បរទេស ៖ យោងទៅតាមប្រភពពី Trailhead បានបង្ហាញថា ពិភពលោកបានឆ្លងកាត់បដិវត្តន៍ឧស្សាហកម្មចំនួន ៤ ដែលបានផ្លាស់ប្តូរសង្គមទំនើបជាមួយនឹងភាពជឿនលឿននៅយុគសម័យវិទ្យាសាស្ត្រ និងការកើនឡើងនៃបច្ចេកវិទ្យាឌីជីថល ខណៈបច្ចុប្បន្ននេះផងដែរ ពិភពលោកក៏កំពុងស្ថិតនៅក្នុងបដិវត្តឧស្សាហកម្មជំនាន់ទី៤។

នៅក្នុងឧស្សាហកម្មទី ៤ នេះ ត្រូវបានដំណើរការដោយ cloud, ឧបករណ័បច្ចេកវិទ្យាទំនើបៗ, មនុស្សយន្ត, ម៉ាស៊ីន, បច្ចេកវិទ្យាអ៊ីនធើណេត Internet of things (IoT) និងបញ្ញាសិប្បនិម្មិត (AI) ជាដើម។ យ៉ាងណាមិញ មុននឹងឈានមកដល់យុគសម័យវិទ្យាសាស្ត្រនេះ ពិភពលោកបានឆ្លងកាត់បដិវត្តន៍ឧស្សាហកម្មមូលដ្ជានធំៗចំនួន ៤ ជំនាន់។

បដិវត្តឧស្សាហកម្មជំនាន់ទីមួយដែលជាបដិវត្តន៍មុនដំបូងគេបង្អស់ និងជាយុគសម័យនៃដើមកំណើតផលិតកម្មមេកានិក ​ឬ ម៉ាស៊ីនដើរដោយចំហាយទឹក។ លើសពីនេះ បដិវត្តន៍នេះបានចាប់ផ្តើមនៅប្រហែលឆ្នាំ១៧៦០ តាមរយៈការលេចរូបរាងនូវម៉ាស៊ីនចំហាយទឹកដែលផ្តល់ថាមពលបានច្រើនយ៉ាងចាប់ពីវិស័យកសិកម្ម រហូតដល់ការផលិតវាយនភណ្ឌ។ នៅពេលសម័យនោះផងដែរ មនុស្សភាគច្រើនគឺជា​កសិករ​​ដែល​រស់នៅពឹងផ្អែក​លើ​ការ​ធ្វើ​កសិកម្ម ប៉ុន្តែជាមួយនឹងការមកដល់នៃម៉ាស៊ីនចំហាយទឹក សង្គមកសិកម្មទាំងនោះបានបានដើរលើផ្លូវនគរូបនីយកម្ម។ ចាប់តាំងពីពេលនោះមក ពិភពលោកបានចាប់ផ្តើមពឹងផ្អែកលើថាមពលចំហាយទឹក ឧបករណ៍ និងម៉ាស៊ីនផ្សេងៗ រួមទាំងមានការបង្កើតដល់នាវា និងផ្លូវដែកដែលធ្វើឲ្យមនុស្សងាយស្រួលជាងមុនក្នុងការធ្វើដំណើរ។ ក្រោយមកទៀត បដិវត្តន៍នេះមានការបង្កើតជារោងចក្រ ប៉ុន្តែ​ជីវិតការងារនៅក្នុង​រោងចក្រ​មាន​ការ​លំបាក ដោយសារកម្មកររោងចក្រភាគច្រើនមិនសូវមានជំនាញ ធ្វើការច្រើនម៉ោង និងទទួលបានថ្លៃពលកម្មថោក។

បន្ទាប់មកទៀត ការជំរុញឧស្សាហូបនីយកម្មបានបង្កើននូវកម្មករមានជំនាញជាងមុន ហើយទីក្រុង និងឧស្សាហកម្មរីកចម្រើនលឿនជាងពេលមុនៗ ដែលធ្វើឲ្យសេដ្ឋកិច្ចក៏រីកចម្រើនទៅតាមនោះដែរ។ ការរីកចម្រើននេះបានជំរុញឱ្យមានបដិវត្តឧស្សាហកម្មជំនាន់ទីពីរបដិវត្តន៍ ដែលជាយុគសម័យបានបង្កើនល្បឿនជាមួយនឹងការច្នៃប្រឌិតសំខាន់ៗមួយចំនួនដូចជា ម៉ាស៊ីនប្រើសាំង យន្តហោះ និងជីគីមីជាដើម ដែលបានជួយឱ្យប្រតិបត្តិការលឿនជាងមុន និងធ្វើបានកាន់តែច្រើន។ គួរកត់សំគាល់បំផុតនោះ គឺសង្វាក់ផ្គត់ផ្គង់ផ្តល់ថាមពលដល់ផលិតកម្មដ៏ធំ ដោយនៅដើមសតវត្សរ៍ទី ២០ ក្រុមហ៊ុនរបស់លោក Henry Ford បានផលិតរថយន្ត Ford Model T ដ៏ទំនើប ដែលជារថយន្តដែលមានម៉ាស៊ីនសាំង។ នៅដើមទសវត្សរ៍ឆ្នាំ១៩០០ មានកំណើនមនុស្សធ្វើការច្រើន និងកំណើនកម្មករបានចាកចេញពីជនបទទៅរស់នៅទីក្រុង។ ទន្ទឹមនឹងការកើនឡើងនៃនគរូបនីយកម្ម ក៏មានការច្នៃប្រឌិតថ្មីៗដូចជា អគ្គិសនី វិទ្យុ និងទូរស័ព្ទ ដែលបានផ្លាស់ប្តូររបៀបដែលមនុស្សរស់នៅ និងទំនាក់ទំនង។​

