សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ ជំនួបដ៏កម្ររវាងមេដឹកនាំរុស្ស៊ី លោក Vladimir Putin និងប្រធានាធិបតីអាម៉េរិក Donald Trump នឹងត្រូវប្រព្រឹត្តទៅជាលើកដំបូងគិតចាប់តាំងតែពីផ្ទុះជម្លោះដ៏រ៉ាំរ៉ៃរវាងរុស្ស៊ី និងអ៊ុយក្រែនហើយវាក៏នឹងក្លាយទៅជាព្រឹត្តិការណ៍ដែលមេដឹកនាំប្រទេស និងក្រុមហ៊ុនធំៗកំពុងទន្ទឹងរង់ចាំបំផុតមួយផងដែរ។
បើមិនមានអ្វីប្រែប្រួលទេនោះ កិច្ចជំនួបកំពូល និងជាប្រវត្តិសាស្ត្ររវាងលោក Putinនិងលោក Trump នឹងត្រូវរៀបចំធ្វើឡើងនៅថ្ងៃសុក្រទី១៥ ខែសីហា សប្តាហ៍នេះនៅក្នុងទឹកដីរដ្ឋអាឡាស្កា ហើយជឿជាក់ថានឹងមានពិភាក្សាអំពីកិច្ចព្រមព្រៀងសន្តិភាពនៃជម្លោះនៅអ៊ុយក្រែនដែលបានអូសបន្លាយអស់រយៈពេលជាង៣ឆ្នាំកន្លះមកហើយនោះ។
យ៉ាងណាក្តី នៅមុនជំនួបដ៏សំខាន់នេះ តើមានព័ត៌មានអ្វីខ្លះដែលពិភពលោកអាចដឹងជាមុន និងអ្វីដែលអាចរំពឹងទុកបាន?
រដ្ឋអាឡាស្កា គឺជាទីតាំងដែលត្រូវរៀបចំជំនួប ប៉ុន្តែមកដល់ពេលនេះគេពុំទាន់អាចកំណត់បានទីកន្លែងសម្រាប់ជួបគ្នា ឬពេលវេលានៅឡើយទេ។ យ៉ាងណាក្តី អាឡាស្កា តាំងតែពីអតីតកាលគឺជាគោលដៅជំនួបជារឿយៗរវាងមេដឹកនាំមកពីលោកខាងកើត និងលោកខាងលិច ពោល គឺតាំងតែពីសម័យសង្គ្រាមត្រជាក់មកម្ល៉េះ ពីព្រោះវាជាកន្លែងដែលស្ថិតនៅខាងក្រៅដែនដែលអាចវាយប្រហារដោយមីស៊ីលរវាងភាគីសងខាង និងជាកន្លែងដែលមិនមានក្រុមចារកម្មសំងាត់ធ្វើការនោះឡើយ។
ដំណើរទសន្សកិច្ចរបស់លោក Putin ទៅកាន់ទឹកដីអាឡាស្កានឹងក្លាយទៅជាដំណើរទស្សនកិច្ចលើកដំបូងចាប់តាំងពីឆ្នាំ២០១៥ ទៅក្នុងទឹកដីសហរដ្ឋអាម៉េរិក។ ១០ឆ្នាំមុន លោក Putin បានចូលរួមមហាសន្និបាតអង្គការសហប្រជាជាតិនៅក្នុងទីក្រុងញុវយ៉ក។ យ៉ាងណាក៏ដោយ ទោះបីជាដីកាចាប់ខ្លួនលោក Putin ត្រូវដោយតុលាការឧក្រិដ្ឋកម្មអន្តជាតិតាំងពីឆ្នាំ២០២៣ក្តី ប៉ុន្តែសហរដ្ឋអាម៉េរិកមិនស្ថិតជាសមាជិករបស់តុលាការឡើយ ដូច្នេះ មិនមានកាតព្វកិច្ចណាមួយ ឬការព្រួយបារម្ភពីសំណាក់ភាគីរុស្ស៊ីដើម្បីរៀបចំជំនួបកំពូលនេះដែរ។
