សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ខេត្តមួយចំនួនស្ថិតនៅតំបន់ភូមិភាគឦសានរួមមានមណ្ឌលគិរី រតនគិរី ក្រចេះ និងស្ទឹងត្រែង ជាទីតាំងដែលសំបូរទៅដោយសម្បត្តិធម្មជាតិ ជាពិសេសធនធានរ៉ែ ប៉ុន្តែកម្ពុជានៅមិនទាន់បានទាញយកមកប្រើប្រាស់ឱ្យអស់សក្ដានុពលនៅឡើយ ទើបតែប៉ុន្មានឆ្នាំចុងក្រោយនេះ រាជរដ្ឋាភិបាលកម្ពុជាបានអនុញ្ញាតឱ្យមានការទាញយកធនធានរ៉ែមកប្រើប្រាស់ ដោយក្នុងនោះមានធនធានសំខាន់ៗចំនួន២ ដែលកំពុងទាញយកមកប្រើប្រាស់គឺធនធានរ៉ែមាស និងធនធានថ្មអារ ។
សម្រាប់ធនធានរ៉ែមាសដែលកំពុងទាញយកមកប្រើស្ថិតនៅខេត្តមណ្ឌលគិរី បាន និងកំពុងផ្ដល់អត្ថប្រយោជន៍ជាច្រើនដល់កម្ពុជា ក្នុងនោះ ក្រុមហ៊ុនដែលទទួលបានសិទ្ធិទាញយករ៉ែ កំពុងប្រើប្រាស់កម្លាំងពលកម្មប្រមាណ ៧៥០នាក់ រាប់ទាំងពីចុងភៅ អ្នកធ្វើការផ្នែកបដិសណ្ឋារកិច្ច អ្នកបើកត្រាក់ទ័រ គ្រឿងចក្រ និងបើករថយន្តដឹករ៉ែជាដើម ។
បើគិតត្រឹមពាក់កណ្ដាលខែកុម្ភៈ ឆ្នាំ២០២៥ នេះ ក្រុមហ៊ុនដែលវិនិយោគលើការទាញយកធនធានរ៉ែនៅស្រុកកែវសីមា ខេត្តមណ្ឌលគិរី ទាញបានធនធានរ៉ែមាសប្រមាណ ១៣តោន ហើយបាន និងផ្ដល់ជាសួយសារដល់រាជរដ្ឋាភិបាលកម្ពុជាក្នុងទំហំទឹកប្រាក់ប្រមាណ ៥០លានដុល្លារអាមេរិកហើយ ។
ក្រៅពីធនធានរ៉ែមាសក្នុងខេត្តមណ្ឌលគិរី នៅខេត្តក្រចេះឯណោះវិញក៏មានធនធានរ៉ែកម្រមួយប្រភេទ ដោយមានក្រុមហ៊ុនជាច្រើនកំពុងទាញយកមកប្រើប្រាស់ផងដែរនោះគឺធនធានរ៉ែថ្មអារ ។ រ៉ែថ្មអារនេះ ត្រូវបានរកឃើញជាយូរមកហើយនៅក្នុងខេត្តក្រចេះ និងមានក្រុមហ៊ុនតិចតួចប៉ុណ្ណោះ ដែលទាញយកមកប្រើ និងមិនសូវជាទូលំទូលាយនោះទេ ទើបតែក្នុងអាណត្តិទី៧ ដឹកនាំដោយសម្ដេចមហាបវរធិបតី លោកបានលើកទឹកចិត្តដល់វិនិយោគិនក្នុងវិស័យធនធានរ៉ែថ្មអារ និងបានជំរុញឱ្យមានការវិនិយោគ និងកែច្នៃដើម្បីនាំចេញទៅកាន់ទីផ្សារអន្តរជាតិ។
លោក គង់ ស៊ីថា អគ្គនាយករងនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពល បានមានប្រសាសន៍ថា ការវិនិយោគលើធនធានរ៉ែ បានផ្ដល់នូវអត្ថប្រយោជន៍ដល់កម្ពុជា ដោយក្នុងនោះក្រៅពីចំណូលមិនមែនសាពើពន្ធ វិស័យនេះ ក៏បានផ្ដល់ការងារ និងប្រាក់កម្រៃជាច្រើនទៀតដល់ប្រជាពលរដ្ឋកម្ពុជា ។
លោកបានមានប្រសាសន៍ថា ក្រៅពីការវិនិយោគលើរ៉ែមាសនៅមណ្ឌលគិរី និងរ៉ែថ្មអារនៅខេត្តក្រចេះ កម្ពុជាក៏មានធនធានរ៉ែផ្សេងទៀតនៅក្នុងខេត្តនៃតំបន់ភូមិភាគប៉ែកឦសានដែលនៅមិនទាន់បានទាញយកមកប្រើប្រាស់ដើម្បីជាប្រយោជន៍ជាតិឱ្យទូលំទូលាយនោះទេ ។
លោកស្រី ឡេង ដាវី អនុប្រធានសមាគមអាជីវកម្មថ្មអារកម្ពុជា បានមានប្រសាសន៍ថា ក្រុមហ៊ុន ឬទ្ធី ក្រានីត ខេមបូឌា ជាក្រុមហ៊ុនទី១ ទទួលបានអាជ្ញាបណ្ណអាជីវកម្មថ្មអារក្រានីតពីរាជរដ្ឋាភិបាលកម្ពុជា នៅក្នុងអំឡុងឆ្នាំ២០០២ ។ នៅក្នុងអំឡុងឆ្នាំ២០០៤ ក្រុមហ៊ុនបានសម្រេចបន្តសាងសង់រោងចក្រកែច្នៃជាផលិតផលសម្រេចថ្មក្រានីត សន្លឹក ហើយចាប់ពីពេលនោះមក ថ្មក្រានីត បានទាក់ទាញការវិនិយោគទាំងនៅក្នុង និងក្រៅប្រទេសជាបន្តបន្ទាប់ ។
លោកស្រីបន្តថា នៅក្នុងអំឡុងឆ្នាំ២០១៥ ដល់ឆ្នាំ២០១៩ ភាពល្បីល្បាញ និងសក្ដានុពលទាំងអស់នេះ បានទាក់ទាញការវិនិយោគបន្ថែម ៣០ក្រុមហ៊ុន និងប្រមាណជាង៦០គម្រោងនៃទុនវិនិយោគជាង២០០លានដុល្លារអាមេរិក ។
បើតាមលោកស្រី ឡេង ដាវី បានបញ្ជាក់ថាក្នុងឆ្នាំ២០២៤កន្លងទៅនេះ វិស័យធនធានរ៉ែថ្មអារ បានផ្ដល់ចំណូលដល់រដ្ឋប្រមាណ៩០លានដុល្លារអាមេរិកកើនឡើងពីប្រមាណ១០លានដុល្លារអាមេរិកនៅក្នុងឆ្នាំ ២០២៣ និងរំពឹងកើនឡើង១០ដងនៅពេលឆាប់ៗនេះ ដូច្នេះ ក្នុងមួយឆ្នាំចំណូលតែពីវិស័យរ៉ែថ្មអារ អាចកើនឡើងដល់ជិត១ពាន់លានដុល្លារអាមេរិក៕
Account
Security
Favourite Content