បន្ទាប់ក្រោយមកទៀត គឺជាការបដិវត្តឧស្សាហកម្មជំនាន់ទីបី ឬ បដិវត្តន៍នៃឌីជីថល។ នៅទសវត្សរ៍ឆ្នាំ១៩៥០ បដិវត្តន៍ឧស្សាហកម្មទីបីបាននាំមកនូវ បន្ទះឈីប semiconductors, ប្រព័ន្ធកុំព្យូទ័រ computing, personal computing និងការវិវត្តនៃអ៊ីនធើណេត។ មិនត្រឹមតែប៉ុណ្ណោះ ក៏មានការផ្លាស់ប្តូរមួយចំនួនទៅជាបច្ចេកវិទ្យាឌីជីថល ដូចជាទូរទស្សន៍ចាស់ដែលធ្លាប់តែចាក់ជាមួយអង់តែនត្រូវបានជំនួសដោយថេប្លេតដែលភ្ជាប់អ៊ីនធឺណិតជាដើម។ ការផ្លាស់ប្តូរពីឧបករណ៍អេឡិចត្រូនិកទៅបច្ចេកវិទ្យាឌីជីថលបានរីករាលដាលជះឥទ្ធិពលដល់ឧស្សាហកម្មយ៉ាងខ្លាំង ជាពិសេសទំនាក់ទំនង និងថាមពលសកល។ លើសពីនេះផងដែរ អេឡិចត្រូនិក និងបច្ចេកវិទ្យាព័ត៌មានបានចាប់ផ្តើមដំណើរការផលិតកម្មដោយស្វ័យប្រវត្តិ និងមានឥទ្ធិពលខ្សែសង្វាក់ផ្គត់ផ្គង់ជាសកល។

សព្វថ្ងៃនេះ ពិភពលោកកំពុងដើរតាមបដិវត្តឧស្សាហកម្មជំនាន់ទី៤ ដែលបានផ្លាស់ប្តូរជីវិតមនុស្សឲ្យមានភាពទំនើបជាងមុនខ្លាំង។ ថ្មីៗនេះ បដិវត្តន៍ឌីជីថលបានផ្លាស់ប្តូរស្ទើរតែគ្រប់ឧស្សាហកម្មទាំងអស់ ដោយបានផ្លាស់ប្តូររបៀបរស់នៅ ធ្វើការ និងទំនាក់ទំនងរបស់មនុស្សឲ្យកាន់តែទំនើបបន្ថែមទៀត ដោយមានម៉ាស៊ីន និង មនុស្សយន្តទំនើបៗ បញ្ញាសិប្បនិម្មិត (AI) ឧបករណ៍ចាប់សញ្ញា និង ការព្រីន 3D (3D Printing)។ ដូច្នោះហើយ បដិវត្តន៍ឧស្សាហកម្មទាំងបីជំនាន់ដំបូងនីមួយៗបានធ្វើឱ្យុមានការផ្លាស់ប្តូរយ៉ាងសំខាន់រហូតដល់បដិវត្តន៍ឧស្សាហកម្មលើកទីបួន។ តាមរយៈបដិវត្តន៍ទាំងនេះបានធ្វើឲ្យមានការផ្លាស់ប្តូរសង្គមតាំងពីសម័យធ្វើស្រែចំការរហូតដល់រោងចក្រ ហើយប្រជាជនបានផ្លាស់ប្តូរពីជនបទមកទីក្រុងជាមួយនឹងផលិតកម្មមេកានិក។ មិនត្រឹតែប៉ុណ្ណោះ របៀបដែលមនុស្សរស់នៅ និងធ្វើការបានផ្លាស់ប្តូរជាមូលដ្ឋានជាមួយនឹងការរកឃើញអគ្គិសនី និងបច្ចេកវិទ្យាឌីជីថល៕