ភ្នំពេញ ៖ មូលនិធិអភិវឌ្ឍន៍ជំនាញ ហៅកាត់ថា SDF គឺជាស្ថាប័នរាជរដ្ឋាភិបាលមួយដែលបង្កើតឡើងសម្រាប់​ចូល​រួមជួយប្រជាពលរដ្ឋ ជាពិសេសបុគ្គលិកក្រុមហ៊ុនឱ្យទទួលបានឱកាសបណ្ដុះបណ្ដាលជំនាញ​ សំដៅពង្រឹង​​សមត្ថភាពរបស់ពួកគេឱ្យកាន់តែប្រសើរ ដើម្បីឈានទៅទទួលបានប្រាក់ចំណូលខ្ពស់។ SDF ដើរតួនាទីជាអ្នកផ្គូផ្គងវិស័យឯកជនដែលមានតម្រូវការបុគ្គលិកជំនាញទៅនឹងបុគ្គលិកដែលកំពុង​ស្វែងរកការងារ ហើយបន្តសហការជាមួយនឹងវិទ្យាស្ថានបណ្ដុះបណ្ដាលជំនាញ ដោយចូលរួម​ជាថវិកា​គាំទ្រដល់ដំណើរការបណ្ដុះបណ្ដាល។

ជាក់ស្ដែង អ្នកនាង ស៊ុក ភូ គឺជាសិក្ខាកាមម្នាក់ដែលចូលរួមនៅក្នុងវគ្គបណ្ដុះបណ្ដាលជំនាញ មានអាយុ ២៥ឆ្នាំ ធ្លាប់ទទួលបានការសិក្សាចំណោះទូទៅត្រឹមថ្នាក់ទី១២ និងមិនបានបន្តទៅដល់​ថ្នាក់​មហាវិទ្យាល័យនោះទេ ដោយសារតែកត្តាជីវភាព។ បន្ទាប់ពីបញ្ចប់ការសិក្សាកម្រិតទុតិយភូមិ អ្នកនាង ស៊ុក ភូ មិនមានមុខរបរអ្វីទេ​ ពោលគឺធ្វើការងារផ្ទះ និងរ៉ាប់រងលើការងារដាំស្ល មើលថែផ្ទះសម្បែង។ ក្រោយមក ដោយចង់រកចំណូល អ្នកនាង ស៊ុក ភូ បានស្គាល់អង្គការមួយ តាមមិត្តភក្កិរបស់ខ្លួន។

តាមរយៈអង្គការស្លាបព្រា យុវតីរូបនេះបានចូលរួមនៅក្នុងវគ្គបណ្ដុះបណ្ដាលលើជំនាញ ម្ហូបអាហារ និងភេសជ្ជៈ រយៈពេល១ឆ្នាំ។ នៅក្នុងអំឡុងពេលបណ្ដុះបណ្ដាលនោះទៀតសោត សិក្ខាកាមរូបនេះក៏ទទួលបាននូវកន្លែងស្នាក់នៅ ការធានារ៉ាប់រង (ប័ណ្ណប.ស.ស) និងទទួលបានប្រាក់ឧបត្ថម្ភប្រចាំខែ ដែលគាំទ្រដោយមូលនិធិអភិវឌ្ឍន៍ជំនាញ។

អ្នកនាង ស៊ុក ភូ បានរៀបរាប់ឱ្យដឹងថា៖

«ពីមុនមិនដឹងថាខ្លួនឯងអាចធ្វើអីបានទេ ក្រៅពីនៅផ្ទះ ប៉ុន្តែក្រោយពេលបានមករៀននៅអង្គការនេះ ខ្ញុំទទួលបានជំនាញមួយច្បាស់លាស់ គឺជំនាញ​ខាងម្ហូបអាហារ និងភេសជ្ជៈ។ ខ្ញុំអាចទទួលបានជំនាញ និងការងារល្អមួយ អាចរកប្រាក់ចំណូលដែលអាចផ្គត់ផ្គង់ខ្លួនឯងបានផង ថែមទាំងអាចជួយគ្រួសារបានទៀតផង»។

បច្ចប្បន្ន យុវតីរូបនេះបានចូលបម្រើការងារផ្នែកជំនួយការម្ហូបអាហារ និងភេសជ្ជៈនៅសណ្ឋាគារ Treeline ដោយទទួលបានប្រាក់ចំណូលសមរម្យ ហើយថែមទាំងទទួលបានការបង្ហាត់បង្រៀនទៅលើភាសាអង់គ្លេសទៀតផង។

