តាមរយៈស្តង់ដាដែលបានដាក់ចេញដោយធនាគារពិភពលោក (World Bank) សេដ្ឋកិច្ចរបស់ប្រទេសហ្គ្រិចត្រូវបានគេចាត់ទុកថាជា ប្រទេសដែលស្ថិតនៅក្នុងចំណោមប្រទេសអភិវឌ្ឍន៍កម្រិតខ្ពស់មួយ។

ហ្គ្រិច ជាប្រទេសដែលមានកម្រិតស្តង់ដារស់នៅល្អបំផុតក្នុងចំណោមបណ្តាប្រទេសជាច្រើនលើពិភលោក ហើយកំពុងស្ថិតនៅក្នុងបញ្ជី លេខរៀងទី៣២របស់ធនាគារពិភពលោកដែលមានសន្ទស្សន៍នៃការអភិវឌ្ឍធនធានមនុស្សល្អជាងគេបំផុត ឬ Human Development Index (HDI) ខណៈដែល GDP សម្រាប់ពលរដ្ឋម្នាក់មានទៅដល់ ២៣ ០០០ដុល្លារកាលពីឆ្នាំ២០២១។

តើអ្នកបានដឹងទេថា ផ្ទៃក្នុងនៃប្រទេសមួយនេះមានជាប់បំណុលបរទេសច្រើនបំផុត ពោលគឺស្ថិតនៅក្នុងចំណាត់ថ្នាក់លេខ៧គិតជាទឹកប្រាក់ដល់ទៅ ៣៣២,៦ពាន់លានអឺរ៉ុប ឬត្រូវជា ៣៧៩ពាន់លានដុល្លារអាមេរិក ដែលជាតួលេខចុងក្រោយបង្ហាញដោយ The World Populaion​ Review។

បំណុលរបស់ប្រទេសហ្គ្រិចមានភាពចាក់ស្រេះដោយសារបញ្ហាជាច្រើនបូកផ្សំគ្នា ហើយអូសបន្លាយអស់រយៈពេលជាច្រើនទសវត្សរ៍មកហើយខណៈដែលការសងបំណុលជាប្រចាំឆ្នាំអាចធ្វើបានត្រឹមតែចន្លោះតិចតួចដែលមានន័យថារដ្ឋាភិបាលត្រូវការពេលវេលាជាច្រើនទសវត្សរ៍ទៀតដើម្បីអាចដោះស្រាយបញ្ហាបំណុលបរទេសនេះទាំងស្រុងបាន។

ដំបូងឡើយបំណុលរបស់ហ្គ្រិចគឺចាប់ផ្តើមចេញពីវិបត្តិសេដ្ឋកិច្ចជាសកលឆ្នាំ១៩៣២ ដូចទៅនឹងបណ្តាប្រទេសដទៃទៀតដែរ ហើយបំណុលបរទេសចាប់ផ្តើមកើនឡើងខ្លាំងមុនពេលដែលហ្គ្រិចអាចទទួលបានសិទ្ធិក្នុងការចូលរួមជាសមាជិករបស់ប្លុកអឺរ៉ុបកាលពីឆ្នាំ១៩៨១ដោយគិតជាមធ្យមនៃសន្ទស្សន៍បំណុលចន្លោះពេលនេះមានទៅដល់១៩,៨ភាគរយ។

ចូលឆ្នាំ២០០១ រូបិយវត្ថុអឺរ៉ូ (EURO) ត្រូវបានណែនាំឲ្យប្រើប្រាស់ជាលើកដំបូងនៅក្នុងប្លុកអឺរ៉ុប ប៉ុន្តែហ្គ្រិចបែរជាជួបទៅនឹងបញ្ហាឱនភាពពាណិជ្ជកម្មដែលមានន័យថាការចំណាយរបស់ប្រទេសមានចំនួនច្រើនជាងចំណូលដែលវាធ្វើឲ្យប្រទេសចាំបាច់ក្នុងការធ្វើកម្ចី និងស្នើសុំការវិនិយោគដោយផ្ទាល់ពីប្រទេសដទៃ។ ចាប់ពីឆ្នាំ១៩៩៩ ទៅដល់ឆ្នាំ២០០៨ និងឆ្នាំ២០០៩ ទាំងឱនភាពពាណិជ្ជកម្មក៏កើនឡើង ឱនភាពថវិកាក៏កើនឡើងផ្ទួនៗទៅដល់ក្បែរនឹង៥ភាគរយនៃទំហំ GDP របស់ប្រទេស។

បញ្ហាជាច្រើនទៀតត្រូវបានគេមើលឃើញថាបានកើតឡើងជាបន្តបន្ទាប់រហូតដល់ឆ្នាំ២០១០ រដ្ឋាភិបាលទីក្រុងអាតែនបានរកឃើញនូវបញ្ហាដ៏ធំមួយទៀតដែលធ្វើឲ្យបំណុលរបស់ប្រទេសកើនឡើងឥតឈប់ឈរបែរនេះគឺដោយសារបញ្ហាចំណាយច្រើនហួសហេតុរបស់រដ្ឋាភិបាល។ទោះបីជាបានស្រោចស្រង់ស្ថានភាពបានធូរស្រាលក្តី ប៉ុន្តែរដ្ឋាភិបាលនៅតែបន្តជួបផលលំបាកក្នុងការដោះស្រាយបញ្ហាបំណុលនៅឡើយរហូតដល់ឆ្នាំ២០២០ទៅហើយក្តី សមមាត្របំណុលធៀបទៅនឹងផលិតផលក្នុងស្រុក ឬ debt-to-GDP ratio បានបន្តកើនឡើងក្នុងកំណត់ត្រាដ៏ខ្ពស់បំផុតមួយមិនធ្លាប់មានប្រមាណជា២០៦,៣ភាគរយ តែបានធ្លាក់ចុះបន្តិចនៅឆ្នាំ២០២១ មកត្រឹម១៩៧,៣ភាគរយ។ គួរឲ្យដឹងដែរថា សម្រាប់ឆ្នាំ២០២៣នេះ ប្រទេសស៊ីប គឺជាប្រទេសដែលមានជាប់បំណុលបរទេសច្រើនជាងគេរហូតទៅដល់ ២១,៦៤ទ្រីលានដុល្លារ ចំណែកប្រទេសអាមេរិកនៅលេខរៀងទី២មានបំណុល ១៩,២៣ទ្រីលានដុល្លារ ខណៈដែលហ្គ្រិចកំពុងស្ថិតនៅលេខរៀងទី៧ក្នងបញ្ជីដោយ The World Population Review៕