្ស៊ី ចាប់តាំងពីប្រធានាធិបតី Vladimir Putin បានបញ្ជាឱ្យកងទ័ពរុស្ស៊ីចូលទៅក្នុងអ៊ុយក្រែនកាលពីខែកុម្ភៈ ឆ្នាំមុន។ លើសពីនេះ វិធានការថ្មីនេះបានកំណត់គោលដៅលើវិស័យថាមពល ធនាគារ ក្រុមហ៊ុន និងទីផ្សារ ហើយមន្ត្រីរុស្ស៊ីជាង ១ ០០០ នឹងត្រូវបានបង្កកទ្រព្យសម្បត្តិ និងហាមឃាត់ការធ្វើដំណើរ។
ទីស្នាក់ការកណ្តាលរបស់សហភាពអឺរ៉ុបបាននិយាយថា វិធានការចុងក្រោយបង្អស់នឹងផ្តល់ផលប៉ះពាល់បន្ថែមទៀតដល់សមត្ថភាពរបស់ប្រធានាធីបតី Putin ក្នុងការធ្វើសង្គ្រាម ដោយអឺរ៉ុបបានកំណត់គោលដៅលើវិស័យដែលមានតម្លៃខ្លាំងដល់សេដ្ឋកិច្ចរុស្ស៊ី និងធ្វើឱ្យរុស្ស៊ីលំបាកបន្ថែមទៀតក្នុងការជៀសផុតពីទណ្ឌកម្មរបស់សហភាពអឺរ៉ុប។ មិនត្រឹមតែប៉ុណ្ណោះ ការនាំចូល ទិញ ឬការផ្ទេរពេជ្រធម្មជាតិ និងគ្រឿងអលង្ការសំយោគរបស់រុស្ស៊ីនឹងត្រូវបានហាមឃាត់ចាប់ពីថ្ងៃទី ១ ខែមករាឆ្នាំក្រោយនេះ។ ការហាមឃាត់នេះអនុវត្តចំពោះពេជ្រដែលមានដើមកំណើតនៅក្នុងប្រទេសរុស្ស៊ី នាំចេញពីរុស្ស៊ី និងឆ្លងកាត់រុស្ស៊ី រួមទាំងពេជ្ររុស្ស៊ីដែលកែច្នៃនៅកន្លែងផ្សេងទៀតផងដែរ។ .
សហភាពអឺរ៉ុបបានប៉ាន់ប្រមាណថា វិស័យពេជ្ររកចំណូលបានប្រហែល ៤,៥ ពាន់លានដុល្លារក្នុងមួយឆ្នាំដល់ទីក្រុងម៉ូស្គូ។ ការដាក់ទណ្ឌកម្មថ្មីនេះក៏តម្រូវឱ្យក្រុមហ៊ុនរបស់សហភាពអឺរ៉ុប EU ដាក់ការហាមឃាត់ក្នុងកិច្ចសន្យារបស់ពួកគេក្នុងការនាំចេញទំនិញមួយចំនួន ដើម្បីឲ្យអ្នកទិញមិនអាចលក់បន្តទៅឱ្យរុស្ស៊ីជាពិសេសទំនិញ និងបច្ចេកវិទ្យាដែលងាយរងគ្រោះ ឬអាចប្រើប្រាស់ដោយកងកម្លាំងប្រដាប់អាវុធរុស្ស៊ីនៅអ៊ុយក្រែន។
គួរឲ្យបញ្ជាក់ផងដែរថា សារធាតុគីមីបន្ថែម អាគុយលីចូម ទែម៉ូស្តាត ម៉ូទ័រអេឡិចត្រូនិកមួយចំនួនដែលអាចប្រើក្នុងការផលិតយន្តហោះគ្មានមនុស្សបើកឧបករណ៍ និងគ្រឿងម៉ាស៊ីនមួយចំនួនត្រូវបានដាក់ក្នុងបញ្ជីនៃទំនិញហាមឃាត់របស់សហភាពអឺរ៉ុបសម្រាប់ការនាំចេញទៅកាន់រុស្ស៊ី។ កាលពីមុន ការនាំចេញទំនិញមួយចំនួនទៅកាន់សហភាពអឺរ៉ុបបានបង្កើតប្រាក់ចំណូលយ៉ាងសំខាន់សម្រាប់រុស្ស៊ី ប៉ុន្តែក្រោយមក ពួកវាត្រូវបានរឹតបន្តឹងក្នុងបរិមានជាក់លាក់ ឬ ហាមឃាត់តែម្តង។
មិនត្រឹមតែប៉ុណ្ណោះ សហភាពអឺរ៉ុបក៏បានរឹតបន្តឹងបន្ថែមលើអង្គភាពចំនួន ២៩ ទៀតរួមមាន អង្គការ ទីភ្នាក់ងារ ក្រុមហ៊ុន ឬធនាគារ ដែលត្រូវបានចោទប្រកាន់ថាពួកគេកំពុងគាំទ្រផ្នែកយោធា និងឧស្សាហកម្មរបស់រុស្ស៊ីក្នុងសង្គ្រាមប្រឆាំងនឹងអ៊ុយក្រែន។
ស្របពេលនេះដែរ សមាជិកប្រទេសទាំង ២៧ របស់សហភាពអឺរ៉ុបកំពុងពិចារណាលើការដាក់ទណ្ឌកម្មប្រឆាំងនឹងបុគ្គលនៅរុស្ស៊ីដែលទទួលផលប្រយោជន៍ពីទ្រព្យសម្បត្តិរបស់អឺរ៉ុបដែលត្រូវបានបង្កកដោយរុស្ស៊ី។ បន្ថែមពីនេះ រដ្ឋជាសមាជិកក៏នឹងអនុវត្តការគ្រប់គ្រងដ៏តឹងរ៉ឹងផងដែរ ដើម្បីធានាថាពួកគេកំពុងតាមដានយ៉ាងសកម្មនូវទ្រព្យសម្បត្តិរបស់អង្គភាព ឬ បុគ្គលដែលស្ថិតនៅក្នុងគោលដៅនៃទណ្ឌកម្ម៕
Account
Security
Favourite Content