ភ្នំពេញ៖ អគ្គនាយកធនាគារអភិវឌ្ឍន៍ជនបទ (ARDB) បានថ្លែងថា បើទោះបីជាស្ថិតក្នុងបរិបទនៃភាពតានតឹងផ្នែកភូមិសាស្រ្តនយោបាយ និងភាពមិនប្រាកដប្រជានៃស្ថានភាពពាណិជ្ជកម្មតំបន់ និងសកលក៏ដោយ ក៏វិស័យស្រូវអង្ករនៅតែដើរតួនាទីយ៉ាងសំខាន់ ខណៈដែលតម្រូវការអង្ករសក​ល​សម្រាប់បរិភោគ និងកែច្នៃ នៅតែបន្តមាននិន្នាការកើនឡើងជាបន្តបន្ទាប់ ជាពិសេសនៅក្នុងឆ្នាំ២០២៥-២០២៦ អាចមានតម្រូវការរហូតដល់ប្រមាណ ៥៤៩លានតោន។

ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ (ARDB) បានមានប្រសាសន៍ថា វិស័យស្រូវអង្ករនៅតែដើរតួនាទីយ៉ាងសំខាន់មិនអាចខ្វះបានសម្រាប់ទ្រទ្រង់ដល់សន្តិសុខស្បៀង ចូលរួមរក្សានូវកម្រិតជីវភាពសមរម្យរបស់ប្រជាកសិករ និងចូលរួមចំណែកជំរុញកំណើនសេដ្ឋកិច្ច ។ ជាក់ស្តែង កាលពីឆ្នាំ២០២៣-២០២៤ មានតម្រូវការអង្ករសកលប្រមាណ ៥២៩ លានតោន , ឆ្នាំ ២០២៤- ២០២៥ មានតម្រូវការអង្ករ ៥៤០ លានតោន ដោយឡែកនៅឆ្នាំ២០២៥-២០២៦ រំពឹងថាតម្រូវការនឹងកើនឡើងដល់ ៥៤៩លានតោន ។

យោងតាមទិន្នន័យ Food Outlook ឆ្នាំ២០២៥ របស់អង្គការស្បៀងអាហារ និងកសិកម្ម FAO នៅក្នុងតំបន់អាស៊ី រួមមាន ៖ ប្រទេសចិន ឥណ្ឌា ឥណ្ឌូនេស៊ី បង់ក្លាដេស និងប្រទេស វៀតណាម មានតម្រូវការប្រើប្រាស់ចំនួនប្រមាណ ៨០% នៃតម្រូវការប្រើប្រាស់សរុប និងប្រមាណ២០% នៅតំបន់អាមេរិក អ៊ឺរ៉ុប អាហ្រ្វិក និងអូសេអានី។

ដោយឡែក តាមទិន្នន័យ Straits Research របស់ប្រទេសឥណ្ឌា បានបង្ហាញថា ​បើគិតត្រឹមខែកក្កដា ក្នុងឆ្នាំ២០២៥នេះ ប្រទេសចិន បានប្រើប្រាស់អង្ករប្រមាណ ១៩២.៨ លានតោន ឥណ្ឌា ១៤០.៣ លានតោន ឥណ្ឌូនេស៊ី ៥១.៨ លានតោន បង់ក្លាដេស ៤២.២លានតោន ហ្វីលីពីន ២២.៥លានតោន និងវៀតណាមប្រមាណ ២២.៤ លានតោន។

