សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មាន នីគីអាស៊ី បានរាយការណ៍ថា ក្រុមហ៊ុនពាណិជ្ជកម្មរបស់ជប៉ុន Mitsubishi Corporation គ្រោងនឹងវិនិយោគ ៦០០ លានដុល្លារក្នុងគម្រោងជីករ៉ែទង់ដែងនៅអាម៉ររិក ខណៈដែលក្រុមហ៊ុននេះព្យាយាមបំពេញតម្រូវការទង់ដែងដែលកំពុងកើនឡើងសម្រាប់រថយន្តអគ្គិសនី និងមជ្ឈមណ្ឌលទិន្នន័យ។
កាលពីខែកក្កដា កន្លងទៅនេះ រដ្ឋបាល លោក Trump បានប្រកាសថា ខ្លួននឹងដាក់ពន្ធ ៥០% លើការនាំចូលផលិតផលទង់ដែងពាក់កណ្តាលសម្រេច ដើម្បីការពង្រីកផលិតកម្ម និងមជ្ឈមណ្ឌលចែកចាយទង់ដែងក្នុងស្រុក។ ឥឡូវនេះ ក្រុមហ៊ុនទង់ដែងមួយចំនួនរបស់បរទេសកំពុងពិចារណាវិនិយោគនៅអាម៉េរិក ខណៈដែលគេមើលឃើញថា វាគឺជាកន្លែងដ៏គួរឱ្យចាប់អារម្មណ៍ក្នុងការអភិវឌ្ឍន៍ប្រតិបត្តិការរុករករ៉ែប្រកបដោយស្ថិរភាព ហើយអាម៉េរិកក៏ជាអ្នកផលិតធំជាងគេទី ៥ របស់ពិភពលោកផងដែរ។
ជាមួយនឹងការវិនិយោគនេះ ក្រុមហ៊ុន Mitsubishi Corp នឹងកាន់កាប់ភាគហ៊ុន ៣០% នៅក្នុងគម្រោងរុករករ៉ែទង់ដែងឈ្មោះថា Copper World នៅរដ្ឋ Arizona ខណៈដែលក្រុមហ៊ុនកាណាដា Hudbay Minerals នឹងកាន់កាប់ភាគហ៊ុន ៧០%។ គេរំពឹងថា គម្រោង Copper World នឹងពង្រីកការលក់នៅក្នុងអាម៉េរិក ខណៈដែលមហាអំណាមួយនេះមានចំណែក ៦% ប៉ុណ្ណោះនៃតម្រូវការទង់ដែងរបស់ពិភពលោក។ ស្របពេលដែលអាម៉េរិកមានអណ្តូងរ៉ែទង់ដែងច្រើន ប៉ុន្តែវាខ្វះរោងចក្រចម្រាញ់រ៉ែទង់ដែងទៅជា cathodes ដែលសម្រាប់ប្រើប្រាស់នៅក្នុងអគ្គិសនី។ ដូច្នោះ ដៃគូវិនិយោគអាចពិចារណាដំឡើងគ្រឿងបរិក្ខារចម្រាញ់បន្ថែមទៀត បន្ទាប់ពីអណ្តូងរ៉ែចាប់ផ្តើមប្រតិបត្តិការ។
មិនត្រឹមតែប៉ុណ្ណោះ វានឹងក្លាយជាការវិនិយោគជាលើកដំបូងរបស់ក្រុមហ៊ុនជប៉ុននៅក្នុងអណ្តូងរ៉ែទង់ដែងរបស់អាម៉េរិកក្នុងរយៈពេល ៤៥ ឆ្នាំ។ គួរឲ្យបញ្ជាក់ដែរថា ការវិនិយោគចុងក្រោយបំផុតរបស់ Mitsubishi Corp នៅក្នុងអណ្តូងរ៉ែទង់ដែងរបស់អាម៉េរិកនៅប្រហែលឆ្នាំ ១៩៨០ ។ ទន្ទឹមនឹងនេះ Mitsubishi Corp នឹងធ្វើការសិក្សាអំពីលទ្ធភាពច្បាស់លាស់ និងឈានដល់ការសម្រេចចិត្តវិនិយោគចុងក្រោយនៅឆ្នាំក្រោយ ដោយរំពឹងថា ប្រតិបត្តិការអាចនឹងចាប់ផ្តើមនៅឆ្នាំ ២០២៩។
នាពេលបច្ចុប្បន្ននេះ ក្រុមហ៊ុន Mitsubishi Corp ចាប់អារម្មណ៍លើប្រតិបត្តិការអណ្តូងរ៉ែទង់ដែងចំនួន ២ នៅក្នុងប្រទេសប៉េរូ និង ៣ នៅឈីលី។ លើសពីនេះ ក្រុមហ៊ុននេះក៏គ្រោងនឹងចាប់ផ្តើមផលិតកម្មអណ្តូងរ៉ែទង់ដែង Marimaca ក្នុងប្រទេសឈីលីផងដែរ។ ក្នុងឆ្នាំ២០២៤ Mitsubishi Corp ផលិតទង់ដែងបានចំនួន ៣២៩ ០០០ តោន ដែលច្រើនជាងគេក្នុងចំណោមក្រុមហ៊ុនជប៉ុនផ្សេងៗទៀត។ គេព្យាករណ៍ថា គម្រោងអណ្តូងរ៉ែថ្មីរបស់អាម៉េរិកនឹងបន្ថែមប្រហែល ៣០ ០០០ តោនទៀតពីលើចំនួនសរុបនោះ ដែលបង្កើនទិន្នផលជិត ១០% ។ នៅក្នុងឆ្នាំសារពើពន្ធដែលបញ្ចប់នៅខែមីនា ឆ្នាំ ២០២៥ អាជីវកម្មទង់ដែងរបស់ក្រុមហ៊ុននេះរកប្រាក់ចំណេញសុទ្ធចំនួន ៥០៤ លានដុល្លារ ដែលកើនឡើង ១៦% ពីឆ្នាំមុន។ ទីភ្នាក់ងារថាមពលអន្តរជាតិ (IEA) ប៉ាន់ប្រមាណថា តម្រូវការទង់ដែងសកលនឹងកើនឡើងពី ២៧ លានតោននៅឆ្នាំ២០២៤ កើនដល់ ៣១ លានតោននៅឆ្នាំ២០៣០ ។ បន្ថែមពីនេះ គោលដៅរបស់ Mitsubishi Corp គឺការបង្កើនផលិតកម្មទង់ដែងឱ្យលើសពី ៤០០ ០០០ តោននៅឆ្នាំ២០៣០ ដែលនឹងបង្កើនចំណាត់ថ្នាក់ផលិតកម្មសកលរបស់ខ្លួនពីលេខ ២០ មកត្រឹមប្រហែលចំណាត់ថ្នាក់ទី១៥ ៕
Account
Security
Favourite Content