សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
(សៀមរាប)៖ ក្នុងឱកាសប្រារព្ធយុទ្ធនាការអន្ទាក់សូន្យដំណាក់កាលទី២ នៅក្នុងខេត្តសៀមរាបនាថ្ងៃទី ២ ខែមិថុនា ឆ្នាំ២០២៣កន្លងទៅនេះ អង្គការពាក់ព័ន្ធ ក៏ដូចជាក្រសួងបរិស្ថានបានបញ្ជាក់ឲ្យដឹងពីការបន្ថែមពីសក្កានុពលទេសចរណ៍ដល់តំបន់ឧទ្យានអង្គរ។
លោក ជូរ៉ា ឌីណា ជាអនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា និងដែលជាសមាជិកម្នាក់នៅក្នុងគម្រោងដោះលែងសត្វព្រៃនៅក្នុងឧទ្យានអង្គរបានឲ្យដឹងថា គម្រោងដោះលែងសត្វព្រៃនៅឧទ្យានអង្គរគឺជាការសហការរវាងអាជ្ញាធរជាតិអប្សរា ជាមួយរដ្ឋបាលព្រៃឈើ និងអង្គការ Wildlife alliance។ ការងារនេះផងដែរត្រូវបានចាប់ផ្ដើមឡើងតាំងពីឆ្នាំ២០១៣មកម្លេះ ដែលមកដល់ពេលនេះបានដោះលែងសត្វជាច្រើនប្រភេទហើយ។
លោកបានបញ្ជាក់បន្ថែមថា ៖
“ការដោះលែងសត្វរយៈពេលកន្លងមក តាំងពីចាប់ផ្តើមរហូតមកទល់ពេលនេះ ធ្វើឲ្យឧទ្យានអង្គរយើង ក្រៅតែពីទេសចរណ៍បែបវប្បធម៌ប្រវត្តិសាស្ត្រ ឥឡូវនេះយើងមានទេសចរណ៍បែបធម្មជាតិមួយទៀតគឺទស្សនាព្រៃ និងសត្វព្រៃដែលយើងបានដោះលែងកន្លងមកនេះ។”
កន្លងមក គម្រោងខាងលើបានដោះលែងសត្វនៅក្នុងតំបន់ឧទ្យានអង្គរជាង ១០ប្រភេទមកហើយ ដែលសរុបទៅប្រហែលជាង ៤០ក្បាល បូកបញ្ចូលទាំងកូនៗដែលកើតថ្មីផង។ យ៉ាងណាមិញ ដោយសារតែតំបន់ឧទ្យានអង្គរជាតំបន់ទេសចរណ៍ស្រាប់ ដូច្នេះការរើសយកសត្វមកដាក់ គឺត្រូវឆ្លងកាត់ការវិនិច្ឆ័យយ៉ាងតឹងរឹង ដើម្បីធានាសុវត្ថិភាពជូនភ្ញៀវទេសចរ។ ជាក់ស្ដែងដូចជាការ ដោះលែងសត្វទោច ដែលជាសត្វស្លូតបូត មិនបង្កគ្រោះថ្នាក់ណាមួយដល់ភ្ញៀវជាដើម។
សម្រាប់គម្រោងបន្ទាប់ទៀត លោកបានឲ្យដឹងថា ៖
“យើងគ្រោងដោះលែងព្រើសនៅទីនេះ ព្រោះអនាគតនៅទីនេះដូចការងារតម្រង់ទិសរបស់រដ្ឋាភិបាលដែលឱ្យប្រជាជនរស់នៅតំបន់អង្គរទៅរុនតាឯកនោះមានន័យថាតំបន់អង្គរនឹងមានសុវត្ថិភាពជាងមុន។”
ស្រដៀងគ្នានេះដែរ ឯកឧត្តម នេត្រ ភក្ក្រា អ្នកនាំពាក្យនៃក្រសួងបរិស្ថានបានមានប្រសាសន៍ថា៖
“ការបង្កើតវត្តមានសត្វព្រៃក្នុងឧទ្យានអង្គរនេះ ជាការបង្កើនរបាយសត្វព្រៃនៅក្នុងតំបន់ព្រៃរបស់កម្ពុជា ហើយការបង្កើនតំបន់ព្រៃនេះ ក៏ដោយសារតែ ទី១យើងមានសុខសន្តិភាពពេញលេញ និងទី២ តំបន់នេះជាតំបន់មួយដែលមានសុវត្ថិភាព ដោយមានការការងារយ៉ាងតឹងរឹងពីអាជ្ញាធរជាតិអប្សារា យល់ថាជាតំបន់មានសុវត្ថិភាពខ្ពស់។”
ឈរក្រោមមូលហេតុនេះហើយ បានជាអង្គការសម្ព័ន្ធមិត្តសត្វព្រៃ ក៏ដូចជាអាជ្ញាធរជាតិអប្សារា សហការគ្នាក្នុងការលែងសត្វព្រៃមួយចំនួន ហើយប្រភេទសត្វព្រៃដែលលែងនៅទីនេះគឺ មួយចំនួនគឺមកពីមជ្ឈមណ្ឌលសង្គ្រោះសត្វព្រៃភ្នំតាម៉ៅ។
ឯកឧត្តមក៏បានលើកជាឧទាហរណ៍ជាក់ស្ដែងដែរថា កន្លងមកក៏ការលែងសត្វទោចចំនួន៨ក្បាល ដែលរហូតមកដល់ពេលនេះវាបានកើតកូនរហូតដល់ ៧បន្ថែមទៀត។ នេះបានបង្ហាញពីភាពជោគជ័យនៃគម្រោង ដែលធ្វើឲ្យចំនួនសត្វទោចមានការកើនឡើង។
ឯកឧត្តមបន្តមានប្រសាសន៍ថា៖
“អ្វីដែលយើងខិតខំបន្ថែមទៀត គឺយើងការពារជម្រករបស់វាឲ្យមានសុវត្ថិភាព សម្បូរចំណី និងមានប្រភពទឹក ហើយដើម្បីឲ្យមានការកកើតសត្វបន្ថែមទៀត យើងបានធ្វើយុទ្ធនាការអន្ទាក់សូន្យដើម្បីអប់រំប្រជាពលរដ្ឋឲ្យបានយល់ដឹងពីផលប៉ះពាល់ដែលចេញពីអន្ទាក់។”
ដោយឡែក សកម្មភាពទាំងនេះមិនត្រឹមតែជាការបង្កើនរបាយសត្វព្រៃប៉ុណ្ណោះទេ តែវាក៏ជាការបង្កើនមុខងារទេសចរណ៍ ដែលក្រៅពីទេសចរណ៍បែបវប្បធម៌ទៅ កម្ពុជាក៏មានទេសចរណ៍ធម្មជាតិ ដែលវានឹងបន្ថែមតម្លៃដល់តំបន់ឧទ្យានអង្គរឲ្យមានភាពលេចធ្លោកាន់តែខ្លាំងថែមទៀត។
រីឯការធ្វើយុទ្ធនាការអន្ទាក់សូន្យឯណោះវិញ ឯកឧត្តម និងក្រុមការងារបាន និងកំពុងព្យាយាមផ្សព្វផ្សាយ ជាពិសេសអប់រំប្រជាពលរដ្ឋ បង្វែរចំណាប់អារម្មណ៍របស់ពួកគេចេញពីការពឹងផ្អែកលើធនធាន ធម្មជាតិច្រើនហួសហេតុពេក តាមរយៈការផ្ដល់ជាជម្រើសការងារដែលមិនប៉ះពាល់ដល់ធនធានធម្មជាតិ៕
Account
Security
Favourite Content