បើតាមការឱ្យដឹងពីលោក គី សុខគីម ដែលជានាយកប្រតិបត្តិមូលនិធិអភិវឌ្ឍន៍ជំនាញបានឱ្យដឹងថា បច្ចុប្បន្ននេះ SDF កំពុងតែអនុវត្តនូវកម្មវិធីចំនួន៤ ក្នុងនោះកម្មវិធីចំនួន៣ បានជួយដោយផ្ទាល់ដល់ ពលរដ្ឋ និង១ទៀត ជួយដោយប្រយោល។

លោក គី សុខគីម បានមានប្រសាសន៍យ៉ាងដូច្នេះថា៖

«កម្មវិធីទី១គឺ កម្មវិធីជំនាញខ្ញុំ ដែលរៀនផង ធ្វើការផង ឬក៏រៀនសិនមុននឹងចូលធ្វើការ ដោយបច្ចុប្បន្ន យើងបានសហការជាមួយ​សមាគម​កាត់ដេរ ដែលបានបង្រៀនជូនបងប្អូនចំនួន ២០០០នាក់មកហើយ។ ការដាក់ឱ្យអនុវត្តនូវកម្មវិធីទី១នេះ ក៏ដោយសារតែរោងចក្រត្រូវការកម្លាំងពលកម្មដែលមានជំនាញ ប៉ុន្តែជាក់ស្ដែងអ្នកដែលដាក់ពាក្យធ្វើការ ជាពិសេសពលរដ្ឋដែលត្រឡប់មកពីប្រទេសថៃ មិនមាន​ជំនាញកាត់ដេរ ដូច្នេះពួកគេមានភាពចាំបាច់ក្នុងការឆ្លងកាត់វគ្គបណ្ដុះបណ្ដាលជាមុនសិន»។

សូមជម្រាបថា កម្មវិធីទី២ គឺជាកម្មវិធីបណ្ណជំនាញ ដែលបង្កើតឡើងសម្រាប់អ្នកដែលមិនមានបំណងចង់ធ្វើការ ហើយចង់ប្រកបរបររកស៊ីដោយខ្លួនឯង។ បណ្ណនេះ មានទឹកប្រាក់ ១៥០ ដុល្លារ ដែលពួកគេ​អាចយកទៅរៀនជំនាញអ្វីក៏បាន មិនថាជំនាញ​ទន់ ឬជំនាញបច្ចេកទេស ពោលគឺឱ្យតែអាចជួយដល់ ការរកស៊ីរបស់ពួកគេបាន។

ទី៣ គឺ SDF សហការជាមួយក្រសួង ស្ថាប័នពាក់ព័ន្ធ ជាពិសេសវិស័យឯកជន ដើម្បីដាក់ចេញនូវកម្ម វិធីមួយទៀត ដែលហៅថា «ការទទួលស្គាល់ជំនាញដែលមានស្រាប់»។ កម្មវិធីនេះបង្កើតឡើងដើម្បី ទទួលស្គាល់នូវជំនាញដែលបុគ្គលិកម្នាក់ៗមានស្រាប់ (ជាពិសេសពលរដ្ឋដែលត្រឡប់មកពី​ក្រៅប្រទេស) ដើម្បីបើកផ្លូវឱ្យពួកគេអាចប្រកបការងារ ដោយទទួលបានប្រាក់ខែខ្ពស់។

រីឯទី៤ គឺជាកម្មវិធី «អ្នកដឹកនាំឧស្សាហកម្ម» ដែលកម្មវិធីនេះនឹងចូលរួមជួយដោយប្រយោល ទៅដល់ម្ចាស់សហគ្រាសធុនតូច និងមធ្យម តាមរយៈការតភ្ជាប់ពួកគេជាមួយនឹងសហគ្រាសធុនធំ ដើម្បីឈានទៅពង្រីកខ្សែច្រវ៉ាក់ផលិតកម្មឱ្យកាន់តែមានស្តង់ដារគុណភាពខ្ពស់ជាងមុន និងត្រូវតាមតម្រូវការទីផ្សារ។

កម្មវិធីទី៤នេះ អាចជួយពលរដ្ឋដោយប្រយោលដោយសារតែ ប្រសិនបើសហគ្រាសធុនតូច និងមធ្យមបានពង្រីកចង្វាក់ផលិតកកម្មរបស់ខ្លួន ពួកគេនឹងអាចបង្កើតការងារបានកាន់តែច្រើន ជូនបងប្អូនប្រជាពលរដ្ឋក្នុងស្រុក៕