សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រាជរដ្ឋាភិបាលបានយកចិត្តទុកដាក់ខ្ពស់ទៅលើយុទ្ធសាស្ត្រកំណើនសេដ្ឋកិច្ចតាមរយៈការបន្តអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា(IDP)ឆ្នាំ២០១៥-២០២៥ និងការគិតគូររៀបចំគោលនយោបាយ IDP សម្រាប់ដំណាក់កាលបន្ទាប់ផងដែរ។
ឯកឧត្តម ជា វុទ្ធី អគ្គលេខាធិការនៃគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានលើកឡើងដូច្នេះនៅក្នុងសិក្ខាសាលាផ្សព្វផ្សាយរបាយការណ៍ស្តីពីវឌ្ឍនភាពនៃការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥.២០២៥ (IDP)នាថ្ងៃទី២៩ ខែឧសភា ឆ្នាំ២០២៥ នាខេត្តព្រះសីហនុ។
ក្នុងឱកាសនេះ ឯកឧត្តម ក៏បានលើកឡើងពីបញ្ហាប្រឈមផ្សេងៗដែលជាកត្តាបង្កហានិភ័យដល់វិស័យឧស្សាហកម្មកម្ពុជា ដូចជា ៖ (១) ភាពតានតឹងផ្នែកភូមិសាស្ត្រនយោបាយ និងសេដ្ឋកិច្ច (២) ការរុះរើខ្សែច្រវាក់ផ្គត់ផ្គង់ផលិតកម្ម (៣) ឌីជីថលូបនីយកម្មក្នុងឧស្សាហកម្ម (៤) បម្រែបម្រួលប្រជាសាស្ត្រ (៥) ការប្រែប្រួលអាកាសធាតុ និងការជំរុញសេដ្ឋកិច្ចបៃតង និង (៦) ការចាកចេញរបស់កម្ពុជាពីក្រុមប្រទេស អភិវឌ្ឍន៍តិចតួច (LDC) ផងដែរ។
គួរជម្រាបថា ៖ សិក្ខាសាលានេះមានគោលបំណងផ្សព្វផ្សាយវឌ្ឍនភាពនៃការអនុវត្តគោលនយោបាយ IDP ក្នុងឆ្នាំ២០២១-២០២៣ ក៏ដូចជាបញ្ហាប្រឈម សំណូមពរ ដែលក្រសួង ស្ថាប័នទទួលបន្ទុកអនុវត្ត វិធានការបានជួបប្រទះ និងស្វែងរកដំណោះស្រាយដើម្បីសម្រេចនូវការអនុវត្តគោលនយោបាយនេះឱ្យបានគ្រប់ជ្រុងជ្រោយ និងប្រកបដោយប្រសិទ្ធភាពខ្ពស់។
នៅក្នុងសិក្ខាសាលានេះ លោក ហៀន សុប៉ូលីន ប្រធានស្តីទីនាយកដ្ឋានប្រតិបត្តិការ និងគ្រប់គ្រងតំបន់សេដ្ឋកិច្ចពិសេសនៃក.អ.ក. បានធ្វើបទបង្ហាញអំពីរបាយការណ៍វឌ្ឍនភាពនៃការអនុវត្តគោលនយោបាយអភិវឌ្ឍន៍ឧស្សាហកម្មកម្ពុជា ក្នុងឆ្នាំ២០២១-២០២៣ និងដំណើរការវិវត្តនៃតំបន់សេដ្ឋកិច្ចពិសេសកម្ពុជា ដែលមានការចូលរួមសួរសំណួរ-ចម្លើយយ៉ាងផុសផុលពីសំណាក់អ្នកចូលរួម។
អង្គសិក្ខាសាលាក៏បានរៀបចំកិច្ចពិភាក្សាលើប្រធានបទ “ការបង្កើនផលប្រយោជន៍ក្នុងស្រុកជាអតិបរមា និងការជំរុញឧស្សាហកម្មប្រតិគមន៍” ដោយបានអញ្ជើញវាគ្មិនកិត្តិយសចំនួន៤រូប មកពីឧត្តមក្រុមប្រឹក្សាសេដ្ឋកិច្ចជាតិ, ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, ក្រសួងពាណិជ្ជកម្ម, និងក្រសួងកសិកម្ម រុក្ខាប្រមាញ់ និងនេសាទ។ វេទិកានេះ គឺជាកិច្ចពិភាក្សាមួយដ៏មានសារៈសំខាន់ក្នុងការបំផុសគំនិត មតិយោបល់ ដើម្បីជំរុញឧស្សាហកម្មប្រតិគមន៍កម្ពុជាឱ្យមានការរីកចម្រើនបន្ថែមទៀត។
ឯកឧត្តម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា និងជាប្រធានលេខាធិការដ្ឋាន IDP នៃក.អ.ក. បានលើកឡើងអំពីទិសដៅការងារបន្តរបស់លេខាធិការដ្ឋានក្នុងការរៀបចំផែនការសម្រាប់ការរៀបចំរបាយការណ៍វាយតម្លៃចុងអាណត្តិនៃការអនុវត្តគោលនយោបាយ IDP និងថ្លែងអំណរគុណដល់តំណាងក្រសួង ស្ថាប័នពាក់ព័ន្ធ ក្នុងការចូលរួមចំណែកធ្វើឱ្យសិក្ខាសាលាបញ្ចប់ដោយភាពរលូន និងជោគជ័យ តាមគោលបំណងដែលបានរំពឹងទុក៕
Account
Security
Favourite Content