បរទេស៖ ទីផ្សារសាច់ជ្រូកក្នុងស្រុករបស់ថៃកំពុងព្រួយបារម្ភចំពោះការនាំចូលសាច់ជ្រូកពីអាម៉េរិក ដែលការប្រកួតប្រជែងខ្លាំងមិនធ្លាប់មានពីមុនមក។ នេះបើយោងតាមការរាយការណ៍ពី Al Jazeera។

បន្ទាប់ពីប្រធានាធិបតីអាម៉េរិក លោក Donald Trump បានជួបនាយករដ្ឋមន្ត្រីថៃ លោក Anutin Charnvirakul ក្រៅផ្លូវការនៃកិច្ចប្រជុំកំពូលអាស៊ានកាលពីខែតុលា សេតវិមានបានបង្ហាញ​នូវចំណុចមួយចំនួននៃកិច្ចព្រមព្រៀងពាណិជ្ជកម្មរបស់ខ្លួន និងកាត់បន្ថយអត្រាពន្ធលើការនាំចូលពីថៃមកត្រឹម ១៩%។ ទន្ទឹមនឹងនោះដែរ ថៃបានយល់ព្រមដោះស្រាយ និងបន្ធូរបន្ថយឧបសគ្គចំពោះអាហារ និងផលិតផលកសិកម្មរបស់អាម៉េរិកនៅក្នុងទីផ្សាររបស់ខ្លួន។ បន្ថែមពីនេះ ថៃសន្យាពន្លឿនសម្រាប់ការនាំចូលសាច់ និងផលិតផលបសុបក្សីរបស់អាម៉េរិក​មកក្នុងទីផ្សារខ្លួនផងដែរ។ ទីក្រុងវ៉ាស៊ីនតោន​មាន​បញ្ជីរាយ​ទំនិញ​ប្រហែល ១ ម៉ឺនមុខ​ដែលចង់​ចូលក្នុងទីផ្សារ​ប្រទេស​ថៃ​ដោយ​មិន​បង់ពន្ធ​ ដើម្បី​កាត់​បន្ថយ​ឱនភាព​ពាណិជ្ជកម្ម​ចំនួន ៤៥,៥ ពាន់​លាន​ដុល្លារ​ជាមួយ​ប្រទេសមួយនេះ។ ក្នុងបញ្ជីនោះរួមមាន សាច់ជ្រូក ពោត សណ្តែកសៀង និងផ្លែឈើមួយចំនួនជាដើម។

យ៉ាងណាមិញ វានឹងធ្វើឱ្យកសិករចិញ្ចឹមជ្រូកក្នុងស្រុកមានការព្រួយបារម្ភថា ឧស្សាហកម្មនេះនឹងរងគ្រោះពីការនាំចូលសាច់ជ្រូកអាម៉េរិកដែលមានតម្លៃថោកជាង និងត្រូវបានបង្កាត់ដោយ​សារធាតុ ractopamine ប៉ុន្តែសារធាតុនេះត្រូវបានហាមឃាត់នៅក្នុងប្រទេសជាច្រើនរួមទាំងថៃផងដែរ។ ប្រសិនបើសាច់ជ្រូករបស់អាម៉េរិកត្រូវបាននចូលថៃដោយគ្មានពន្ធ ឬ រនាំងពាណិជ្ជ​កម្មទេ នោះសន្តិសុខស្បៀងក្នុងស្រុកនឹងរងប៉ះពាល់ខ្លាំង។

លោក Worawut Siripun អគ្គលេខាធិការរងនៃសមាគមអ្នកចិញ្ចឹមជ្រូកនៃប្រទេសថៃ លើកឡើងថា តម្លៃសាច់ជ្រូកក្នុងស្រុកមិនត្រឹមតែធ្លាក់ថ្លៃនោះទេ ប៉ុន្តែអ្នកចិញ្ចឹមជ្រូកក្នុងស្រុកអាចនឹងឈប់ចិញ្ចឹមជ្រូកថែមទៀតផង។ មិនត្រឹមតែប៉ុណ្ណោះ អ្នក​ដែល​ដាំ​ដំណាំសម្រាប់​ចំណីជ្រូក​ក៏​ទទួល​រង​ផល​ប៉ះ​ពាល់​ដែរ ដូច​ជា​ អ្នកលក់​ចំណី​សត្វ អ្នក​ផលិត​ចំណី​សត្វ និង​អ្នក​លក់​ថ្នាំ​ពេទ្យសត្វជាដើម។ ជារួម វានឹងប៉ះពាល់ឧស្សាហកម្មសាច់ជ្រូកទាំងមូល។

ចាប់តាំងពីការផ្ទុះឡើងនៃជំងឺផ្តាសាយជ្រូក ឧស្សាហកម្មសាច់ជ្រូករបស់ថៃបានជួបបញ្ហាប្រឈមជាច្រើនជាពិសេសការនាំចូលខុសច្បាប់ពីចិន និងវៀតណាម។ លើសពីនេះ វាប្រឈមមុខនឹងការចំណាយខ្ពស់ ដោយសារការគ្រប់គ្រងតម្លៃរបស់រដ្ឋាភិបាលលើពោត និងសណ្តែកដែលប្រើសម្រាប់ចំណីជ្រូក និងបសុសត្វដទៃទៀត។ លោក Worawut លើកឡើងថា ទាំងចំណីដែលនាំចូល និងផលិតក្នុងស្រុកនៅសុទ្ធតែមានតម្លៃថ្លៃជាង បើប្រៀបធៀបទៅនឹងចំណីនៅអាម៉េរិកមានតម្លៃថោកជាង៕