បរទេស ៖ យន្តហោះចម្បាំងទំនើបបំផុត និងតំណាងឲ្យកងកម្លាំងយោធារបស់រុស្ស៊ី Su-57 ត្រូវបានប្រធានប្រតិបត្តិក្រុមហ៊ុនផលិតប្រកាសពីការលក់ទៅឱ្យប្រទេសដទៃជាលើកដំបូងចំនួន២គ្រឿង ប៉ុន្តែមិនបានបញ្ជាក់ពីឈ្មោះថាប្រទេសដែលជាអ្នកបញ្ជាទិញនោះទេ។

យោងតាមការចេញផ្សាយរបស់ The Business Insider បានសរសេរថា ម៉ូដេល Su-57 នេះ គឺជាយន្តហោះចម្បាំងជំនាន់ទី៥ របស់រុស្ស៊ី ហើយក៏ជាគូប្រជែងដ៏សំខាន់ជាមួយយន្តហោះចម្បាំងរបស់អាមេរិក ទាំង F-35 និង F-22ផងដែរ ខណៈដែលកាលពីពេលកន្លងមកនេះកម្លាំងយោធានៃប្រទេសរុស្ស៊ីបានព្យាយាមលាក់បាំងពីចំនួនយន្តហោះចម្បាំងម៉ូដេលនេះខ្លាំងណាស់។

ប្រធានប្រតិបត្តិក្រុមហ៊ុន​​ United Aircraft Corporation ដែលជាអ្នកផលិត Su-57 លោក Vadim Badekha បានថ្លែងប្រាប់ទៅកាន់ទូរទស្សន៍រដ្ឋរុស្ស៊ី Channel One ថា ៖ អតិថិជនជាបរទេសបានទទួលយកយន្តហោះចម្បាំងទំនើបរបស់រុស្ស៊ីទាំងពីរគ្រឿងនោះរួចរាល់ហើយ ដោយយន្តហោះបានដាក់ឲ្យចូលរួមប្រតិបត្តិការ និងការតេស្តសាកល្បងជាមួយនឹងគុណភាពដ៏អស្ចារ្យរបស់វា ហើយពួកគេពិតជាពេញចិត្តជាមួយនឹងបច្ចេកវិទ្យារបស់Su-57យ៉ាងខ្លាំង។

ទោះជាយ៉ាងណាក្តី លោក Badekha មិនបានបង្ហាញឈ្មោះប្រទេសដែលជាអ្នកបញ្ជាទិញ Su-57 ទាំងពីរគ្រឿងនោះទេ ខណៈកាលពីឆ្នាំ២០២៤ ក្រុមហ៊ុនដែលជាអ្នកនាំចេញអាវុធរបស់ប្រទេសរុស្ស៊ី Rosoboronexport ធ្លាប់បានបង្ហើបថា រុស្ស៊ីបានចុះកិច្ចព្រមព្រៀងក្នុងការលក់ Su-57 ទៅឲ្យបរទេសពិតមែន ប៉ុន្តែមិនបានប្រកាសអំពីឈ្មោះរបស់ប្រទេសនោះដែរ។ ដោយឡែក កាលពីខែកុម្ភៈ ឆ្នាំ២០២៥ រដ្ឋាភិបាលប្រទេសអាហ្ស៊េរី បានបញ្ជាទិញ Su-57 ពីរុស្ស៊ី ហើយថែមទាំងបានបញ្ជូនមន្ត្រីជំនាញទៅទទួលការបណ្តុះបណ្តាលហោះហើរយន្តហោះនេះផងដែរ។

គួរឲ្យដឹងដែរថា ក្នុងជំនាន់ជាមួយគ្នានេះគេសង្កេតឃើញថា មានតែយន្តហោះចម្បាំងអាម៉េរិក F-35 Lighting II និង F-22 ព្រមទាំងយន្តហោះរបស់ចិន J-20 និង J-35 ប៉ុណ្ណោះ ដែលមានកម្រិតទំនើបប្រហាក់ប្រហែលគ្នាទៅនឹង Su-57 ទាំងបច្ចេកវិទ្យា និងសមត្ថភាពឌីជីថល ហើយរហូតមកដល់បច្ចុប្បន្ននេះ រុស្សីផលិតយន្តហោះចម្បាំង Su-57 បានចន្លោះពី ២០ ទៅ ២៤គ្រឿងប៉ុណ្ណោះ ដោយក្នុងនោះ រដ្ឋមន្ត្រីការពារជាតិរុស្ស៊ីធ្លាប់បានលើកឡើងថា រុស្ស៊ី នឹងមានប្រតិបត្តិការយន្តហោះចម្បាំងប្រភេទនេះយ៉ាងហោចណាស់ ២២គ្រឿងនៅត្រឹមឆ្នាំ២០២៤៕