តើមេដឹកនាំអ៊ុយក្រែន លោក Vladimir Zelensky នឹងអាចចូលរួមដែរឬយ៉ាងណា? ទោះបីជាបានបញ្ជាក់អំពីការចូលរួមទាំងសងខាង គឺអាម៉េរិក និងរុស្ស៊ី ក្តី ប៉ុន្តែលទ្ធភាពនៃការចូលរួមដោយមេដឹកនាំអ៊ុយក្រែនរូបនេះប្រហែលជាមិនអាចឡើយ។ វិមានក្រមឡាំងធ្លាប់បានបញ្ជាក់ហើយថា លោក Putin មិនមានបំណងចង់ជួបផ្ទាល់ជាមួយនឹងលោក Zelensky នោះឡើយ ដរាបណាមិនទាន់ព្រមព្រៀងលើសេចក្តីព្រាងចុងក្រោយដើម្បីចុះហត្ថលេខាលើកិច្ចព្រមព្រៀងសន្តិភាពជាផ្លូវការរវាងរុស្ស៊ី និងអ៊ុយក្រែន។
របៀបវារៈនៃកិច្ចប្រជុំនឹងមិនមានអ្វីលើសពីបញ្ហាផ្ទុះអាវុធរវាងអ៊ុយក្រែន និងរុស្ស៊ី ដែលកំពុងបន្តនោះទេ ទោះបីជាបទឈប់បាញ់ត្រូវបានចុះហត្ថលេខារួចទៅហើយក្តី។ អាម៉េរិក រុស្ស៊ី និងអ៊ុយក្រែន សុទ្ធតែទាមទាររៀងខ្លួន និងមានការខ្វែងគំនិតមួយចំនួននៅឡើយ។
ក្នុងនោះរុស្ស៊ី មិនព្រមបោះបង់ទឹកដីដែលខ្លួនដណ្តើមមកបាន និងធ្វើការបោះឆ្នោតប្រជាមតិនោះទេ ខណៈដែលអ៊ុយក្រែនបានបញ្ជាក់ទៅពលរដ្ឋរបស់ខ្លួនហើយថា នឹងមិនអាចបាត់បង់ទឹកដីរបស់ខ្លួនជាដាច់ខាត ប៉ុន្តែអាម៉េរិកបានបញ្ជាក់ថា ការដោះដូរទឹកដីនឹងត្រូវធ្វើឡើងជៀសមិនផុតឡើយដើម្បីអាចសម្រេចបានកិច្ចព្រមព្រៀងមួយ។
ដូច្នេះ អ្វីដែលភាគីទាំងពីររំពឹងទុកគឺមិនខុសគ្នាប៉ុន្មានពីអ្វីដែលជាជំហរបស់ពួកគេឡើយ។ រុស្ស៊ី ជឿជាក់ថា វានឹងក្លាយទៅជាពេលវេលាមួយដើម្បីពង្រឹងការកាន់កាប់ទឹកដីដែលទទួលបានទាំងនោះ ហើយនឹងធានាឲ្យបានថា អ៊ុយក្រែន គឺត្រូវនៅឲ្យឆ្ងាយពីអង្គការណាតូដែលដឹកនាំដោយអាម៉េរិក ជាពិសេសគឺកិច្ចការងារយោធា។
សម្រាប់អ៊ុយក្រែន និងសម្ព័ន្ធមិត្តអឺរ៉ុបវិញ បានបង្ហាញអារម្មណ៍ព្រួយបារម្ភនៅពេលដែលជំនួបដែលមិនមានការចូលរួមដោយតំណាងរបស់អ៊ុយក្រែន ពីព្រោះវានឹងអាចបង្ខំឲ្យអាម៉េរិកទទួលយកលក្ខខណ្ឌដែលតម្រូវឲ្យរដ្ឋាភិបាលទីក្រុងគៀវទទួលយកសម្បាទានដែលមិនអាចគេចវេសបាន។
គួរឲ្យដឹងដែរថា ពេញមួយសប្តាហ៍កន្លងទៅនេះ លោក Putin បានធ្វើពិភាក្សា និងសន្ទនាដោយផ្ទាល់ជាមួយនឹងមេដឹកនាំពិភពលោកជាច្រើនរួចមកហើយ ដូចជា មេដឹកនាំចិន លោក Xi Jinping នាយករដ្ឋមន្ត្រីឥណ្ឌា Narendra Modi ប្រធានាធិបតីប្រេស៊ីល ព្រមទាំងមេដឹកនាំនៅអាហ្វ្រិកខាងត្បូង មេដឹកនាំកាហ្សាស្ថាន អ៊ូបេគីស្ថាន បេឡារុស្ស និងគៀហ្ស៊ីស្ថានផងដែរ៕
Account
Security
Favourite Content