សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
កំពត ៖ ស្របពេលដែលមាននិន្នាការជាតិនិយម គាំទ្រផលិតផលក្នុងស្រុករបស់ជនរួមជាតិខ្មែរ អាជ្ញាធរខេត្តកំពត បានជំរុញឱ្យមន្ត្រីជំនាញតាមរយៈលេខាធិការដ្ឋាននៃគណៈកម្មាធិការជំរុញចលនាភូមិមួយផលិតផលមួយ (OVOP) ខេត្តកំពត ជំរុញការលើកកម្ពស់ផលិតផលក្នុងស្រុក ពង្រីកទីផ្សារ ជាពិសេសបង្កើនការផលិត ដាំដុះ និងការចិញ្ចឹមសត្វរបស់ប្រជាកសិករប្រកបដោយគុណភាព សុវត្ថិភាព និងបរិមាណច្រើន ដើម្បីរៀបចំផែនការសកម្មឱ្យកាន់តែប្រសើរ ដែលអាចផ្គត់ផ្គង់តម្រូវការទីផ្សារក្នុងស្រុក និងឈានដល់ការនាំចេញ ។
លោក ង៉ែត សាវឿន អនុប្រធានលេខាធិការដ្ឋាននៃគណៈកម្មាធិការជំរុញចលនាភូមិមួយផលិតផលមួយ (OVOP) កាលពីពេលថ្មីៗនេះ បានបង្ហាញពីផែនការសកម្មរបស់ OVOP ក្នុងគោលបំណងលើកកម្ពស់ចលនា និងការផលិត កែច្នៃរបស់បណ្តាសហគ្រាស និងអ្នកផលិតក្នុងស្រុក បង្កើនសង្វាក់ផលិតកម្មប្រកបដោយគុណភាព សុវត្ថិភាព និងបរិមាណ ដើម្បីអាចផ្គត់ផ្គង់តម្រូវការក្នុងស្រុកឱ្យបានគ្រប់គ្រាន់ ខណៈដែលប្រជាជនខ្មែរដែលជាអ្នកប្រើប្រាស់បានងាកមកគាំទ្រផលិតផលខ្មែរគួរជាទីមោទន។
លោកអនុប្រធានលេខាធិការដ្ឋាន បានប្រាប់ឱ្យដឹងថា ដោយអនុវត្តតាមគោលនយយោបាយ និងការណែនាំរបស់រាជរដ្ឋាភិបាល ក៏ដូចជាគណៈកម្មាធិការជាតិជំរុញចលនាភូមិមួយផលិតផលមួយ ជាពិសេសការចង្អុលបង្ហាញពីលោកអភិបាលខេត្តកំពត ក្រុមការងារលេខាធិការដ្ឋានបានជួបជុំគ្នា ធ្វើបច្ចុប្បន្នភាពលើការងារជំរុញចលនាភូមិមួយផលិតផលមួយ និងគ្រោងរៀបចំផែនការឱ្យកាន់តែល្អប្រសើរថែមទៀតដើម្បីប្រាកដថាមានប្រសិទ្ធភាព។
លោក ង៉ែត សាវឿន បានបញ្ជាក់ថា ៖
« យើងនឹងពង្រីកចលនាភូមិមួយផលិតផលមួយ ដើម្បីលើកកម្ពស់ផលិតផលប្រកបដោយគុណភាព និងសុវត្ថិភាពបន្ថែមទៀត ដែលវិធានការនេះនឹងមិនត្រឹមតែផ្គត់ផ្គង់ទីផ្សារក្នុងស្រុកប៉ុណ្ណោះទេ ប៉ុន្តែថែមទាំងកាត់បន្ថយការនាំចូលទំនិញពីប្រទេសជិតខាង ហើយក៏ជាចំណែកមួយដែលអាចទាក់ទាញភ្ញៀវទេសចរបានផងដែរតាមរយៈការបង្ហាញពីសកម្មភាពផលិត កែច្នៃ ដាំដុះ ចិញ្ចឹមសត្វរបស់ប្រជាកសិករក្នុងតំបន់ប្រកបដោយសុវត្ថិភាព»។
