បរទេស ៖ យោងទៅតាមប្រភពព័ត៌មានពី Weforum បានរាយការណ៍ថា សង្គ្រាមរវាងរុស្ស៊ី-អ៊ុយក្រែនបានជះឥទ្ធិពលយ៉ាងខ្លាំងទៅលើទីផ្សារថាមពលពិភពលោក ដូចជាការប្រែប្រួលតម្លៃ កង្វះការផ្គត់ផ្គង់ថាមពល បញ្ហាសន្តិសុខ និងភាពមិនប្រាកដប្រជានៃសេដ្ឋកិច្ច។ នេះគឺជារឿងចំនួន៦ដែលបង្ហាញពីការផ្លាស់ប្តូរសំខាន់ៗនៅក្នុងវិស័យថាមពលដែលរងផលប៉ះពាល់ពីសង្គ្រាម។

ចំណុចទី១ គឺការឡើងថ្លៃខ្លាំងនៃតម្លៃថាមពល ដោយតម្លៃ​ប្រេងឡើង​ខ្ពស់​ដល់ ៩០ ភាគរយនៃ​ការ​ឡើងថ្លៃជា​មធ្យម​ក្នុង​ការ​ផលិត​អគ្គិសនី​នៅ​ទូទាំង​ពិភពលោក។ គួបផ្សំទាំងការរាតត្បាតជាសកផង និងវិបត្តិថាមពលផង បានធ្វើឲ្យមនុស្សប្រហែល ៧០ លាននាក់មិនមានលទ្ធភាពទិញអគ្គិសនីមកប្រើប្រាស់ និងឥន្ធនៈស្អាតបានទៀតទេ ហើយពួកគេបានត្រលប់ទៅប្រើប្រាស់ជីវម៉ាស់វិញ។ យ៉ាងណាមិញមនុស្សមួយចំនួនគិតថា តម្លៃឥន្ធនៈហ្វូស៊ីលថ្លៃ គឺជាមូលហេតុមួយដែលបង្កើនល្បឿនឆ្ពោះទៅរកជម្រើសប្រកបដោយនិរន្តរភាព ដោយសារមនុស្សមិនសូវប្រើប្រាស់ខ្លាំង។

ចំណុចទី២ គឺការផ្លាស់ប្តូរលំហូរពាណិជ្ជកម្ម និងកង្វះការផ្គត់ផ្គង់ ដោយសាររុស្ស៊ីបានកាត់បន្ថយលំហូរហ្គាសទៅកាន់សហភាពអឺរ៉ុបប្រហែល ៨០ ភាគរយតាំងពីខែឧសភាកន្លងមកម្ល៉េះ។ បញ្ហានេះបានបង្កឱ្យប្លុកនេះមានការខ្វះខាតយ៉ាងខ្លាំងសម្រាប់តម្រូវការថាមពលក្នុងប្រទេសរបស់ពួកគេ និងចាំបាច់ត្រូវរកជម្រើសផ្គត់ផ្កង់ថាមពលពីកន្លែងផ្សេងទៀតដែលមានតម្លៃថ្លៃជាង។ ស្របពេលដែលដៃគូអន្តរជាតិជាច្រើនកាត់ផ្តាច់ទំនាក់ទំនងជាមួយរុស្ស៊ី ប៉ុន្តែប្រទេសនេះនៅតែរក្សាបាននូវការផលិតយ៉ាងទូលំទូលាយ និងបង្កើនការនាំចេញថាមពលរបស់ខ្លួនទៅកន្លែងផ្សេងៗទៀតរួមមាន ចិន ឥណ្ឌា និងតួកគី។

