ភ្នំពេញ ៖ មន្ទីរពេទ្យកុមារជាតិ ដែលជាមន្ទីរពេទ្យបង្អែកជាតិដ៏ធំបំផុត និងជាមន្ទីរសេវាថែទាំសុខភាពកុមារឌីជីថលដំបូងគេក្នុងប្រទេសកម្ពុជា រួមជាមួយនឹងក្រុមហ៊ុន ពេទ្យយើង ហ៊ែលថេក ឯ.ក (ហៅ ពេទ្យយើង) ដែលជាក្រុមហ៊ុនបច្ចេកវិទ្យាសុខាភិបាលឌីជីថលឈានមុខគេរបស់កម្ពុជា កាលពីថ្ងៃទី៥ ខែធ្នូ ឆ្នាំ២០២៤ បានទទួលគណៈប្រតិភូមន្ត្រីរដ្ឋាភិបាល និងប្រតិភូធុរកិច្ចជនឡាវ មកធ្វើទស្សនកិច្ចសិក្សាស្វែងអំពីសេវាសុខាភិបាលឌីជីថលនៅកម្ពុជា។

ការចុះមកទស្សនសិក្សារបស់ប្រតិភូឡាវនូវប្រព័ន្ធសុខាភិបាលឌីជីថលនៅកម្ពុជានេះ ស្របពេលដែលឡាវបានចុះកិច្ចព្រមព្រៀងលើអនុស្សរណៈយោគយល់គ្នាជាមួយក្រុមហ៊ុនបច្ចេកវិទ្យាសុខាភិបាលឌីជីថល ពេទ្យយើង កាលពីខែតុលា ឆ្នាំ២០២៤កន្លងទៅថ្មីៗនេះ។

ចំពោះដំណើរទស្សនកិច្ចនេះផងដែរ លោកសាស្ត្រាចារ្យ ញឹប អង្គាបុស្ស នាយកមន្ទីរពេទ្យកុមារជាតិ បានថ្លែងឲ្យដឹងថា ការចុះមកទស្សនកិច្ចរបស់ប្រតិភូរដ្ឋាភិបាលឡាវ គឺជាការស្វែងយល់ដ៏ល្អ ព្រោះថាប្រទេសទាំងពីរមានបែបផែនការនៃការងារមិនសូវខុសគ្នាប៉ុន្មាននោះទេនៅលើវិស័យសុខាភិបាល។

លោកបានបន្ដថា៖

«ការប្រើប្រាស់ប្រព័ន្ធឌីជីថល វាជាបរិបទថ្មីដើម្បីដើរឱ្យទាន់ពិភពលោក។ ជាក់ស្ដែងបច្ចេកវិទ្យាសុខាភិបាលឌីជីថល ពេទ្យយើង គឺមានគុណប្រយោជន៍ខ្ពស់ក្នុងបង្កើតភាពងាយស្រួលដល់គ្រូពេទ្យ ក៏ដូចជាអ្នកជំងឺ ទាំងចងក្រងឯកសារ និងដឹងពីប្រវត្ដិរបស់អ្នកជំងឺដោយមិនបាច់ចំណាយពេលក្នុងការសួរនាំច្រើន និងឯកសារជាក្រដាសនោះទេ ដែលជាផ្នែកមួយបម្រើសេវាថែទាំសុខភាដល់ប្រជាពលរដ្ឋកាន់តែប្រសើរ និងមានទំនុកចិត្ដខ្ពស់។ សម្រាប់អ្នកជំងឺកាន់តែងាយស្រួល គឺទទួលបានសាររំលឹកត្រូវត្រឡប់មកជួបវេជ្ជបណ្ឌិតវិញ ទទួលបានវេជ្ជបញ្ជាឌីជីថល និងការជូនដំណឹងអំពីការលេបថ្នាំតាមវេជ្ជបញ្ជារបស់ពួកគាត់ តាមកាលវិភាគបានណែនាំ។ ជាងនេះទៅទៀត អ្នកជំងឺទទួលបានអត្ថបទគន្លឹះថែទាំជឿទុកចិត្តប្រចាំថ្ងៃពីប្រភពច្បាស់លាស់ និងវេជ្ជបណ្ឌិតជំនាញ»។

