បរទេស៖ កាលពីថ្ងៃអង្គារ៍ និងថ្ងៃពុធ សប្ដាហ៍នេះ អ្នកការទូតកំពូលៗមកពីក្រុមប្រទេសឧស្សាហកម្មជឿនលឿន G7 រួមាន កាណាដា អាម៉េរិក ចក្រភពអង់គ្លេស បារាំង អាល្លឺម៉ង់ អ៊ីតាលី និងជប៉ុន បានជួបប្រជុំនៅរដ្ឋ Ontario ប្រទេសកាណាដា ដើម្បីពិភាក្សាគ្នាពាក់ព័ន្ធទៅនឹងបញ្ហាមួយចំនួនដែលកំពុងកើតមាន ជាពិសេស ពាក់ព័ន្ធទៅនឹងសហរដ្ឋអាម៉េរិក។ នេះបើយោងតាមការរាយការណ៍ពី France24 ។

ការជួបប្រជុំគ្នានេះបានពិភាក្សាលើបញ្ហាជាច្រើនរួមមាន ៖ ការកើនឡើងនៃភាពតានតឹងរវាងសម្ព័ន្ធមិត្តអាម៉េរិក និងកាណាដា, ភាពមិនច្បាស់លាស់ជុំវិញផែនការរបស់ប្រធានាធិបតី Donald Trump លើបទឈប់បាញ់នៅតំបន់ Gaza, និងការខិតខំប្រឹងប្រែងបញ្ចប់សង្រ្គាមរុស្ស៊ី-អ៊ុយក្រែន។ ក្រៅពីសមាជិក G7 កាណាដាក៏បានអញ្ជើញរដ្ឋមន្ត្រីការបរទេសនៃប្រទេសអូស្ត្រាលី ប្រេស៊ីល ឥណ្ឌា អារ៉ាប៊ីសាអូឌីត ម៉ិកស៊ិក កូរ៉េខាងត្បូង អាហ្វ្រិកខាងត្បូង និងអ៊ុយក្រែន ចូលរួមផងដែរ។

រដ្ឋមន្ត្រីការបរទេសកាណាដា លោកស្រី Anita Anand បានលើកឡើងថា អាទិភាពសំខាន់ៗនៅក្នុងកិច្ចពិភាក្សាកាលពីយប់ថ្ងៃអង្គារបានរួមបញ្ចូលកិច្ចពិភាក្សាស្តីពីការជំរុញសន្តិភាព និងស្ថិរភាពយូរអង្វែងនៅមជ្ឈិមបូព៌ា ហើយផែនការ​សន្តិភាព​ត្រូវ​តែ​ប្រកាន់​ខ្ជាប់។ អ្នកការទូតទាំងនោះបានជួបជាមួយរដ្ឋមន្ត្រីការបរទេសអ៊ុយក្រែននៅព្រឹកថ្ងៃពុធ ខណៈដែលចក្រភពអង់គ្លេសនឹងផ្តល់ជំនួយចំនួន ១៣ លានផោន (១៧ លានដុល្លារ) ដើម្បីជួយស្ដារហេដ្ឋារចនាសម្ព័ន្ធថាមពលរបស់ប្រទេសនេះ ដែលផ្តោតលើការជួសជុលថាមពល កំដៅ និងការផ្គត់ផ្គង់ទឹក ក៏ដូចជាជំនួយមនុស្សធម៌សម្រាប់ពលរដ្ឋអ៊ុយក្រែនផងដែរ។

ទន្ទឹមនឹងនេះ កាតព្វកិច្ចធ្វើជាម្ចាស់ផ្ទះ G7 របស់កាណាដា នៅឆ្នាំនេះ កើតឡើងចំពេលដែលទំនាក់ទំនងជាមួយអាម៉េរិកមានភាពតានតឹង ដោយសារការដំឡើងពន្ធរបស់មហាអំណាចសេដ្ឋកិច្ចមួយនេះ។ សូមរំលឹកថា កាលពីចុងខែតុលា លោក Trump បានសម្រេចចិត្តបញ្ឈប់កិច្ចចរចាពាណិជ្ជកម្មជាមួយកាណាដា ដោយសាររដ្ឋបាលខេត្ត Ontario នៃប្រទេសកាណាដា បានផ្សព្វផ្សាយអំពីការប្រឆាំងទៅនឹងពន្ធអាម៉េរិកដែលធ្វើឲ្យគាត់ខឹង។ យ៉ាងណាមិញ នាយករដ្ឋមន្ត្រីកាណាដា លោក Mark Carney បានសុំទោសចំពោះបញ្ហានេះ និងបានបង្ហាញពីការត្រៀមខ្លួនរួចជាស្រេចក្នុងការបន្តកិច្ចចរចាពាណិជ្ជកម្មឡើងវិញ។ លើសពីនេះ សម្ព័ន្ធមិត្ត G7 ក៏កំពុងប្រឈមនឹងភាពចលាចលជុំវិញការទាមទាររបស់លោក Trump ពាក់ព័ន្ធនឹងពាណិជ្ជកម្ម និងសំណើផ្សេងៗ ដើម្បីជាថ្នូរកាត់បន្ថយពន្ធ។ ចំណុចតានតឹងសំខាន់មួយទៀត គឺការចំណាយលើវិស័យការពារជាតិ ដោយសារសមាជិក G7 (លើកលែងជប៉ុន) គឺជាសមាជិកនៃអង្គការណាតូ។ លោក Trump ទាមទារឱ្យពួកគេចំណាយ ៥% នៃផលិតផលក្នុងស្រុកសរុបប្រចាំឆ្នាំ (GDP) របស់ពួកគេលើវិស័យការពារជាតិ។ ​ប្រទេស​មួយ​ចំនួន​បាន​យល់ព្រមលើសំណើនេះ ប៉ុន្តែ​ប្រទេស​ខ្លះ​ទៀត​នៅមិន​ទាន់យល់ស្របនោះទេ ជាពិសេស កាណាដា និង​អ៊ីតាលី។ មិនត្រឹមតែប៉ុណ្ណោះ ក្រុម​ប្រទេស G7 មានការខ្វែងគំនិតគ្នាផងដែរជុំវិញសង្រ្គាមរុស្ស៊ី-អ៊ុយក្រែន ព្រមទាំង សង្គ្រាមអ៊ីស្រាអែល-ហាម៉ាស់ នៅតំបន់ហ្គាហ្សា ដោយចក្រភពអង់គ្លេស កាណាដា និងបារាំង បានប្រកាសថា ពួកគេនឹងទទួលស្គាល់រដ្ឋប៉ាឡេស្ទីន បើទោះបីជាគ្មានដំណោះស្រាយចំពោះជម្លោះក៏ដោយ៕