បាងកក៖ មនុស្សយន្តវះកាត់ Da Vinci Xi គឺជាដៃមនុស្សយន្តឆ្លាតវៃដែលអាចផ្លាស់ទីដោយឯករាជ្យគ្រប់ទិសដៅ។ វាដូចជាកដៃរបស់មនុស្ស ដែលអនុញ្ញាតឱ្យឧបករណ៍វះកាត់ចូលទៅក្នុងកន្លែងដែលពិបាកទៅដល់បានយ៉ាងល្អ។ គ្រប់ដៃទាំងអស់មានឧប​ក​រ​​ណ៍វះកាត់ និង Endoscope ដើម្បីឱ្យគ្រូពេទ្យវះកាត់មើលឃើញរូបភាពច្បាស់លាស់ និងបកស្រាយលទ្ធផលបានយ៉ាងឆាប់រហ័ស។​

បច្ចេកវិទ្យាទំនើបនេះជួយឲ្យការវះកាត់កាន់តែមានប្រសិទ្ធភាព មានស្នាមវះតូច ការឈឺចាប់តិច ស្លាកស្នាមតិចបំផុត អត្រាឆ្លងទាប ការជាសះស្បើយលឿនជាងមុនជាមួយនឹងការស្នាក់នៅក្នុងមន្ទីរពេទ្យរយៈពេលខ្លី និងផលវិបាកក្រោយការវះកាត់ទាបជាងបើប្រៀបធៀបទៅនឹងការវះកាត់ធម្មតា។

បញ្ញាសិប្បនិមិត្ត(AI) និងការរៀនពីម៉ាស៊ីន(Machinery Learning) នឹងដើរតួយ៉ាងសំខាន់ក្នុងការលើកកម្ពស់ការវះកាត់ដោយមនុស្សយន្ត។ បច្ចេកវិទ្យាទាំងនេះអាចផ្តល់នូវការវិភាគទិន្នន័យតាមពេលវេលាជាក់ស្តែង ព្យាករណ៍ពីផលវិបាកដែលអាចកើតមាន និងផ្តល់ការគាំទ្រការសម្រេចចិត្តដល់គ្រូពេទ្យវះកាត់ធ្វើឱ្យប្រសើរឡើងនូវលទ្ធផលវះកាត់។

មនុស្សយន្ត da Vinci Xi អាចប្រើសម្រាប់វះកាត់លើជំងឺ Thoracic ( មហារីកសួត និងជំងឺក្រពេញទីមុស) ជំងឺតម្រងនោម (Urological) មហារីកក្រពេញប្រូស្តាត ជំងឺពោះ និងជំងឺថ្លើម លំពែង ទឹកប្រមាត់ ក្លនលូន គ្រួសក្នុងប្រមាត់ មហារីកថ្លើម មហារីកលំពែង និងមហារីកប្រមាត់ ព្រមទាំងជំងឺរោគស្ត្រី ដូចជាដុំសាច់ក្នុងស្បូន មហារីកស្បូន ដុំសាច់ស្បូននិងមហារីកស្បូន។

ក្នុងគោលបំណងលើកកម្ពស់ការថែទាំ និងគុណតម្លៃរបស់អ្នកជំងឺ មន្ទីរពេទ្យបាងកក ដែលជាអ្នកផ្តល់សេវាថែទាំសុខភាពឈានមុខគេក្នុងប្រទេសថៃ បានវិនិយោគជាង ២០០លានបាត ដើម្បីបង្កើតមជ្ឈមណ្ឌលវះកាត់មនុស្សយន្តទំនើប ជាពិសេសមនុស្សយន្តវះកាត់ Da Vinci Xi ដែលមានតម្លៃរយលានដុល្លារអាម៉េរិក។

ក្នុងសនិ្នសីទសារព័ត៍មាននៅទីក្រុងបាងកកប្រទេសថៃក្រោមប្រធានបទ “ការវះកាត់ដោយបច្ចេកវិទ្យាថ្មី មនុស្សយន្ត” កាលពីថ្ងៃទី២០ ខែមិថុនា ឆ្នាំ២០២៤ ដែលមានក្រុមវេជ្ជបណ្ឌិតឯកទេសជំនាញៗប្រចាំមន្ទីរពេទ្យ និងអ្នកសារព័ត៍មានមកពីក្នុងស្រុក និងក្រៅប្រទេសច្រើនរូបចូលរួម លោក Ekkit Surakarn នាយករងមន្ទីរពេទ្យបាងកកប្រទេសថៃ បានថ្លែងថា៖ ប្រព័ន្ធវះកាត់ដោយមនុស្សយន្ត Da Vinci xi ជួយឲ្យគ្រូពេទ្យវះកាត់នៅតំបន់ស្មុគស្មាញកាន់តែងាយស្រួល និងផ្តល់នូវរូបភាព3D កាន់តែច្បាស់។

