សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ សេចក្តីប្រកាសព័ត៌មានរបស់កយកា (KOICA)នាថ្ងៃទី៣ ខែមេសា ឆ្នាំ២០២៥ នេះបានឱ្យដឹងថា កាលពីថ្ងៃទី៣១ ខែមីនា ឆ្នាំ២០២៥ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) និងក្រសួងមុខងារសាធារណៈនៃរាជរដ្ឋាភិបាលកម្ពុជា បានផ្លាស់ប្តូរកំណត់ហេតុនៃកិច្ចពិភាក្សា(RD)ជាផ្លូវការសម្រាប់គម្រោងស្តីពីការពង្រឹងសមត្ថភាពសាលាភូមិន្ទរដ្ឋបាល(RSA) ដើម្បីកំណែទម្រង់អភិបាលកិច្ចនិងការពង្រឹងកម្ពុជា។
គំនិតផ្តួចផ្តើមគម្រោងរយៈពេល ៥ឆ្នាំ ផ្តល់មូលនិធិដោយរដ្ឋាភិបាលកូរ៉េតាមរយៈកយកាដែលមានថវិកាសរុបចំនួន១១,៧លានដុល្លារអាមេរិកនេះមានគោលបំណងលើកកម្ពស់ប្រសិទ្ធភាព និងប្រសិទ្ធផលនៃរដ្ឋបាលសាធារណៈរបស់កម្ពុជា តាមរយៈការកសាងសេវាសាធារណៈប្រកបដោយវិជ្ជាជីវៈ គណនេយ្យភាព និងត្រៀមខ្លួនជាស្រេចនាពេលអនាគត។ កំណត់ហេតុនៃកិច្ចពិភាក្សា(RD)ត្រូវបានផ្លាស់ប្តូរតាមរយៈការឆ្លើយឆ្លងជាផ្លូវការរវាងភាគីទាំងពីរ ដោយបង្ហាញពីកិច្ចព្រមព្រៀងផ្លូវការ ដើម្បីអនុវត្តគម្រោងពីឆ្នាំ២០២៥ ដល់ឆ្នាំ២០២៩។
គម្រោងនេះត្រូវបានតម្រឹមជាយុទ្ធសាស្ត្រ ជាមួយនឹងយុទ្ធសាស្ត្របញ្ចកោណដំណាក់កាលទី ១ (២០២៤-២០២៨) និងចក្ខុវិស័យរយៈពេលវែង ឆ្នាំ២០៥០ ជាពិសេស វារួមចំណែកដោយផ្ទាល់ដល់អាទិភាពជាតិនៃការអភិវឌ្ឍមូលធនមនុស្ស និងការអភិវឌ្ឍសេដ្ឋកិច្ចឌីជីថល និងសង្គម គាំទ្រដល់មហិច្ឆតារបស់រដ្ឋាភិបាលក្នុងការធ្វើទំនើបកម្ម ការផ្តល់សេវាសាធារណៈ និងជំរុញអភិបាលកិច្ចល្អ។
គំនិតផ្តួចផ្តើមគម្រោងនេះដែរ រួមមាន ការបង្កើតកម្មវិធីសិក្សាជាតិសម្រាប់មន្ត្រីរាជការ ដែលគាំទ្រដោយការសាងសង់មជ្ឈមណ្ឌលសិក្សាថ្មី និងការបង្កើតវេទិកាអប់រំឌីជីថល ដែលអាចប្រើប្រាស់បានដល់មន្ត្រីរាជការទាំងអស់នៅទូទាំងប្រទេស។ គួរកត់សម្គាល់ថា គម្រោងនេះនឹងបង្កើតកម្មវិធីសិក្សា និងខ្លឹមសារបណ្តុះបណ្តាលលម្អិតសម្រាប់ការអប់រំបច្ចេកវិទ្យាគមនាគមន៍ ព័ត៌មានវិទ្យា ICT សមស្របទៅនឹងតម្រូវការវិវត្តនៃរដ្ឋាភិបាលឌីជីថល។ កម្មវិធីនេះនឹងលើកកម្ពស់សមត្ថភាពរបស់មន្ត្រីរាជការក្នុងការប្រើប្រាស់ឧបករណ៍ និងប្រព័ន្ធឌីជីថលក្នុងការងារប្រចាំថ្ងៃរបស់ពួកគេ។
តាមរយៈវេទិកាអនឡាញ មន្ត្រីសាធារណៈទូទាំងប្រទេស មិនថាទីតាំងរបស់ពួកគេនៅទីណាក៏ដោយ ពួកគេនឹងមានលទ្ធភាពទទួលបានមាតិកាបណ្តុះបណ្តាលដែលមានគុណភាពខ្ពស់។ តាមរយៈការជម្នះឧបសគ្គនៃហេដ្ឋារចនាសម្ព័ន្ធរូបវន្ត និងធនធានគ្រូមានកម្រិត គម្រោងនេះធានានូវឱកាសសិក្សាដែលរួមបញ្ចូល និងបន្ត និងរួមចំណែកដល់ការពង្រឹងសមត្ថភាពរដ្ឋបាលជាតិរយៈពេលវែង។
