ភ្នំពេញ៖  អ្នកជំនាញសេដ្ឋកិច្ចបានធ្វើការកត់សម្គាល់ឃើញថា ការដាក់តាំងបង្ហាញ និងសែនព្រេនភោគផលកសិកម្មក្នុងឱកាសស្វាគមន៍ទទួលទេវតាឆ្នាំថ្មីប្រពៃណីជាតិខ្មែរកន្លងទៅថ្មីៗនេះ បានបង្ហាញយ៉ាងច្បាស់​ណាស់​ថា ប្រជាពលរដ្ឋកម្ពុជា ជាពិសេសប្រជាកសិករបានទទួលផលពីការធ្វើកសិកម្មបានយ៉ាងល្អ ខណៈដែលសង្ក្រាន្តឆ្នាំនេះ ប្រជាពលរដ្ឋនៅទូទាំងប្រទេសបានចូលរួមយ៉ាងអធិកធម។

ជាការគួរឱ្យកត់សម្គាល់ សម្រាប់ការចូលរួមរីករាយនៅក្នុងសង្ក្រាន្តឆ្នាំថ្មីប្រពៃណីជាតិខ្មែរឆ្នាំ២០២៣នេះ គេសង្កេតឃើញថា ប្រជាពលរដ្ឋទូទាំងប្រទេសបានចូលរួមយ៉ាងសប្បាយរីករាយ ដែលក្នុងនោះមិនថាទោះជានៅទីក្រុង ឬទីជនបទ សុទ្ធតែបានរៀបចំរណ្តាប់បន្លែ ផ្លែឈើ និងភោគផលកសិកម្មយ៉ាងច្រើន ដើម្បីស្វាគមន៍ទទួលទេវតាឆ្នាំថ្មី។

លោកបណ្ឌិត ហុង វណ្ណៈ ប្រធាននាយកដ្ឋានសេដ្ឋកិច្ចអន្តរជាតិ នៃវិទ្យាស្ថានទំនាក់ទំនងអន្តរជាតិនៃរាជ​បណ្ឌិត្យសភាកម្ពុជា បានលើកឡើងថា ៖ ប្រជាពលរដ្ឋប្រើប្រាស់អនុផលព្រៃឈើ និងផល្លានុផល កសិផលផ្សេងៗជាច្រើន ក្នុងអំឡុងពេលចូលឆ្នាំថ្មីប្រពៃណីជាតិខ្មែរ គឺជាការបង្ហាញនូវភោគផលកសិកម្មល្អ ដែលកសិករទទួលបានពីការធ្វើកសិកម្មរបស់ខ្លួន។

១- សង្គមវប្បធម៌ ៖ សារបាននៃវប្បធម៍ខ្មែរ ទាក់ទងបុណ្យចូលឆ្នាំ ការដាក់តាំងភោគផលផល្លានុផលកសិកម្ម​ ដែលប្រជាជនក្នុងស្រុកយើងបានដាំដុះ។ ការប្រើប្រាស់នូវផលិតផលដាំដុះដោយកសិករក្នុងស្រុកអាចជាការរួមចំណែកលើកទឹកចិត្តក្នុងជីវភាព ការហូបចុកប្រចាំថ្ងៃ និងសម្រាប់តម្រូវការក្នុងពិធីបុណ្យ​ មានអត្ថប្រយោជន៍ច្រើនក្នុងសកម្មភាពសេដ្ឋកិច្ចសហគមន៍ និងសង្គម ។

