កំពង់ធំ៖ ក្នុងគោលដៅរក្សាឱ្យបាននូវស្ថិរភាពនៃកំណើនសេដ្ឋកិច្ច ជាពិសេសលើកម្ពស់វិស័យកសិកម្មឱ្យកាន់តែល្អប្រសើរ រាជរដ្ឋាភិបាលដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ បាន និងកំពុងយកចិត្តទុកដាក់ក្នុងការជំរុញ និងធ្វើពិពិធកម្មវិស័យមួយនេះយ៉ាងសកម្ម។ ជាក់ស្ដែង និយាយត្រឹមតែផ្នែកវារីវប្បកម្ម ដែលផ្តោតលើការផលិតពូជ និងចិញ្ចឹមត្រីទឹកសាប កំពុងបង្ហាញពីលទ្ធផលវិជ្ជមាន និងបន្តអនុវត្តតាមផែនការគួរឱ្យកត់សម្គាល់។

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានលើកឡើងថា រាជរដ្ឋាភិបាល បានផ្តល់អាទិភាពលើការលើកកម្ពស់វិស័យកសិកម្ម និងកសិ-ឧស្សាហកម្ម ដែលជាប្រភពនៃកំណើនសេដ្ឋកិច្ចដ៏សំខាន់ ជាមួយនឹងការអំពាវនាវដល់កសិករផ្នែកវារីវប្បកម្ម ក៏ដូចជាអ្នកប្រមូលទិញ អ្នកចែកចាយ អ្នកនាំចេញ និងអ្នកកែច្នៃ ឱ្យពង្រឹងសមត្ថភាព លើកកម្ពស់ផលិតភាព និងគុណភាព ដើម្បីឆ្លើយតបនឹងតម្រូវការទីផ្សារ។

ឯកឧត្តម ឧបនាយករដ្ឋមន្ត្រីបានមានប្រសាសន៍ថា ៖

« ក្រោមយុទ្ធសាស្ត្របញ្ចកោណដំណាក់កាលទី១ ដែលដឹកនាំដោយ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា រាជរដ្ឋាភិបាលបានផ្តល់អាទិភាពក្នុងការលើកកម្ពស់ និងបង្កើនវិស័យ​កសិកម្ម និងកសិឧស្សាហកម្មដែលបង្កើននូវតម្លៃបន្ថែម ដែលជាប្រភពសំខាន់នៃកំណើនសេដ្ឋកិច្ច។ កិច្ច​ខិត​ខំ​ប្រឹង​ប្រែង​ទាំង​នេះគឺ​មាន​គោលដៅ​ធ្វើ​ពិពិធកម្ម​មូលដ្ឋាន​សេដ្ឋកិច្ច ដើម្បី​លើក​កម្ពស់​ជីវភាព​រស់​នៅ​របស់​ប្រជាជន, បង្កើនតម្លៃសេដ្ឋកិច្ចបន្ថែម បង្កើតការងារ និងប្រាក់ចំណូល ជាពិសេស ធ្វើឱ្យសកម្មភាពសេដ្ឋកិច្ចកាន់តែរស់រវើក និងនិរន្តរភាព»។

ឯកឧត្តម វង្សី វិស្សុត បានថ្លែងបន្តថា ៖ បច្ចុប្បន្ន ក្រុមការងារកំពុងសិក្សាពីបញ្ហាប្រឈមនានា និងដំណោះស្រាយ ខណៈកំពុងរៀបចំផែនការមេសម្រាប់ប្រព័ន្ធអេកូឡូស៊ីវារីវប្បកម្ម ដែលតភ្ជាប់ខ្សែច្រវាក់ផលិតកម្មទាំងមូល ចាប់ពីការផលិតពូជ និងការបង្កាត់ពូជ ការចិញ្ចឹម រហូតដល់ការកែច្នៃ និងធ្វើទីផ្សារដែលមានការប្រកួតប្រជែង ជាពិសេសជំរុញឱ្យមានការនាំចេញកាន់តែច្រើន។​

ឯកឧត្តមបានបញ្ជាក់យ៉ាងដូច្នេះថា ៖

«យើងមិនគួរនាំចូលនូវអ្វីដែលយើងអាចផលិតបានដោយខ្លួនឯង និងអាចប្រកួតប្រជែងនោះទេ។ តាមរយៈការពង្រឹងសមត្ថភាពក្នុងស្រុក យើងអាចបង្កើតការងារ បង្កើនប្រាក់ចំណូល និងលើកកម្ពស់ជីវភាពរស់នៅរបស់ប្រជាជនយើងបាន»។

លោក តាន់ វណ្ណា ម្ចាស់កសិដ្ឋានចិញ្ចឹមត្រីនៅក្នុងស្រុកស្ទោង ខេត្តកំពង់ធំ ដែលបានបើកដំណើរការរយៈពេល៣ឆ្នាំមកហើយមកហើយនោះ មានផ្ទៃដីសរុបទំហំ ៨០ហិកតា និងមានស្រះចិញ្ចឹមត្រីសរុប៩៦ស្រះ ក្នុងនោះស្រះចិញ្ចឹមត្រីរ៉ស់ចំនួន៨៧, ត្រីអណ្ដែងចំនួន ៣ស្រះ, ត្រីប្រាចំនួន ៣ស្រះ, ត្រីសុងហ៊ឺចំនួន ៣ស្រះ ហើយមានសមត្ថភាពផលិតជាមធ្យមចំនួន២៧តោនក្នុងមួយថ្ងៃ ។ កសិដ្ឋានមួយនេះ​ បាន​ផ្គត់ផ្គង់​ត្រី​ទៅកាន់​រាជធានី​ភ្នំពេញ ខេត្ត​បន្ទាយមានជ័យ និងតាមបណ្តាខេត្តមួយចំនួន​ទៀត ហើយ​ក៏​បាន​នាំ​ចេញ​ទៅ​កាន់ទីផ្សារ​អន្តរជាតិ​ផង​ដែរ ។

លោកបានបញ្ជាក់ឱ្យដឹងទៀតថា ស្រុកស្ទោង គឺជាមជ្ឈមណ្ឌលដ៏សំខាន់សម្រាប់វិស័យវារីវប្បកម្ម ជាពិសេស ការកែច្នៃត្រីទៅជាត្រីសម្រាប់ផ្គត់ផ្គង់នៅក្នុងស្រុក និងការនាំចេញ ដែលមានគ្រួសារជាអ្នកចិញ្ចឹមត្រីចំនួន ១១៥គ្រួសារ និងមានសិប្បកម្មកែច្នៃត្រីចំនួន ៦៥ទីតាំង។