លោកសាស្ដ្រាចារ្យបានបន្ដឱ្យដឹងថា មន្ទីរពេទ្យកុមារជាតិទាំងមូល បានប្រតិបត្តិការបែបឌីជីថលពេញលេញចាប់តាំងពីឆ្នាំ២០​២​២​។ អ្នកជំងឺដែលមកទទួលសេវាព្យាបាលនៅមន្ទីរពេទ្យឥឡូវនេះ គឺទទួលបានកំណត់ត្រាឌីជីថលពីមន្ទីរពេទ្យ ហើយអាចរក្សាទុកបែបឌីជីថលលើស្មាតហ្វូនរបស់អ្នកជំងឺផងដែរ។

លោកស្រី ប៉ុង លីមសាន ស្ថាបនិក និងប្រធាននាយកប្រតិបត្តិពេទ្យយើង បានមានប្រសាសន៍ឱ្យដឹងថា៖ ក្រុមហ៊ុនបច្ចេកវិទ្យា ពេទ្យយើង បង្កើតឡើងដោយស្នាដៃកូនខ្មែរតាំងពីឆ្នាំ២០១៥ បច្ចុប្បន្នបានចាប់ដៃគូជាមួយពេទ្យរដ្ឋ និងឯកជន និងបានពង្រីកទីផ្សារនៅបណ្តាប្រទេសសមាជិកអាស៊ាន និងបានបោះជំហានទៅបើកការិយាល័យកណ្តាលថ្មីនៅសហរដ្ឋអាមេរិក ដើម្បីពង្រីកសេវាកម្មបច្ចេកវិទ្យាសុខាភិបាលរបស់ខ្លួនទៅទីផ្សារនៅអាមេរិក ក៏ដូចជាពិភពលោកផងដែរ ដើម្បីចូលរួមចំណែកដល់ការកែលម្អប្រព័ន្ធថែទាំសុខភាពបែបឌីជីថល និងលើកម្ពស់ការថែទាំសុខភាពកាន់តែប្រសើរ ហើយបង្ករបរិយាកាសទទួលសេវាសុខាភិបាលកាន់តែងស្រួល តាមជម្រើសថ្មី ជម្រើសឌីជីថលតាមអែប ពេទ្យយើង e-Health ID ។

លោកស្រីបានបញ្ជាក់ថា៖

«ប្រព័ន្ធសុខាភិបាលឌីជីថល គឺជាបង្កើននូវគុណភាពបម្រើសេវាសុខាភិបាលជូនប្រជាពលរដ្ឋយើងឱ្យកាន់តែប្រសើរ ដែលជាការចូលរួមចំណែកជាមួយរាជរដ្ឋាភិបាល ក្នុងការលើកកម្ពស់សុខុមាលប្រជាជន និងគុណភាពជីវភាព ពិសេសកសាងធនធានមនុស្សប្រកបដោយសុខភាពល្អ។មកទល់នឹងបច្ចប្បន្ននេះ ក្រុមហ៊ុនបច្ចេកវិទ្យា ពេទ្យយើង បានចាប់ដៃគូនៅតាមមន្ទីរពេទ្យរដ្ឋ និងឯកជនទូទាំងប្រទេសកម្ពុជា ហើយសម្រាប់បណ្ដាប្រទេសល្បីៗនៅពិភពលោក ចំនួន៥ ប្រទេសហើយ រួមមាន៖ អាមេរិក សិង្ហបុរី ថៃ ឡាវ និងវៀតណាម»។

លោកស្រី ប៉ុង លីមសាន បានឱ្យដឹងថា ៖ ក្រុមហ៊ុនបច្ចេកវិទ្យាសុខាភិបាល ពេទ្យយើង ហែលថេក ឯ.ក. ត្រូវបានផ្តួចផ្តើមបង្កើតឡើងជាក្រុមហ៊ុន Startup កម្ពុជាផ្តល់ដំណោះស្រាយក្នុងវិស័យសុខាភិបាល និងកសាងប្រព័ន្ធសុខាភិបាលឌីជីថលតាំងពីឆ្នាំ២០១៥។ ពេទ្យយើង ក៍ជាក្រុមហ៊ុនជ័យលាភី ដែលបានទទួលពាន់រង្វាន់ថ្នាក់ជាតិ និងអន្តរជាតិបន្តបន្ទាប់ជច្រើន។