បើតាមលោក ស្មាន វណ្ណនិមល សមាជិកលេខាធិការដ្ឋានគណៈកម្មាធិការជំរុញចលនាភូមិមួយ ផលិតផលមួយ ខេត្តកំពត បានឱ្យដឹងថា តាមផែនការរបស់គណៈកម្មាធិការ OVOP ក៏មានគម្រោងរៀបចំវេទិកាផ្គូផ្គងរវាងអ្នកផលិត និងអ្នកទិញ និងការតាំងពិព័រណ៍ផលិតផលក្នុងស្រុកនៅខេត្តកំពត ចាប់ពីថ្ងៃទី២៩ ដល់ថ្ងៃទី៣១ ខែសីហា ឆ្នាំ២០២៥ខាងមុខនេះ។
លោក វណ្ណនិមល បានបញញជាក់ថា ៖
« គណៈកម្មាធិការនឹងពិចារណាលើការចុះបញ្ជីផលិតផលខេត្តកំពតប្រមាណ ២០មុខបន្ថែមទៀតនៅលើការជំរុញចលនាភូមិមួយផលិតផលមួយ ខណៈផលិតផល ៥៧មុខផ្សេងទៀតបានចុះបញ្ជីរួចហើយ»។
ឯកឧត្តមបណ្ឌិត សួង ណយ អគ្គលេខាធិការរង គណៈកម្មាធិការជាតិជំរុញចលនាភូមិមួយផលិតផលមួយ នៃទីស្តីការគណៈរដ្ឋមន្ត្រី បានថ្លែងថា ការរៀបចំវេទិកាផ្គូរផ្គងរវាងអ្នកផលិត និងអ្នកទិញនេះ គឺមានសារៈសំខាន់ណាស់ ដែលមានភាពប្រទាក់ក្រឡាគ្នា តាំងពីកសិដ្ឋានរហូតដល់តុបាយតាំងពីកន្លែងអ្នកផលិត រហូតដល់អ្នកប្រើប្រាស់។
ឯកឧត្តមបណ្ឌិតបានបញ្ជាក់ថា ៖
«វេទិកាផ្គូផ្គងរវាងអ្នកផលិត និងអ្នកទិញមកជួបគ្នាតាំងពីលក្ខណៈគ្រួសារ មីក្រូ តូចនិងមធ្យមដើម្បីឱ្យពួកគាត់មកជួបគ្នារវាងអ្នកផលិតនិងអ្នកទិញ ដោយរយះកាលកន្លងមក អ្នកផលិតថា អត់មានទីផ្សារដល់ពេលអ្នកទិញវិញថា អត់ដឹងទៅទិញផលិតផលនៅឯណា អញ្ចឹងហើយថ្ងៃនេះ គឺជាថ្ងៃវេទិកាផ្គូផ្គងជួបគ្នាដើម្បីរកដំណោះស្រាយ ចំពោះអ្នកទិញត្រូវការអី ហើយអ្នកផលិតមានអីដែរដើម្បីឱ្យគេទិញ»។
ឯកឧត្តមបណ្ឌិត សួង ណយ បានមានប្រសាសន៍ផងដែរថា ដើម្បីឱ្យវេទិកាផ្គូផ្គងរវាងអ្នកផលិត និងអ្នកទិញទទួលបានលទ្ធផលល្អ គឺទាមទារឱ្យមានការសាមគ្គី ឈរលើគោលការណ៍ សុច្ចរិតភាព គុណភាព អនាម័យ និងរក្សាតម្លៃទៅតាមស្តង់ដារតម្លៃទីផ្សារ និងទាមទារឱ្យមានការចូលរួមយ៉ាងសកម្មផងដែរពីក្រសួង អង្គភាពមន្ទីរ ស្ថាប័នពាក់ព័ន្ធ អាជ្ញាធរមូលដ្ឋាន ធ្វើយ៉ាងណាជំរុញឱ្យមានការអភិវឌ្ឍផលិតផលថ្មីៗ ក៏ដូចជាពង្រឹងគុណភាព និងសមត្ថភាពពាណិជ្ជកម្មនៃផលិតផល ដែលមានស្រាប់នេះជាគោលការណ៍គ្រឹះ សំដៅធ្វើឱ្យទទួលបាននូវផលិតផលមានភាពសម្បូរបែប កាត់បន្ថយការនាំចូលទំនិញប្រើប្រាស់មួយចំនួនមកពីប្រទេសជិតខាងផងដែរ។ គាំទ្រ និងទិញផលិតផលខ្មែរ គឺស្នេហាជាតិ !
Account
Security
Favourite Content