បរទេស​៖​ យោងតាមប្រភពព័ត៌មានពី CNA បានរាយការណ៍ថា កោះតៃវ៉ាន់ នឹងសាងសង់ប្រព័ន្ធការពារដែនអាកាសមានឈ្មោះថា “T-Dome” ដើម្បីការពារការគំរាមកំហែងពីសត្រូវ ជាពិសេសប្រទេសចិន។

កាលពីថ្ងៃសុក្រ សប្ដាហ៍កន្លងទៅនេះ ប្រធានាធិបតីកោះតៃវ៉ាន់ លោក Lai Ching-te បានបង្ហើបថា រដ្ឋាភិបាលនឹងសាងសង់ប្រព័ន្ធការពារដែនអាកាស “T-Dome” ដើម្បីធ្វើជារបាំងការពារ និងប្រឆាំងទៅនឹងការគំរាមកំហែងរបស់សត្រូវ ជាមួយនឹងការអំពាវនាវឱ្យចិនបោះបង់ចោលនូវបំណងប្រើប្រាស់កងកម្លាំងយោធាដើម្បីដណ្តើមកាន់កាប់កោះតៃវ៉ាន់។ សូមជម្រាបថា ក្នុងរយៈពេលជាច្រើនឆ្នាំំមកនេះ កោះតៃវ៉ាន់ បានបង្កើនការចំណាយលើវិស័យការពារជាតិ និងធ្វើទំនើបកម្មកងកម្លាំងប្រដាប់អាវុធរបស់ខ្លួនជាបន្តបន្ទាប់ ប៉ុន្តែនៅតែប្រឈមមុខនឹងការដាក់សម្ពាធពីប្រទេសចិនដែលមានកម្លាំងលើវិស័យយោធាយ៉ាងធំធេង ខណៈដែលខ្លួនក៏កំពុងព្យាយាមផលិតអាវុធទំនើបៗបន្ថែមទៀត ដូចជា យន្តហោះចម្បាំងបំបាំងកាយ នាវាផ្ទុកយន្តហោះ និងកាំជ្រួចជាច្រើនប្រភេទ។

ប្រធានាធិបតីកោះតៃវ៉ាន់ លោក Lai Ching-te បាននិយាយនៅក្នុងសុន្ទរកថានាថ្ងៃបុណ្យជាតិថា តៃវ៉ាន់ ប្តេជ្ញាចំណាយបន្ថែមទៀតលើវិស័យការពារជាតិ និងមានគម្រោងស្នើថវិកាពិសេសបន្ថែមទៀតនៅចុងឆ្នាំនេះសម្រាប់ការចំណាយលើយោធា ដែលបង្ហាញពីការប្តេជ្ញាចិត្តរបស់រដ្ឋាភិបាលក្នុងកិច្ចការពារដែនកោះមួយនេះ។

ប្រធានាធិបតីរូបនេះ បាននិយាយថា ៖

«ការបង្កើនខ្ទង់ចំណាយលើវិស័យការពារជាតិមានគោលបំណងមួយ គឺភាពចាំបាច់ក្នុងការទប់ទល់នឹងការគំរាមកំហែងរបស់សត្រូវ និងជាកម្លាំងជំរុញសម្រាប់ការអភិវឌ្ឍវិស័យការពារជាតិរបស់យើង។ យើងនឹងពន្លឿនការកសាង T-Dome ដែលជាប្រព័ន្ធការពារដែនអាកាសយ៉ាងរឹងមាំសម្រាប់តៃវ៉ាន់ ជាមួយនឹងការការពារច្រើនស្រទាប់ ការចាប់សញ្ញាមានកម្រិតខ្ពស់ និងការស្ទាក់ចាប់មីស៊ីលប្រកបដោយប្រសិទ្ធភាព ដើម្បីការពារអាយុជីវិត និងទ្រព្យសម្បត្តិរបស់ពលរដ្ឋតៃវ៉ាន់។ ចិនគួរតែបោះបង់ចោលការប្រើប្រាស់កម្លាំង ឬការបង្ខិតបង្ខំនៅទូទាំងច្រកសមុទ្រតៃវ៉ាន់។ បើក្រឡេកមើលទៅក្រោយ បន្ទាប់ពីចប់សង្គ្រាមលោកលើកទី ២ យើងឃើញថា មនុស្សជាច្រើនបានឆ្លងកាត់ការឈឺចាប់នៃសង្រ្គាម និងការឈឺចាប់នៃការឈ្លានពានទឹកដី។ យើងគួរតែរៀនពីមេរៀនទាំងនេះ ហើយធានាថាសោកនាដកម្មនៃប្រវត្តិសាស្ត្រមិនកើតឡើងម្តងទៀត»។

យ៉ាងណាមិញ  ប្រធានាធិបតី Lai មិនបានផ្តល់ព័ត៌មានលម្អិតអំពី T-Dome នោះទេ ប៉ុន្តែគេសង្ស័យថា ប្រព័ន្ធនេះស្រដៀងនឹង Iron Dome របស់អ៊ីស្រាអែល។ បច្ចុប្បន្ននេះ ប្រព័ន្ធការពារដែនអាកាសដែលមានស្រាប់របស់កោះតៃវ៉ាន់ជាចម្បងផ្អែកលើមីស៊ីល Patriot ដែលផលិតដោយសហរដ្ឋអាម៉េរិក និងមីស៊ីល Sky Bow ដែលផលិតដោយតៃវ៉ាន់។ កាលពីខែមុន កោះតៃវ៉ាន់បានបង្ហាញកាំជ្រួចការពារដែនអាកាសថ្មីបំផុតរបស់ខ្លួននៅឯពិព័រណ៍អាវុធដ៏ធំមួយក្នុងទីក្រុងតៃប៉ិ ដែលត្រូវបានរចនាឡើងដើម្បីស្ទាក់ចាប់មីស៊ីលផ្លោងកម្រិតមធ្យម និងទៅដល់ដែនអាកាសបានខ្ពស់ជាង Patriots៕