ប្រព័ន្ធបច្ចេកវិទ្យាសុខាភិបាលឌីជីថល ពេទ្យយើង ត្រូវបានដាក់ឱ្យប្រើប្រាស់ និងចូលរួមផ្លាស់ប្តូរប្រតិបត្តិការរបស់មន្ទីពេទ្យរដ្ឋ និងឯកជនរាប់រយក្នុងប្រទេសកម្ពុជា នៅបណ្តាប្រទេសអាស៊ីអាគ្នេយ៍ និងសហរដ្ឋអាមេរិក ជាដើមចាប់តាំងពីឆ្នាំ២០១៥។ ពេទ្យយើងបាននិងកំពុងជួយជាវិជ្ជាមានដល់ការថែទាំសុខភាព និងជីវិតរបស់មនុស្សជាង៥លាននាក់ តាមរយៈដំណោះស្រាយថែទាំសុខភាពឌីជិថលទំនើបរបស់ខ្លួន ហើយអ្នកជំងឺរាប់លាននាក់មានទិន្នន័យវេជ្ជសាស្ត្រឌីជីថលរបស់ពួកគេពីការទៅទទួលសេវានៅមន្ទីរពេទ្យ និងគ្លីនិកដៃគូ ហើយលទ្ធផលថែទាំសុខភាពកាន់តែប្រសើរឡើងជាមុន ដែលពួកគេមិនធ្លាប់ទទួលបានដោយរលូន និងមានសុវត្ថិភាព។ ជាមួយនឹងដំណោះស្រាយបច្ចេកវិទ្យាសុខាភិបាលចុងក្រោយបង្អស់របស់ក្រុមហ៊ុន ពេទ្យយើង អ្នកជំងឺអាចភ្ជាប់ទំនាក់ទំនងជាមួយវេជ្ជបណ្ឌិតដែលជឿទុកចិត្តនិងមានជំនាញតាមរយៈកម្មវិធីអែបដ៏មានសុវត្ថិភាពរបស់យើងគឺ Pethyoeung e-Health ID App ។ Pethyoeung e-Health App កំពុងតែក្លាយទៅជាកម្មវិធីបណ្តុំសេវាសុខាភិបាល និងការថែទាំសុខភាពបែបឌីជីថតែមួយនាពេលអនាគតសម្រាប់មនុស្សគ្រប់គ្នាសម្រាប់សុខភាពប្រសើរជាងមុន និងស្រួលជាងមុន។

ក្នុងទិសដៅពង្រីកទីផ្សារអន្តរជាតិ នៅខែតុលា ឆ្នាំ ២០២៤ ក្រុមហ៊ុនពេទ្យយើងបានចុះកិច្ចព្រមព្រាងបង្កើតជាដៃគូយុទ្ធសាស្ត្រជាមួយសមភាគីនៅឡាវគឺ ក្រុមហ៊ុនបណ្តុះបណ្តាល និងទីលើផ្នែកប្រឹក្សាបច្ចេកវិទ្យា Enterprise and Development Consultants Co., Ltd. (ហៅថា EDC Lao)។ កិច្ចសហការនេះមានគោលបំណងនាំយកដំណោះស្រាយបច្ចេកវិទ្យាសុខាភិបាលឌីជីថល និងថែទាំសុខភាពរបស់ពេទ្យយើងទៅកាន់ទីផ្សារសុខាភិបាលប្រទេសឡាវ ក្នុងទិសដៅកសាងប្រព័ន្ធសុខាភិបាលឌីជីថលនៅបឡាវទាំងស្ថាប័នសុខាភិបាល សាធារណៈ និងឯកជន ដើម្បីជាជម្រើសសេវាសុខាភិបាលថ្មី និងសេវាថែទាំទំនើបសម្រាប់ពលរដ្ឋឡាវ ក្នុងសម័យបច្ចេកវិទ្យា និងអេអាយ។ លទ្ធផលវិជ្ជមានពីភាពជាដៃគូនេះ ក្រុមហ៊ុន EDC Pethyoeung Laos ទទួលបានការគាំទ្រ និងបានចាប់ផ្តើមមានគ្លីនិកដៃគូអនុវត្តនូវប្រព័ន្ធសុខាភិបាលឌីជីថល ពេទ្យយើង ដើម្បីផ្លាស់ប្តូរមកកាន់សេវាថែទាំសុខភាពតាមប្រព័ន្ធឌីជីថល ក្នុងគោលបំណងធ្វើឱ្យប្រសើរឡើងនូវលទ្ធផលថែទាំសុខភាពសម្រាប់ប្រជាជនឡាវតាមរយៈបណ្តាញមន្ទីរពេទ្យនិងគ្លីនិករបស់យើងក្នុងប្រទេសឡាវ៕