សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះវិហារ ៖ បន្ទាប់ពីបទឈប់បាញ់បន្ទាន់រវាងកម្ពុជា- ថៃ បានចូលជាធរមាន ក្រុមការងាររបស់មន្ទីរសាធារណការ និងដឹកជញ្ជូន ខេត្តព្រះវិហារ បានចុះពិនិត្យភ្លាមៗនូវខ្សែផ្លូវក្នុងភូមិសាស្ត្ររបស់ខ្លួន ដែលរងការខូចខាតដោយគ្រាប់ផ្លោងរបស់យោធាថៃ ។ ជាលទ្ធផលក្រោយពេលពិនិត្យរួចរាល់ មានចំណាត់ផ្លូវចំនួន២ខ្សែប៉ុណ្ណោះ ដែលរងការខូចខាត ។ នេះបើតាមការបញ្ជាក់ពីឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន ។
យោងតាមឯកឧត្តម ផន រឹម បានបញ្ជាក់ថា ក្រោយបទឈប់បាញ់បន្ទាន់រវាង កម្ពុជា-ថៃ ចូលជាធរមានកាលពីវេលាម៉ោង២៤ឈានចូលថ្ងៃទី២៩ ខែកក្កដា ឆ្នាំ២០២៥ ក្រុមការងារមន្ទីរសាធារណការ និងដឹកជញ្ជូនខេត្តព្រះវិហារ បានចុះពិនិត្យលម្អិតខ្សែផ្លូវក្នុងភូមិសាស្ត្ររបស់ខ្លួនដែលខូចខាតដោយគ្រាប់ថ្លោងទាហានថៃ និងត្រៀមជួសជុលឲ្យបានទាន់ពេលវេលា ។
ឯកឧត្តមបន្តថា ក្នុងចំណោមកំណាត់ផ្លូវសរុប៩ខ្សែ ដែលបានត្រួតពិនិត្យ មានតែផ្លូវចំនួន២ខ្សែប៉ុណ្ណោះ ដែលរងការខូចខាត ក្នុងនោះមានផ្លូវខេត្តលេខ ២៦២៨ (ច្រកតាថាវ) និងផ្លូវខេត្តលេខ ២PVH៥ (ជាំក្សាន្ត – អានសេះ) ដោយសារគ្រាប់កាំភ្លើងធំធ្លាក់ចំ ។
ឯកឧត្តមបន្ថែមថា កំណាត់ផ្លូវខេត្តលេខ ២៦២៨ (ច្រកតាថាវ) មានករណីគ្រាប់កាំភ្លើងធំផ្លោងធ្លាក់ចំ ០១ ទីតាំង ត្រង់ចិញ្ចើមផ្លូវ នៅPK10+020 ហើយកំណាត់ផ្លូវខេត្តលេខ ២PVH៥ (ជាំក្សាន្ត – អានសេះ)៖ បានខូចដោយសារមានករណីគ្រាប់កាំភ្លើងធំផ្លោងធ្លាក់ចំ ០៣ ទីតាំង រួមមានទីតាំង១ស្ថិតនៅ PR2PVH5 PK05+320 ទីតាំងទី២ ស្ថិតនៅ PR2PVH5 PK06+660 និងទីតាំងទី៣ស្ថិតនៅ PR2PVH5 PK10+030 ។ ចំណែកឯផ្លូវជាតិ និងផ្លូវខេត្តផ្សេងទៀតដូចជា៖ ផ្លូវជាតិលេខ៦២, ផ្លូវជាតិលេខ ៩២, ផ្លូវខេត្តលេខ ២៦២៥, ផ្លូវខេត្តលេខ ២៦២៦, ផ្លូវខេត្តលេខ ២PVH២, ផ្លូវខេត្តលេខ ២PVH៧ និងផ្លូវខេត្តលេខ ២PVH៩ គឺពុំមានការខូចខាតដោយសារគ្រាប់កាំភ្លើងធំធ្លាក់ចំនោះឡើយ ។
គួរបញ្ជាក់ថា ស្ថានភាពផ្លូវក្នុងស្រុកជាំក្សាន្ត ខេត្តព្រះវិហារ គឺនៅមានសុវត្ថិភាពសម្រាប់ការធ្វើដំណើរបានធម្មតានៅលើកំណាត់ផ្លូវភាគច្រើន លើកលែងតែកំណាត់ផ្លូវមួយចំនួនតូចប៉ុណ្ណោះដែលត្រូវការជួសជុលដោយសារការខូចខាតខាងលើ ៕
Account
Security
Favourite Content