សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ បងប្អូនប្រហែលជាស្គាល់ហើយនូវភាពល្បីល្បាញរបស់អាកោត្នោតនៅភូមិព្រះដាក់ តែគេក៏មិនអាចមើលរំលងបាននូវចាហ៊ួយត្នោតដែលមានរស់ជាតិឈ្ងុយឆ្ងាញ់ និងទទួលបានការគាំទ្រច្រើនគួរឲ្យកោតសរសើរ។
នំអាកោរត្នោតព្រះដាក់រសជាតិម្ចាស់ដើម ជាយីហោនំមួយដែលកំពុងទទួលបានការគាំទ្រច្រើននៅខេត្តសៀមរាប។ បន្ថែមពីនេះ អ្វីដែលជាចំណុចសំខាន់ និងគួរឱ្យស្ញប់ស្ញែងនោះ ប្រជាជននៅក្នុងភូមិនេះបានបង្កើតគំនិតថ្មីកែច្នៃផ្លែត្នោតខ្ចីធ្វើជាចាហួយមួយប្រភេទទៀតដែលមានរសជាតិឈ្ងុយឆ្ងាញ់ និងកំពុងល្បីឈ្មោះមិនចាញ់នំអាកោរត្នោតនោះទេ។
អ្នកនាង វង្ស សាយ័ណ្ណ ជាអាជីវករលក់ចាហួយត្នោតខ្ចីខាងលើនេះបានប្រាប់ AMS ឱ្យដឹងថា ដោយសារតែខ្លួនមានជំនាញខាងបង្អែមស្រាប់ បានសាកល្បងយកត្នោតខ្ចីមកធ្វើជាចាហួយ ហើយក៏ឃើញថាទទួលបានលទ្ធផលវិជ្ជមាន និងបង្កើតជាមុខបង្អែមមួយប្រភេទទៀតប្រចាំតំបន់។
អ្នកនាងបានបញ្ជាក់ថា ៖
“វាមិនពិបាកធ្វើនោះទេ ងាយៗដែលគេធ្លាប់តែធ្វើចាហ៊ួយខ្ទិះដូងធម្មតា តែយើងច្នៃជាចាហ៊ួយត្នោតដែលមានសាច់ត្នោតខ្ចី មានក្លិនឈ្ងុយប្លែករសជាតិឆ្ងាញ់។ ចាហួយត្នោតខ្ចី យើងអាចផលិត និងលក់បានប្រមាណ ២០០កែវក្នុងមួយថ្ងៃ ហើយតម្លៃវិញត្រឹម ២០០០រៀលក្នុងមួយកែវ ឬថ្លៃជាងនេះអាស្រ័យលើទំហំកែវ ឬការកម្ម៉ង់របស់ភ្ញៀវ។”
អ្នកនាងបានបន្តថា ៖
“ចំពោះអតិថិជនដែលនិយមចូលចិត្ត និងគាំទ្រទិញ ភាគច្រើនជាអ្នកធ្វើដំណើរឆ្លងកាត់ ឬទិញផ្ញើអ្នកផ្ទះបន្ទាប់ពីមកកម្សាន្តតំបន់អង្គរខេត្តសៀមរាប ដើម្បីឲ្យបានស្គាល់រសជាតិចាហួយត្នោតខ្ចីដែលមានរសជាតិឆ្ងាញ់ និងផលិតពីសាច់ត្នោតខ្ចីពិតៗ។”
ពាក់ព័ន្ធនឹងការផលិតវិញ អ្នកនាង វង្ស សាយ័ណ្ណ បានបញ្ជាក់ដែរថា ហាក់មិនខុសគ្នាពីការធ្វើចាហួយដូងធម្មតានោះទេ ដោយគ្រាន់តែកូរម្សៅចាហួយ និងដាក់ខ្ទិះដូងធម្មតា តែអ្វីដែលសំខាន់គឺគំនិតច្នៃប្រឌិតក្នុងការបន្ថែមនូវគ្រឿងផ្សំធ្វើយ៉ាងណាឲ្យមានលក្ខណៈពិសេស ថ្មី ប្លែកពីផលិតផលដទៃ។ គួរបញ្ជាក់ដែរថា ការចេះរកគំនិតថ្មីៗក្នុងអាជីវកម្មមួយគឺជាចំណុចពិសេសមួយដែលអាជីវករគួរតែយកចិត្តទុកដាក់ និងខិតខំបន្តអភិវឌ្ឍធ្វើយ៉ាងណាឲ្យដំណើរការអាជីវកម្មរបស់ខ្លួនកាន់តែប្រសើរ និងមានភាពល្អឯកប្លែកខុសពីគេ៕
Account
Security
Favourite Content