សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ រដ្ឋមន្ត្រីក្រសួងការពារជាតិនៃប្រទេសអាល្លឺម៉ង់ លោក Boris Pistorius បានធ្វើការប្រកាសគួរឲ្យភ្ញាក់ផ្អើលមួយកាលពីពេលថ្មីៗនេះថា រដ្ឋាភិបាលក្រុងប៊ែរឡាំងនឹងបញ្ចេញលុយវិនិយោគដល់ទៅ ៣៥ពាន់លានអឺរ៉ូ ឬប្រមាណជា៤១ពាន់លានដុល្លារ សម្រាប់ការអភិវឌ្ឍបច្ចេកវិទ្យាការពារជាតិនៅទីអវកាស។
មន្ត្រីយោធាថ្នាក់កំពូលរូបនេះបានបញ្ជាក់ទៀតថា កញ្ចប់លុយដ៏ធំសំបើមនេះនឹងត្រូវយកទៅរៀបចំការងារបង្កើនសមត្ថភាពការពារជាតិរបស់អាល្លឺម៉ង់ ជាពិសេស បេសកកម្មស្រាវជ្រាវនៅទីអវកាស ដើម្បីអាចគេចចេញពីការគំរាមកំហែងនានាពីបណ្តាប្រទេសមហាអំណាចមួយចំនួនដែលកំពុងដំឡើងកំដៅនៃអំណាចសព្វាវុធដាក់គ្នានាពេលបច្ចុប្បន្ន។
លោក Pistorius បានសង្កត់ធ្ងន់ថា៖
«ប្រព័ន្ធផ្កាយរណបដែលយើងកំពុងប្រតិបត្តិការបច្ចុប្បន្ន គឺប្រឈមមុខទៅនឹងហានិភ័យខ្លាំងណាស់ ហើយក៏មានភាពផុយស្រួយក្នុងការវាយប្រហារណាមួយក្នុងសម័យកាលបច្ចេកវិទ្យាដ៏ទំនើបនាពេលនេះ។ ក្នុងករណីរងការវាយប្រហារណាមួយកើតឡើងនោះប្រជាជាតិយើងទាំងមូលនឹងជួបប្រទះការជាប់គាំងជាមិនខាន»។
ជាមួយគ្នានេះ លោកបានលើកជាឧទាហរណ៍ជាក់ស្តែងថា កាលពីពេលមុនប្រតិបត្តិការលុកលុយទៅលើប្រទេសអ៊ុយក្រែនដោយប្រទេសរុស្ស៊ី រដ្ឋាភិបាលទីក្រុងមូស្គូបានបើកការវាយប្រហារតាមបណ្តាញអនឡាញមកលើប្រព័ន្ធផ្កាយរណបរបស់ក្រុមហ៊ុន ViaSat ដែលជាលទ្ធផលវាបានធ្វើឲ្យមានផលប៉ះពាល់ និងរអាក់រអួលយ៉ាងខ្លាំងដល់កម្មវិធីគ្រប់គ្រងប្រតិបត្តិការម៉ាស៊ីនតួប៊ីនខ្យល់ដែលជាប្រភពផ្គត់ផ្គង់ថាមពលដ៏សំខាន់របស់អាល្លឺម៉ង់ក្នុងចំនួនប្រហែលជា ៦០០០តួប៊ីន នៅទូទាំងប្រទេស។ មិនត្រឹមតែប៉ុណ្ណោះ លោកក៏បានអះអាងដែរថា ប្រទេសចិន និងរុស្ស៊ី គឺជាសត្រូវដែលគួរឲ្យព្រួយបារម្ភបំផុតរបស់អាល្លឺម៉ង ដែលកន្លងមកជឿជាក់ថា ផ្កាយរណបរបស់រុស្ស៊ី បានព្យាយាមតាមដានផ្កាយរណបរបស់កម្លាំងយោធាអាល្លឺម៉ង់ ខណៈដែលអាល្លឺម៉ង់បានចាត់ទុកសកម្មភាពនេះថា ជាការបំផ្លិចបំផ្លាញដល់បញ្ហាសន្តិសុខជាតិ និងគោលការណ៍សន្តិភាពរបស់អាល្លឺម៉ង់។
គួរឲ្យដឹងដែរថា ខ្ទង់វិនិយោគទៅលើវិស័យការពារក្នុងទីអវកាសរបស់អាល្លឺម៉ងត្រូវបានធ្វើឡើងនៅចំពេលដែលប្រទេសកំពុងបង្កើនថវិកាជាតិសម្រាប់វិស័យការពារជាតិទាំងមូល និងស្របតាមការចង់បានរបស់អង្គការណាតូដែលដឹកនាំដោយអាម៉េរិក។ បច្ចប្បន្នអាល្លឺម៉ង់បានជាប់ឈ្មោះជាប្រទេសដែលមានខ្ទង់ចំណាយធំជាងគេបំផុតទី៤ របស់ពិភពលោកបន្ទាប់ពីអាម៉េរិក ចិន និងរុស្ស៊ី ទៅលើវិស័យការពារជាតិ៕
Account
Security
Favourite Content