លោកនាយករងមន្ទីរពេទ្យបានលើកឡើងថា ៖

«ចាប់តាំងពីប្រើបច្ចេកវិទ្យានេះ មន្ទីរពេទ្យទទួលបានជោគជ័យលើ ២០០ករណីរួចមកហើយលើការវះកាត់ប្រភេទជំងឺជាច្រើនដូចជាដូចជា ជំងឺ thoracic ( មហារីកសួត និងជំងឺក្រពេញទីមុស ) ជំងឺ urological ( មហារីកក្រពេញប្រូស្តាត និងតម្រងនោម) ជំងឺពោះ ជំងឺថ្លើម លំពែង ទឹកប្រមាត់ គ្រួសក្នុងប្រមាត់ មហារីកថ្លើម មហារីកលំពែង និងមហារីកប្រមាត់ ព្រមទាំងជំងឺរោគស្ត្រី (ដុំសាច់ក្នុងស្បូន មហារីកស្បូន ដុំសាច់ស្បូន និងមហារីកស្បូនជាដើម)»។

លោកបានបញ្ជាក់ថា៖

«មនុស្សយន្តវះកាត់គឺដូចជាកុំព្យូទ័រទំនើប ប៉ុន្តែវាមិនអាចដំណើរការដោយគ្មានការគ្រប់គ្រងរបស់គ្រូពេទ្យបានទេ។ ដូច្នេះហើយគ្រូពេទ្យគ្រប់គ្រងចលនារបស់ដៃមនុស្សយន្តតាមរយៈការបញ្ជាដោយគ្រូពេទ្យវះកាត់មិនបាច់ឈរក្បែរគ្រែអ្នកជំងឺឡើយ»។

លោក Ekkit Surakarn បានបន្តថា៖ គុណប្រយោជន៍ដ៏អស្ចារ្យនៃការព្យាបាលនេះ គឺអ្នកជំងឺមិនប្រឈមការបាត់បង់ឈាមច្រើន រយៈពេលប្រតិបត្តិការវះកាត់ខ្លី ហើយអ្នកជំងឺអាចធ្វើចលនាបានលឿននិងស្នាក់នៅមន្ទីរពេទ្យរយៈពេលខ្លីថែមទៀតផង។ ជាមួយគ្នានោះ ការវះកាត់ដោយប្រើមនុស្សយន្ត Da Vinci xi ជួយឲ្យស្នាមវះតូចជាង ការឈឺចាប់តិច និងផលវិបាកក្រោយការវះកាត់ទាបជាងបើប្រៀបធៀបទៅនឹងការវះកាត់ធម្មតា។

លោកនាយករងមន្ទីរពេទ្យបាងកកបានមានប្រសាសន៍ថា៖

«ចក្ខុវិស័យយុទ្ធសាស្រ្តរបស់មន្ទីរពេទ្យ គឺដើម្បីក្លាយជាមជ្ឈមណ្ឌលព្យាបាលដោយមនុស្សយន្តក្នុងតំបន់អាស៊ីអាគ្នេយ៍ ការព្យាបាលមានកម្រិតខ្ពស់កាន់តែងាយស្រួលសម្រាប់អ្នកជំងឺទូទាំងតំបន់ជាមួយតម្លៃប្រកួតប្រជែង»។

គួរជម្រាបថា នៅក្នុងកម្មវិធីសន្និសីទសារពត៌មានក៏មានការចែករំលែកចំណេះដឹងផ្នែកវេជ្ជសាស្ត្រ និងអំពីការវះកាត់ដោយប្រើមនុស្សយន្ត da Vin Xi ពីវេជ្ជបណ្ឌិតជំនាញវះកាត់ឆ្អឹង វះកាត់ប្រព័ន្ធទឹកនោម វះកាត់ពោះ វះកាត់រោគស្ត្រី និងមហារីកផងដែរ៕