២- ទិដ្ឋភាពសេដ្ឋកិច្ច ៖ គេមិនអាចទប់ស្កាត់ការវិវត្តនៃកិច្ចសហប្រតិបត្តិការទ្វេភាគីរវាងប្រទេសក្នុងតំបន់ និងពិភពលោកបាននោះទេ ជាពិសេសផ្នែកទំនើបកម្មកសិកម្ម និងតម្រូវនូវការដោះដូរ ក៏ដូចជាការនាំចូល។ និយាយជារួម វាមានផលប្រយោជន៍ទាំងសងខាង។ ចរន្តនេះជៀសមិនផុតនៃការវិវឌ្ឍវិស័យកសិកម្ម រំហូរនៃផលិតផល ដែលនាំចូល នាំចេញ ជាផ្នែកពាណិជ្ជកម្ម ជាការស្វែងរកនូវរូបិយប័ណ្ណបរទេស ក្នុងការចាក់ចូលក្នុងសេដ្ឋកិច្ច ដែលជួយជំរុញដល់ការរីកចម្រើនសេដ្ឋកិច្ចលឿន និងរហ័ស ជាពិសេស ជាសមិទ្ធផលវិជ្ជមានដែលទទួលបានពីការវិនិយោគពីបរទេសផងដែរ ។

បណ្ឌិត ហុង វណ្ណៈ ក៏បានគូសបញ្ជាក់ដែរថា ៖

“យោងតាម RCEP និងកិច្ចព្រមព្រៀងពាណិជ្ជកម្មនានា យើងនឹងទទួលបានភាពធន់ដ៏រឹងមាំ ដែលយើងអាចនាំចេញបាននូវអ្វីដែលយើងធ្វើបានទៅកាន់បរទេស ទាំងផលិតកម្មកសិកម្ម យើងផលិតបាន និងធានាបាននូវនិរន្តរភាពនៃកិច្ចពាណិជ្ជកម្មអន្តរជាតិ”

សូមបញ្ជាក់ថា ក្នុងទិវាជាតិលើកកម្ពស់ការប្រើប្រាស់ផលិតផលខ្មែរលើកទី៦ កាលពីថ្ងៃទី៩ ខែមេសា ឆ្នាំ២០​២៣​ ឯកឧត្តម យឹម ឆៃលី ឧបនាយករដ្ឋមន្រ្តី ប្រធានគណៈកម្មាធិការជាតិជំរុញចលនាភូមិមួយផលិតផលមួយ ក៏បានលើកឡើងអំពីទិវាជាតិ ដែលជ្រើសរើសយកខែមេសាជារៀងរាល់ឆ្នាំ សម្រាប់ប្រារព្ធការលើកកម្ពស់ការប្រើប្រាស់ផលិតផលខ្មែរ ពីព្រោះជារដូវកាលដែលបងប្អូនប្រជាជនរីករាយក្នុងការរៀបចំបុណ្យចូលឆ្នាំប្រពៃណីជាតិផង និងជាឱកាសជួបជុំញាតិមិត្តបងប្អូន ឪពុកម្តាយ ជីដូនជីតា និងនាំគ្នាទៅវត្តប្រគេនចង្ហាន់ ទេយ្យ​ទាន ទេយ្យវត្ថុ និងគ្រឿងឧបភោគបរិភោគផ្សេងៗថ្វាយព្រះសង្ឃ ដែលជាប្រពៃណីបរមបុរាណរបស់ប្រជាជនខ្មែរ។

ឯកឧត្តម យឹម ឆៃលី ឧបនាយករដ្ឋមន្រ្តី បានលើកឡើងថា ជាគោលដៅរួម គឺជួយជំរុញដល់ប្រជាជនខ្មែរក្នុងស្រុក មានភាពសប្បាយរីករាយក្នុងការដើរទស្សនាពិព័រណ៍ផលិតផលចម្រុះដ៏សម្បូរបែបរបស់បងប្អូនផលិតករខ្មែរដែលបានយកមកតាំងបង្ហាញ និងលក់ ហើយនាំគ្នាទិញ ផលិតផលខ្មែរ សម្រាប់កម្មវិធីបុណ្យចូលឆ្នាំប្រពៃណីជាតិ និងទិញជាទៀងទាត់សម្រាប់ការប្រើប្រាស់ប្រចាំថ្ងៃ ដែលអាចជំរុញការពង្រីកទីផ្សារក្នុងស្រុកឱ្យបានកាន់តែទូលំទូលាយ៕