ចំណុចទី៣ គឺការផ្លាស់ប្តូរគោលនយោបាយថាមពល​ ដែលមានន័យថា ប្រទេសដែលរងផលប៉ះពាល់ត្រូវតែប្រមូលផ្តុំគ្នាយ៉ាងឆាប់រហ័សដើម្បីបង្កើតគោលនយោបាយថាមពលថ្មី ដែលមិនត្រឹមតែផ្តល់អាទិភាពដល់សន្តិសុខថាមពលរយៈពេលវែងប៉ុណ្ណោះទេ ប៉ុន្តែថែមទាំងអនុញ្ញាតឱ្យតម្រូវការថាមពលដែលមានស្រាប់ត្រូវបានប្រើប្រាស់ក្នុងរយៈពេលខ្លីផងដែរ។ រដ្ឋាភិបាលនានាក៏កំពុងបង្កើតប្រតិបត្តិការដែលអាចជឿទុកចិត្តបានដល់ការបំភាយឧស្ម័នសូន្យនៅឆ្នាំ២០៥០ ដូច្នេះបញ្ហាដែលកើតឡើងដោយវិបត្តិថាមពលបច្ចុប្បន្នចាំបាច់ត្រូវដោះស្រាយ។ 

ចំណុចទី៤ គឺវិបត្តិថាមពលបានផ្តល់ផលប៉ះពាល់ដល់សេដ្ឋកិច្ច ដោយសារការឡើងថ្លៃតម្លៃថាមពលបានជំរុញឱ្យតម្លៃទំនិញ និងសេវាកម្មឡើងថ្លៃផងដែរ។ អត្រាការប្រាក់ខ្ពស់ពីធនាគារកណ្តាលគួបផ្សំនឹងការធ្លាក់ចុះនៃប្រាក់ចំណូលប្រចាពលរដ្ឋកំពុងជំរុញពិភពលោកឆ្ពោះទៅរកវិបត្តិសេដ្ឋកិច្ច ហើយចំនួនមនុស្សដែលធ្លាក់ចូលទៅក្នុងភាពក្រីក្រខ្លាំងវិញកំពុងកើនឡើងដូចគ្នា។ ជាមួយគ្នានេះ ស្របពេលដែលប្រទេសជាច្រើនកំពុងស្វែងរកដំណោះស្រាយដើម្បីទប់ទល់នឹងអតិផរណា ប៉ុន្តែគម្រោងថាមពលស្អាតចាំបាច់ទាមទារហិរញ្ញប្បទានខ្ពស់ ដែលអាចបណ្តាលឲ្យជាប់ក្នុងវិបត្តិសេដ្ឋកិច្ច។

ចំណុចទី៥ គឺវិបត្តិថាមពលបានប៉ះពាល់ដល់ការបំភាយឧស្ម័ន។ ប្រទេសខ្លះកំពុងពន្លឿនគោលដៅបំភាយឧស្ម័ន ខ្លះទៀតកំពុងបង្កើនការប្រើប្រាស់ធ្យូងថ្ម ហើយប្រទេសខ្លះទៀតកំពុងធ្វើរៀងទាំងពីរក្នុងពេលតែមួយ។ ផលប៉ះពាល់រយៈពេលវែងនៃវិបត្តិថាមពលលើការបំភាយឧស្ម័នគឺមិនច្បាស់លាស់ ហើយមនុស្សជាច្រើនមានការព្រួយបារម្ភអំពីផលប៉ះពាល់លើផែនការបំភាយឧស្ម័នសុទ្ធត្រឹមឆ្នាំ២០៥០។ ទោះបីជាយ៉ាងណាក្តី ការបំភាយឧស្ម័ន CO2 បានកើនឡើងនៅឆ្នាំ២០២២ ដោយសារការកើនឡើងយ៉ាងឆាប់រហ័សនៃថាមពលកកើតឡើងវិញ និងការប្រើប្រាស់រថយន្តអគ្គិសនី។ ចំណុចទី៦ ការជំរុញឆ្ពោះទៅរកការកកើតឡើងវិញមានភាពមិនច្បាស់លាស់។ ទំនាក់ទំនងរង្គោះរង្គើររវាងរុស្ស៊ី និងអ្នកទិញថាមពលរបស់ខ្លួនបាននាំឱ្យមានការប៉ះពាល់យ៉ាងខ្លាំងដល់សន្តិសុខថាមពល។ ស្របពេលនេះដែរ ទស្សនវិស័យសេដ្ឋកិច្ចអវិជ្ជមាន និងគោលនយោបាយរយៈពេលខ្លី ដើម្បីធានាថាមពលសម្រាប់តម្រូវការនាពេលបច្ចុប្បន្ននេះ អាចបន្ថយល្បឿនក្នុងការជំរុញឆ្ពោះទៅរកការកកើតឡើងវិញ៕