ភ្នំពេញ៖ យោងតាមរបាយការណ៍ពីអគ្គនាយកដ្ឋានគយ និងរដ្ឋាករកម្ពុជា (GDCE) បានបង្ហាញថា ពាណិជ្ជកម្មរបស់កម្ពុជាជាមួយដៃគូអន្តរជាតិក្នុងរយៈពេល ៩ ខែនៃឆ្នាំ២០២៥ បានឈានដល់ ៤៦.៩៩ពាន់លានដុល្លារអាម៉េរិក កើនឡើង ១៤,៨ ភាគរយបើធៀបនឹងរយៈពេលដូចគ្នាកាលពីឆ្នាំ២០២៤ ដែលមានត្រឹម ៤០ ពាន់លានដុល្លារអាម៉េរិកប៉ុណ្ណោះ ដោយក្នុងនោះ កម្ពុជាបាននាំចេញទំនិញមានតម្លៃ ២២,៣៨ ពាន់លានដុល្លារអាម៉េរិក កើនឡើង ១២,៩ ភាគរយ ខណៈការនាំចូលមានទឹកប្រាក់សរុប ២៤,​៦១ ពាន់លានដុល្លារអាម៉េរិក កើនឡើង ១៦,៦ ភាគរយ។

ជាមួយនឹងការទទួលបានកំណើននៃទំហំពាណិជ្ជកម្មរបស់កម្ពុជាដូចបានបង្ហាញជូននៅខាងលើនេះ ឯកឧត្តម ប៉ែន សុវិជ្ជា រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានលើកឡើងពីតួនាទីនៃកិច្ចព្រមព្រៀងពាណិជ្ជកម្មសេរី (FTAs) ជាមួយប្រទេសចិន សាធារណរដ្ឋកូរ៉េ និងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ក្នុងការបើកឱកាសទីផ្សារថ្មីសម្រាប់ផលិតផលកម្ពុជា។

ឯកឧត្តម ប៉ែន សុវិជ្ជា បានមានប្រសាសន៍ថា៖

«ការអនុវត្ត FTAs ​​និងការអនុគ្រោះទៅលើការធ្វើពាណិជ្ជកម្មរបស់ប្រទេសទាំងនេះ បានដើរតួនាទីយ៉ាងសំខាន់ក្នុងការជំរុញការនាំចេញផលិតផល ដែលផលិតនៅប្រទេសកម្ពុជា។ ជាក់ស្ដែង នៅក្នុងឆ្នាំនេះ បើទោះជាមានភាពប្រឈមផ្នែកសេដ្ឋកិច្ចពិភពលោកក៏ដោយ ក៏កំណើនការនាំចេញរបស់កម្ពុជានៅតែមានប្រកបដោយការប្រកួតប្រជែងខ្ពស់នៅក្នុងទីផ្សារបរទេស។ ចំណែកដៃគូពាណិជ្ជកម្មសំខាន់ៗរបស់កម្ពុជា រួមមាន ចិន សហរដ្ឋអាម៉េរិក វៀតណាម ជប៉ុន និងកាណាដា ដែលសុទ្ធសឹងតែមើលឃើញពីកំណើននៃការនាំចេញគួរឲ្យកត់សម្គាល់»។

បើតាមរបាយការណ៍អគ្គនាយកដ្ឋានគយ​ និងរដ្ឋាករកម្ពុជា បានបង្ហាញថា សម្រាប់ការនាំចេញរបស់កម្ពុជាក្នុងរយៈពេល៩ខែកន្លងទៅនេះ សហរដ្ឋអាម៉េរិក ឈរនៅលំដាប់ទី១ ជាមួយនឹងទំហំ ៩.២ពាន់លានដុល្លារ កើនឡើង២២%។ បន្ទាប់មក គឺវៀតណាម ឈរនៅលំដាប់ទី២ មានតម្លៃ ២.៩ពាន់លានដុល្លារ កើនឡើង៧.៨%។ ចំណែកប្រទេសចិន ឈរនៅលំដាប់ទី៣ មានទំហំជាង ១ពាន់លានដុល្លារ, ជប៉ុន មានទំហំជាង ១ពាន់លានដុល្លារ, អេស្ប៉ាញ ជាង ៨៧៥លានដុល្លារ, និងបណ្តាប្រទេសសំខាន់ៗមួយចំនួនទៀត ដូចអង់គ្លេស ថៃ បារាំង បែលហ្ស៊ិក អ៊ីតាលី កូរ៉េខាងត្បូង ម៉ិកស៊ិក អូស្ត្រាលីជា​ដើម។

ចំពោះមុខទំនិញសំខាន់ៗដែលកម្ពុជានាំចេញភាគច្រើនដូចជា ​សម្លៀកបំពាក់ វត្ថុធ្វើអំពីស្បែក បរិក្ខារធ្វើពីរោមសត្វ គ្រឿងប្រដាប់សម្រាប់ការធ្វើដំណើរ ស្បែកជើង កាបូបដៃ វត្ថុសម្រាប់វេចខ្ចប់ ​ធញ្ញជាតិ​ កៅស៊ូ និងកង់ នៅតែមានតម្រូវការ។ បន្ថែមពីនេះ ការនាំចេញផ្សេងទៀតរួមមាន គ្រឿងអេឡិចត្រូនិក គ្រឿងបន្លាស់រថយន្ត គ្រឿងសង្ហារឹម​ ម៉ាស៊ីន និងឧបករណ៍អគ្គិសនី និងបំណែកភាគរបស់ឧបករណ៍អគ្គិសនី និងផលិតផលកសិកម្ម ដូចជាអង្ករ ផ្លែឈើ និងគ្រាប់ស្វាយចន្ទី។

សូមជ្រាបថា កម្ពុជា គឺជាប្រទេសហត្ថលេខីនៃតំបន់ពាណិជ្ជកម្មសេរីអាស៊ាន កិច្ចព្រមព្រៀងពាណិជ្ជកម្មសេរីអាស៊ាន+១ ជាមួយដៃគូសន្ទនា RCEP និង FTAs ​​ទ្វេភាគីជាមួយប្រទេសចិន កូរ៉េខាងត្បូង និងអារ៉ាប់រួម៕