បរទេស ៖ កាសែតរ៉យទ័រ នៅសប្តាហ៍នេះបានរាយការណ៍ថា រដ្ឋាភិបាលនៃប្រទេសជប៉ុននឹងធ្វើការប្រគល់នាវាចម្បាំងខ្នាតមធ្យមប្រភេទ destroyers ជាច្រើនគ្រឿងទៅឲ្យសម្ព័ន្ធមិត្តរបស់ខ្លួននៅក្នុងតំបន់អាស៊ាន គឺ ប្រទេសហ្វីលីពីន ដែលវាត្រូវបានគេមើលឃើញថា ជាផ្នែកមួយនៃកិច្ចខិតខំប្រឹងប្រែងទប់ស្តាត់ឥទ្ធិពលរបស់ប្រទេសចិននៅក្នុងតំបន់សមុទ្ររួមគ្នា។

Japaneses daily ក៏បានចេញផ្សាយដូចគ្នាដែរដោយលំអិតបន្ថែមថា ផែនការនៃការបញ្ជូននាវាចម្បាំងដែលធ្លាប់ត្រូវបានប្រើប្រាស់រួចមកហើយនៅក្នុងជួរកងកម្លាំងនៃកងទ័ពជើងទឹកជប៉ុន។ នាវាទាំងនោះក៏មានទាំងត្រកូល Abukuma-class destroyers ចំនួន៦គ្រឿងផងដែរ ដែលនាវាចម្បាំងប្រភេទនេះធ្លាប់បានប្រើប្រាស់ដោយកងកម្លាំងនាវាជើងទឹកជប៉ុនអស់រយៈពេលជាង៣ទសវត្សរ៍មកហើយ។

កាលពីខែមុន គេក៏បានទទួលដំណឹងរួចមកហើយដែរថា រដ្ឋមន្ត្រីការពារជាតិនៃប្រទេសជប៉ុន លោកមេបញ្ជាការ Nakatani និងលោករដ្ឋមន្ត្រីការពារជាតិហ្វីលីពីន Giberto Teodoro ធ្លាប់បានសន្យាគ្នារួចមកហើយក្នុងការប្រគល់នាវាចម្បាំងមួយចំនួន។ តាមផែនការ ភាគីខាងហ្វីលីពីននឹងត្រូវធ្វើដំណើរមកដល់ជប៉ុននៅរដូវក្តៅខាងមុខនេះដើម្បីត្រួតពិនិត្យ និងត្រៀមកិច្ចការងារចុងក្រោយដើម្បីទទួល និងបញ្ជូននាវាមកកាន់ទឹកដីហ្វីលីពីនជាផ្លូវការ។ យ៉ាងណាក្តី កន្លងមកជុំវិញសកម្មភាពយោធារវាងប្រទេសទាំងពីរត្រូវបានរដ្ឋាភិបាលក្រុងប៉េកាំងតាមដានយ៉ាងជិតស្និទ្ធ ដោយទីក្រុងប៉េកាំងក៏ធ្លាប់បានអំពាវនាវម្តងហើយម្តងទៀតចំពោះអ្វីដែលជាការសម្រេចចិត្តរបស់ជប៉ុនទៅនឹងកិច្ចការងារយោធា និងសន្ដិសុខ។

ក្រឡេកទៅមើលការយល់ឃើញពីភាគីរដ្ឋាភិបាលទីក្រុងតូក្យូ និងទីក្រុងម៉ានីលវិញ ពួកគេតែងតែបានបង្ហាញនូវក្តីព្រួយបារម្ភជានិច្ច ជាពិសេស សកម្មភាពយោធាដ៏មមាញឹករបស់ប្រទេសចិននៅតាមដែនសមុទ្ររួមគ្នាដែលមានទាំងសមុទ្រចិនខាងត្បូង និងសមុទ្រចិនភាគខាងកើតផងដែរ។

គួរឲ្យដឹងដែរថា ត្រកូលនាវាចម្បាំង Abukuma-class destroyer មានរូបរាងតូចជាងគេបន្តិចធៀបទៅនឹង destroyer ល្បីៗរបស់ពិភពលោក ដោយវាអាចមានទំងន់ត្រឹមតែ២០០០តោន និងអាចផ្ទុកនាវិកប្រមាណជា១២០នាក់ ប៉ុន្តែវាអាចបំពាក់មីស៊ីលដែលអាចប្រឆាំងទៅនឹងនាវាមុជទឹក និងមីស៊ីលប្រឆាំងនាវាចម្បាំងផ្សេងទៀតបាន។ ជាមួយគ្នានេះ រហូតមកដល់ពេលបច្ចុប្បន្ន រដ្ឋាភិបាលនៃប្រទេសហ្វីលីពីន ពុំដែលមាននាវាចម្បាំងខ្នាតមធ្យម destroyer ប្រើប្រាស់នៅក្នុងកម្លាំងកងទ័ពជើងទឹករបស់ខ្លួននៅឡើយទេដោយមានត្រឹមតែនាវាចម្បាំងខ្នាតតូចប្រភេទ frigates និង corvettesតែប៉ុណ្ណោះ ដូច្នេះការទទួលបានជំនួយពីសម្ព័ន្ធមិត្តជប៉ុននាពេលនេះ គឺជាការដំឡើងអំណាចយោធាជើងទឹករបស់ខ្លួនបានមួយកម្រិតធំ៕