សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ អត្ថបទស្រាវជ្រាវមួយដែលត្រូវបានធ្វើឡើងដោយ The Motley Fool ដែលជាអ្នកជំនាញផ្តល់ទិន្នន័យវិភាគបែបវិនិយោគ និងហិរញ្ញវត្ថុ មានបទពិសោធជិត៣០ឆ្នាំរបស់សហរដ្ឋអាម៉េរិកបានសរសេរថា សង្គ្រាមត្រជាក់បានចាប់ផ្តើមសាជាថ្មីហើយនៅប្លុកអឺរ៉ុប។ តាមរយៈចំណងជើងអត្ថបទមួយនេះបានរៀបរាប់អំពីផែនការទិញមីស៊ីលប្រមាណជា៨០០គ្រាប់របស់រដ្ឋាភិបាលអាល្លឺម៉ង់ជាមួយនឹងប្រាក់ដល់ទៅជិត៤ពាន់លានដុល្លារ។ The Motley Fool បានលើកឡើងថា ឥទ្ធិពលនៃសង្គ្រាមត្រជាក់លើកនេះមិនត្រឹមតែសម្រាប់ប្រវត្តិវិទូ ទាហាន និងអ្នកភូមិសាស្ត្រនយោបាយប៉ុណ្ណោះទេ ប៉ុន្តែថែមទាំងសម្រាប់ក្រុមអ្នកវិនិយោគិនក្នុងឧស្សាហកម្មសពាវុធ និងការពារជាតិផងដែរ។
ប្រភពដដែលបានពន្យល់ទៀតថា ខ្លាឃ្មុំរុស្ស៊ីកំពុងស្រែកឡើងខ្លាំងៗប្រកាសប្រាប់ពិភពលោកតាមរយៈកម្លាំងយោធារបស់ខ្លួនក្នុងជម្លោះនៅអ៊ុយក្រែន ហើយអាល្លឺម៉ង់ និងអឺរ៉ុប ក៏កំពុងរៀបចំឡើងវិញនូវប្រព័ន្ធការពារជាតិរបស់ខ្លួន ជាពិសេស ថ្មីៗនេះ រដ្ឋាភិបាលទីក្រុងប៊ែរឡាំង នៃប្រទេសអាល្លឺម៉ង់ បានប្រកាសទិញមីស៊ីលតម្លៃ ៣,៥ពាន់លានដុល្លារសម្រាប់តែប្រព័ន្ធការពារមីស៊ីលពីក្រុមហ៊ុនអ្នកម៉ៅការការពារជាតិរបស់អាម៉េរិក ដែលគេស្គាល់ឈ្មោះថា RTX។
កិច្ចព្រមព្រៀងទិញ-លក់មីស៊ីល ដែលទំនងជាបានធ្វើឡើងកាលពីខែមុន ត្រូវបានប្រកាសដោយភ្នាក់ងារជាតិកិច្ចសហប្រតិបត្តិការសន្តិសុខ និងការពារជាតិ ហៅកាត់ថា DSCA ជាមួយនឹងនាយកដ្ឋានទទួលបន្ទុកកិច្ចការងារនៃក្រសួងការពារជាតិអាម៉េរិក។ សេចក្តីប្រកាសរួមបានបង្ហាញថា ក្នុងទំហំចំណាយថ្មីដ៏ធំលើកនេះ អាល្លឺម៉ង់ នឹងទទួលបានមីស៊ីលទំនើបៗជាច្រើនប្រភេទដែលរួមមានទាំងមីស៊ីល Standard Missile 6 (SM-6) Block I ចំនួន ១៧៣ គ្រាប់, មីស៊ីល Standard Missile 2 Block IIIC missiles ចំនួន ៥៧៧ គ្រាប់ និងប្រព័ន្ធបាញ់មីស៊ីលម៉ូដេល MK 21 and MK 13 Vertical Launch Systems ជាច្រើនគ្រឿងទៀតផង។
យ៉ាងណាក៏ដោយ បើទោះបីជាមិនទាន់បានគណនាច្បាស់នៅឡើយថា RTX នឹងអាចទទួលបានផលចំណេញប៉ុន្មានពីកុងត្រាទិញលើកលើកនេះក្ដី ប៉ុន្តែកាលពីឆ្នាំកន្លងទៅ គិតតែផ្នែកលក់អាវុធជាគ្រាប់មីស៊ីលរបស់ RTX ប៉ុណ្ណោះ អាចទទួលបានកុងត្រាលក់សរុបប្រមាណជា ២៦,៧ពាន់លានដុល្លារ ជាមួយនឹងផលចំណេញសរុប ២,៦ពាន់លានដុល្លារ ឬស្មើទៅនឹង១០ភាគរយនៃផលចំណេញសរុបក្នុងប្រតិបត្តិការទាំងអស់របស់ខ្លួន។
គួរឲ្យដឹងដែរថា ជាប្រវត្តិសាស្ត្រ សង្គ្រាមត្រជាក់នៅតំបន់អឺរ៉ុប ធ្លាប់បានកើតឡើងម្តងហើយកាលពីឆ្នាំ១៩៤៥ ពោលគឺនៅក្រោយពេលដែលសង្គ្រាមលោកទី២បានបញ្ចប់ ហើយវាបានអូសបន្លាយបង្កើតបានជាព្រឹត្តិការណ៍សំខាន់ជាច្រើនរហូតមកដល់ឆ្នាំ១៩៩១ ទើបសង្គ្រាមមួយនេះត្រូវបានបញ្ចប់ជាសា្ថពរទៅវិញ៕
Account
Security
Favourite Content