សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ កាលពីថ្ងៃអង្គារសប្តាហ៍នេះ ក្រសួងការពារជាតិអាមេរិកបានប្រកាសថា ខ្លួនបានអនុម័តកញ្ចប់អាវុធប្រភេទ F-16 ជាយន្តចម្បាំងទំនើបបំផុតនៃកងកម្លាំងទ័ពអាមេរិកយ៉ាងហោចណាស់ ២០គ្រឿងទៅឲ្យរដ្ឋាភិបាលទីក្រុងម៉ានីលក្នុងទំហំទឹកប្រាក់ប្រមាណជា ៥,៥៨ពាន់លានដុល្លារ។ យ៉ាងណាក្តី មន្ត្រីយោធានៃប្រទេសហ្វីលីពីននៅថ្ងៃព្រហស្បតិ៍នេះបានចេញមកធ្វើការពន្យល់ថា កុងត្រាបញ្ជាទិញយន្តហោះចម្បាំង F-16 ពីសហរដ្ឋអាមេរិកទាំងនោះ គឺមិនមានបំណងក្នុងការគំរាមកំហែងដល់ប្រទេសណាមួយក្នុងតំបន់ និងភាគីផ្សេងនោះទេ បូករួមទាំងរដ្ឋាភិបាលក្រុងប៉េកាំងផងដែរ។
អ្នកនាំពាក្យនៃក្រុមប្រឹក្សាសន្តិសុខជាតិនៃប្រទេសហ្វីលីពីនបានលើកឡើងបែបនេះសំដៅចង់បញ្ជាក់ឲ្យប្រទេសចិនបានដឹងថា ផែនការនៃការទិញយន្តហោះចម្បាំងគឺមិនមានគោលដៅគំរាមកំហែងជាមួយនឹងចិននោះទេ ប៉ុន្តែវាគឺជាផ្នែកមួយនៃកិច្ចខិតខំរបស់ខ្លួនក្នុងការធ្វើទំនើបកម្មវិស័យការពារជាតិប៉ុណ្ណោះ។
ជាមួយគ្នានេះដែរ មន្ទីរប៉ង់តាហ្គោនក៏បានធ្វើការថ្លែងការណ៍ដូចគ្នាដែរថា យន្តហោះទាំង២០គ្រឿង អាចជួយពង្រឹងសមត្ថភាពយោធាដល់ប្រទេសជាសមាជិកអាស៊ានមួយនេះ បូករួមទាំងកិច្ចការពារដែនអធិបតេយ្យភាព និងការធ្វើឲ្យកាន់តែប្រសើរឡើងនៃតុល្យភាពក្នុងកម្លាំងទ័ពរបស់ពួកគេប៉ុណ្ណោះ។
គួរឲ្យដឹងដែរថា សេចក្តីប្រកាសអំពីកិច្ចព្រមព្រៀងយោធាដ៏សំខាន់នេះបានធ្វើឡើងបន្ទាប់ពីដំណើរទស្សនកិច្ចមួយរបស់រដ្ឋមន្ត្រីក្រសួងការពារជាតិអាមេរិក លោក Pete Hegseth ទៅកាន់ទីក្រុងម៉ានីលកាលពីសប្តាហ៍មុន។ នៅទីនោះ លោករដ្ឋមន្ត្រីបានរៀបរាប់អំពីការប្តេជ្ញាចិត្តយ៉ាងរឹងម៉ាំរបស់ទីក្រុងវ៉ាស៊ីនតោនចំពោះសន្ធិសញ្ញាការពារគ្នាទៅវិញទៅមករបស់ខ្លួនជាមួយនឹងប្រទេសហ្វីលីពីន ហើយបានសន្យាថា នឹងដាក់ពង្រឹងសមត្ថភាពជឿនលឿន និងទំនើបកម្ម ដើម្បីពង្រឹងការទប់ស្កាត់ប្រឆាំងនឹងការគំរាមកំហែងរួមទាំងការឈ្លានពានរបស់ចិនផងដែរ។
សូមរំលឹកឡើងវិញអំពីបញ្ហាទាមទារនៅតាមតំបន់សមុទ្រចិនខាងត្បូងនាពេលបច្ចុប្បន្នដែលក្នុងនោះប្រទេសចិនមានការទាមទារទឹកដីធំជាងគេនៅក្នុងដែនជម្លោះដែលត្រួតស៊ីគ្នាជាមួយតំបន់សេដ្ឋកិច្ចផ្តាច់មុខរបស់ ប្រ៊ុយណេ ឥណ្ឌូនេស៊ី ម៉ាឡេស៊ី ហ្វីលីពីន និងវៀតណាមផងដែរ ទាំងដែលកាលពីក្នុងឆ្នាំ២០១៦ តុលាការអន្តរជាតិបានកាត់ក្តីលើការទាមទាររបស់ចិនថា គឺជារឿងដែលមិនមានមូលដ្ឋាននៅក្រោមច្បាប់អន្តរជាតិ ប៉ុន្តែយ់ាងណាក្តី វាគឺជាសេចក្តីសម្រេចដែលក្រុងប៉េកាំងមិនបានទទួលស្គាល់នោះទេ៕
Account
Security
Favourite Content