សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ស្ថានភាពតានតឹងនៅច្រកសមុទ្រកោះតៃវ៉ាន់ ជាមួយវត្តមាននៃកម្លាំងកងទ័ពជើងទឹកចិនកាលពីសប្តាហ៍មុននោះបានស្ងប់ស្ងាត់ទៅវិញហើយ ប៉ុន្តែនៅដើមសប្តាហ៍នេះ កោះតៃវ៉ាន់ បានបញ្ចេញសាច់ដុំទៅវិញតាមរយៈការទទួលបានរថក្រោះខ្នាតយក្ស និងទំនើបបំផុតពីសហរដ្ឋអាមេរិករហូតទៅដល់ ៣៨គ្រឿង។
រថក្រោះម៉ូដែលប្រយុទ្ធជួរមុខរបស់អាមេរិកត្រូវបានប្រគល់ជូនរដ្ឋាភិបាលកោះតៃវ៉ាន់កាលពីថ្ងៃចន្ទក្រោយការទន្ទឹងរង់ចាំ និងបញ្ជាទិញអស់រយៈពេលជាច្រើនឆ្នាំ។ សហរដ្ឋអាមេរិក គឺជាសម្ព័ន្ធមិត្តចាក់ទឹកមិនលិចជាមួយនឹងកោះតៃវ៉ាន់ ហើយក៏ជាអ្នកដែលតែងតែធ្វើសកម្មភាពផ្តល់ជំនួយ និងលក់សព្វាវុធច្រើនជាងគេបំផុតរបស់ដែនកោះដែលស្ថិតនៅក្រោមការទាមទារពីសំណាក់រដ្ឋាភិបាលទីក្រុងប៉េកាំងនេះដែរ។
រថក្រោះ Abrams tank ម៉ូដែល M1A2 ទាំង៣៨គ្រឿងគឺជាកញ្ចប់ដំបូងនៃការបញ្ជាទិញសរុប១០៨គ្រឿងពីអាមេរិកតាំងតែពីឆ្នាំ២០១៩ ដោយវាបានដឹកជញ្ជូនមកដល់ដែនដីកោះតៃវ៉ាន់ទាំងពាក់កណ្តាលយប់ថ្ងៃអាទិត្យ ហើយត្រូវបានបញ្ជូនបន្តភ្លាមៗទៅកាន់មូលដ្ឋានទ័ពសម្រាប់ការហ្វឹកហាត់យោធានៅ Hsinchu ស្ថិតនៅភាគខាងត្បូងនៃទីក្រុងតៃប៉ិ។
មន្ត្រីយោធានៃកោះតៃវ៉ាន់បានថ្លែងប្រាប់ទៅកាន់ក្រុមអ្នកកាសែតថា រថក្រោះ M1A2 គឺជារថក្រោះថ្មីបំផុតក្នុងប្រវត្តិសាស្ត្ររបស់កោះតៃវ៉ាន់ដែលបានទទួលក្នុងរយៈពេល៣០ឆ្នាំចុងក្រោយនេះ ខណៈដែលក្នុងជួរទ័ពរថក្រោះរបស់កោះតៃវ៉ាន់បច្ចុប្បន្នមានរថក្រោះដែលផលិតក្នុងស្រុក CM 11Brave Tiger និងរថក្រោះផលិតនៅអាមេរិកម៉ូដែល M60A3 សរុបចំនួនប្រមាណជាជាង ១០០០គ្រឿង។
គួរឲ្យដឹងដែរថា M1A2 នេះគឺជាម៉ូដែលរថក្រោះសម្រាប់ប្រយុទ្ធជួរមុខរបស់កងទ័ពអាមេរិក និងជារថក្រោះស្ថិតនៅក្នុងបញ្ជីនៃកំពូលរថក្រោះមានទំងន់ធ្ងន់បំផុតរបស់ពិភពលោកផងដែរ។
ថ្លែងទៅកាន់អ្នកយកព័ត៌មានរបស់កាសែត AFP មន្ត្រីយោធាកោះតៃវ៉ាន់បានបញ្ជាក់ដែរថា រដ្ឋាភិបាលទីក្រុងតៃប៉ិ បានធ្វើការបញ្ជាទិញរថក្រោះដ៏ទំនើបនេះចំនួន ១០៨គ្រឿងក្នុងតម្លៃកុងត្រាដល់ទៅ ១,២ពាន់លានដុល្លារ ហើយតាមផែនការរថក្រោះដែលនៅសេសសល់នឹងបន្តដឹកជញ្ជូនមកដល់កោះតៃវ៉ាន់ជាបន្តបន្ទាប់ក្នុងឆ្នាំ២០២៥ និង ២០២៦ខាងមុខនេះ៕
Account
Security
Favourite Content