ប្រសិនបើត្រឡប់មកមើលការផ្គត់ផ្គង់ស្រូវអង្ករ ក្នុងឆ្នាំ២០២៤ វិញ តំបន់អាស៊ីជាតំបន់បាននាំចេញអង្ករច្រើនជាងគេនៅក្នុងពាណិជ្ជកម្មអង្ករពិភពលោក ដោយបានរួមចំណែកចំនួន ៧៩.៩ភាគរយ (៣១.២ ពាន់លានដុល្លារអាមេរិក) នៃតម្លៃពាណិជ្ជកម្មសរុប និងតំបន់អឺរ៉ុប៧.១ភាគរយ អាមេរិកខាងជើង៦.៤ភាគរយ និងអាមេរិកឡាទីន ៥.៥​ភាគរយ​​ អូសេអានី ០.៦៣ភាគរយ និ អាហ្រ្វិក ០.៥៥ភាគរយ ។ ក្នុងនោះប្រទេសឥណ្ឌា បាននាំចេញប្រមាណ ៣០.៣%, ថៃ ១៦.៣%, ប៉ាគីស្ថាន ១០.៧%, វៀតណាម ១៤.២%, និងប្រទេសកម្ពុជា ៤.៨% ជាដើម។

ឯកឧត្តមបណ្ឌិត បានបន្ថែមថា ៖

«វិស័យស្រូវអង្ករពិតជាបានចូលរួមចំណែកផ្តល់ជាតម្លៃបន្ថែមក្នុងការគាំទ្រទៅលើវិស័យមួយចំនួនដូចជា វិស័យកសិ-ឧស្សាហកម្មកែច្នៃ ចំណីអាហារ វិស័យចិញ្ចឹមសត្វ និងវិស័យថាមពលជាដើម។ ឧទាហរណ៍ ចុងអង្ករ ឬអង្ករបាក់ អាចយកមកផលិតជាគុយទាវ/មី កន្ទក់ដែលសល់មកពីការកិនកែច្នៃស្រូវទៅជាអង្ករ អាចយកមកផលិតជាចំណីមនុស្ស ឬសត្វ។ ចំណែក អង្កាម អាចយកមកផលិតជាជីធម្មជាតិ ឬជីវឧស្ម័នសម្រាប់ប្រើប្រាស់ ឬផលិតកម្មឧស្សាហកម្មអេតាណុលជាដើម»។

សូមបញ្ជាក់ដែរថា ការកើនឡើងនៃតម្រូវការស្រូវអង្ករនៅក្នុងតំបន់ និងសកលលោកនេះ បានឆ្លុះបញ្ចាំងអំពីកាលានុវត្តភាពសម្រាប់កម្ពុជា ក្នុងការបន្តបង្កើនសមត្ថភាពផលិត កែច្នៃ និងនាំចេញស្រូវអង្ករទៅកាន់ទីផ្សារជាយុទ្ធសាស្ត្រក្នុងតំបន់ និងសកលលោក។ ការធ្វើពិពិធកម្ម ផលិតកម្ម និងការប្រើប្រាស់ ការធានានូវចីរភាពផលិតកម្មស្រូវអង្ករ នឹងជួយបង្កើនប្រសិទ្ធភាពការផលិត និងគុណភាពស្រូវអង្ករ តាមរយៈការប្រើប្រាស់បច្ចេកវិទ្យា និងនវានុវត្តន៍កសិកម្ម (AgriTech and Innovation) ក៏ដូចជាការកំណត់គោលដៅទីផ្សារដែលមានតម្លៃខ្ពស់។

គួរបញ្ជាក់ដែរថា ធនាគារអភិវឌ្ឍន៍ជនបទ និងកសិកម្ម បានចូលរួមគាំទ្រដល់វិស័យស្រូវអង្ករតាំងពីឆ្នាំ១៩៩៨ មកម្ល៉េះ តាមរយៈការផ្តល់ហិរញ្ញប្បទានដល់គ្រប់តួអង្គក្នុងខ្សែច្រវាក់តម្លៃផលិតកម្ម កសិកម្មជាទុនបង្វិល និងទុនវិនិយោគ។ គិតត្រឹមថ្ងៃទី៣១ ខែកក្កដា ឆ្នាំ២០២៥ ធនាគារអភិវឌ្ឍន៍ជនបទ និងកសិកម្ម មានសំពៀតឥណទានទៅលើវិស័យស្រូវអង្ករ ប្រមាណជា២០០ លានដុល្លារអាមេរិក ដែលស្មើនឹងប្រមាណជា ៤១ភាគរយនៃសំពៀតឥណទានសរុប៕