បរទេស៖ សេដ្ឋកិច្ចឌីជីថលនៅក្នុងអាស៊ានត្រូវបានព្យាករណ៍ថា នឹងឈានដល់ ៣០០ ពាន់លានដុល្លារនៅចុងឆ្នាំ២០២៥ នេះ ដោយសារកំណើនដ៏រឹងមាំក្នុងរយៈពេលមួយទសវត្សរ៍កន្លងមកនេះ។ នេះបើយោងតាមការរាយការណ៍ពី The Investor។

កាលពីថ្ងៃចន្ទ សប្ដាហ៍នេះ ក្រុមហ៊ុនធំៗចំនួន ៣ រួមមាន Google, Temasek និង Bain & Company បានបង្ហាញពីរបាយការណ៍សេដ្ឋកិច្ចឌីជីថលរបស់អាស៊ីអាគ្នេយ៍លើកទី ១០ ជាមួយនឹងការបន្ថែមប្រទេស ៤ រួមមាន ប្រ៊ុយណេ កម្ពុជា ឡាវ និងមីយ៉ាន់ម៉ា ជាលើកដំបូងទៅក្នុងទិន្នន័យ។

លោកស្រី Sapna Chadha អនុប្រធានប្រចាំតំបន់អាស៊ីអាគ្នេយ៍នៃក្រុមហ៊ុន Google បានលើកឡើងថា កាលពី ១០ ឆ្នាំមុន ក្រុមហ៊ុនបានព្យាករណ៍ថា សេដ្ឋកិច្ចឌីជីថលក្នុងតំបន់នឹងឈានដល់ ២០០ ពាន់លានដុល្លារនៅឆ្នាំ២០២៥ ។ ជាក់ស្តែង តំបន់អាស៊ីអាគ្នេយ៍សម្រេចបានគោលដៅលឿនជាងការរំពឹងទុករហូតរយៈពេល៣ឆ្នាំ ខណៈដែលការបន្ថែមប្រទេសចំនួន ៤ ជាសមាជិកនេះ មានចំណែកប្រហែល ២% នៃតម្លៃទំនិញសរុប ហើយនឹងផ្តល់លទ្ធផលវិជ្ជមានបន្ថែមទៀតនៅក្នុងសេដ្ឋកិច្ចឌីជីថលដែលកំពុងវិវឌ្ឍន៍ក្នុងតំបន់។ មិនត្រឹមតែប៉ុណ្ណោះ កំណើននៃទំហំសេដ្ឋកិច្ចឌីជីថល ត្រូវបានជំរុញដោយតម្លៃទំនិញសរុបរួមបញ្ចូល ដូចជា ពាណិជ្ជកម្មអេឡិចត្រូនិក (E-commerce), ការដឹកជញ្ជូនអាហារ, សេវាកម្មធ្វើដំណើរសាធារណៈ, ការធ្វើដំណើរកក់តាមអ៊ីនធឺណិត,ប្រព័ន្ធផ្សព្វផ្សាយអនឡាញ, និងសេវាកម្មហិរញ្ញវត្ថុឌីជីថលផងដែរ។ សូមបញ្ជាក់ថា E-commerce គឺជាផ្នែកដ៏ធំបំផុត ហើយការលក់អាចនឹងកើនឡើងដល់ ១៨៥ ពាន់លានដុល្លារនៅឆ្នាំនេះ ខណៈដែលប្រាក់ចំណូលសរុបនឹងកើនឡើងដល់ ៤១ ពាន់លានដុល្លារ។ ដោយឡែក ការធ្វើដំណើរដែលកក់សំបុត្រ ឬទិញសេវាតាមអ៊ីនធឺណិត គឺជាផ្នែកដ៏ធំបំផុតទី២ ជាក់ស្ដែង ការលក់សំបុត្រយន្តហោះមានការកើនឡើងខ្លាំង ការកើនឡើងនៃការកក់កន្លែងស្នាក់នៅកម្រិតខ្ពស់ និងការបន្ធូរបន្ថយទិដ្ឋាការរបស់ប្រទេសមួយចំនួន។

របាយការណ៍ដដែលក៏បានបង្ហាញពីការកើនឡើងនៃការផ្តល់មូលនិធិឯកជននៅក្នុងតំបន់អាស៊ីអាគ្នេយ៍ដែលបានកើនប្រហែល ១៥% រហូតដល់ ៨ ពាន់លានដុល្លារ (បើធៀបនឹងឆ្នាំមុន)។ នៅក្នុងវិស័យបញ្ញាសិប្បនិមិត្ត (AI) វិញ លោក Fock Wai Hoong ប្រធានប្រចាំតំបន់អាស៊ីអាគ្នេយ៍របស់ Temasek បានលើកឡើងថា ទឹកប្រាក់ជាង ២ ពាន់លានដុល្លារត្រូវបានវិនិយោគលើអាជីវកម្មដែលទាក់ទងនឹង AI នៅក្នុងឆ្នាំ២០២៤ ជាពិសេសក្រុមហ៊ុន AI ភាគច្រើនមានមូលដ្ឋាននៅប្រទេសសិង្ហបុរី ខណៈដែលវិស័យនេះកំពុងរីករាលដាលនៅទូទាំងតំបន់។ ក្នុងនាមជាមជ្ឈមណ្ឌល AI ឈានមុខគេក្នុងតំបន់អាស៊ីអាគ្នេយ៍ សិង្ហបុរី មានភាពទាក់ទាញខ្លាំងរហូតទទួលបានការវិនិយោគឯកជនចំនួន ១,៣១ ពាន់លានដុល្លារនៅក្នុងឆមាសទី២ នៃឆ្នាំ២០២៤ ដល់ឆមាសទី១ នៃឆ្នាំ២០២៥ ដែលស្មើរនឹង ៥៥% នៃការវិនិយោគ AI ទាំងអស់នៅក្នុងតំបន់៕