លោកស្រី ឆយ មូន ជុង (Ms. CHOI Moon Jung) នាយិកាទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំប្រទេសកម្ពុជាបានបញ្ជាក់សាជាថ្មីនូវការប្តេជ្ញាចិត្តយ៉ាងមុតមាំរបស់ កយកា-KOICA ចំពោះគោលដៅអភិវឌ្ឍន៍របស់កម្ពុជា ។
លោកស្រីបបានបន្ថែមថា ៖
«គម្រោងនេះ គឺជាមូលដ្ឋានគ្រឹះនៃការគាំទ្ររបស់កយកា-KOICA សម្រាប់កំណែទម្រង់អភិបាលកិច្ចរបស់ប្រទេសកម្ពុជា។ តាមរយៈការពង្រឹងសាលាភូមិន្ទរដ្ឋបាល យើងមានគោលបំណងចូលរួមចំណែកដល់ការសម្រេចបាននូវយុទ្ធសាស្ត្របញ្ចកោណ និងចក្ខុវិស័យកម្ពុជាឆ្នាំ២០៥០ ជាពិសេសក្នុងវិស័យអាទិភាពនៃបរិវត្តកម្មមូលធនមនុស្ស និងឌីជីថល។ គំនិតផ្តួចផ្តើមនេះនឹងផ្តល់អត្ថប្រយោជន៍ដោយផ្ទាល់ដល់មន្ត្រីរាជការថ្នាក់កណ្តាលប្រមាណ ៣៩ ០០០ នាក់ ក៏ដូចជាជះឥទ្ធិពលដល់មន្ត្រីរាជការមូលដ្ឋានប្រហែល ១៧២ ០០០នាក់ តាមរយៈប្រព័ន្ធនិងកម្មវិធីបណ្តុះបណ្តាលដែលប្រសើរឡើង»។
គម្រោងនេះក៏ឆ្លើយតបទៅនឹងកំណែទម្រង់មុខងារសាធារណៈនាពេលថ្មីៗនេះ ដែលផ្តួចផ្តើមដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រួមទាំងការដាក់ឲ្យប្រើប្រាស់ប្រព័ន្ធប្រឡងសេវាសាធរណៈជាតិស្តង់ដារ។ ក្នុងនាមជាស្ថាប័នអនុវត្តកំណែទម្រង់ទាំងនេះ សាលាភូមិន្ទរដ្ឋបាល (RSA) នឹងទទួលបានការគាំទ្រពីស្ថាប័នសំខាន់ៗតាមរយៈជំនួយរបស់ កយកា-KOICA ដើម្បីលើកកម្ពស់តួនាទី និងសមត្ថភាពរបស់ខ្លួន។
ការគាំទ្ររបស់កយកា-KOICA គ្របដណ្តប់លើការបញ្ជូនអ្នកជំនាញការអភិវឌ្ឍយុទ្ធសាស្ត្រធនធានមនុស្សថ្នាក់ជាតិ ការរចនាកម្មវិធីសិក្សាការអភិវឌ្ឍប្រព័ន្ធការផ្តល់បច្ចេកវិទ្យាគមនាគមន៍ ព័ត៌មានវិទ្យា (ICT)និងសម្ភារៈ បរិក្ខាអប់រំ និងកម្មវិធីកសាងសមត្ថភាព ទាំងនៅក្នុងប្រទេសកម្ពុជា និងនៅប្រទេសកូរ៉េ។ ក្រសួងមុខងារសាធារណៈបានប្តេជ្ញាផ្តល់ដី និងធនធានស្ថាប័ន ដើម្បីធានាបាននូវការអនុវត្តគម្រោងនេះដោយរលូន។ ជាមួយនឹងគំនិតផ្តួចផ្តើមនេះកយកា-KOICAបានបន្តបញ្ជាក់ឡើងវិញនូវតួនាទីរបស់ខ្លួនក្នុងនាមជាដៃគូអភិវឌ្ឍន៍យូរអង្វែងរបស់កម្ពុជា។ ភាគីទាំងពីរ កម្ពុជា-កូរ៉េ នឹងធ្វើការរួមគ្នាដើម្បីបង្កើតសាលាភូមិន្ទរដ្ឋបាល ឲ្យទៅជាមជ្ឈមណ្ឌលឈានមុខគេសម្រាប់នវានុវត្តន៍វិស័យសាធារណៈ និងការកសាងសមត្ថភាពនៅក្នុងប្រទេស៕
Account
Security
Favourite Content