ភ្នំពេញ៖ ក្រោមក្របខណ្ឌគោលនយោបាយពាណិជ្ជកម្មកម្ពុជា ឆ្ពោះទៅឆ្នាំ២០៣០ ដែលមានគោលបំណងបង្កើតជាយុទ្ធសាស្ត្រ និងទិសដៅនយោបាយ ដើម្បីដោះស្រាយបញ្ហាប្រឈមក្នុងវិស័យពាណិជ្ជកម្មនាពេលបច្ចុប្បន្ន និងអនាគត ស្របតាមយុទ្ធសាស្រ្តបញ្ចកោណដំណាក់កាលទី១ ដើម្បីកម្ពុជាត្រៀមខ្លួនចាកចេញពីប្រទេសអភិវឌ្ឍន៍តិចតួចនៅឆ្នាំ ២០​២​៩ ​ក្រសួងពាណិជ្ជកម្ម ទទួលបានការគាំទ្រទាំងផ្នែកហិរញ្ញវត្ថុ និងបច្ចេកទេសពីដៃគូអភិវឌ្ឍន៍ ក្នុងគោលដៅលើកស្ទួយវិស័យពាណិជ្ជកម្មកម្ពុជាតាមរយៈគម្រោងធំៗចំនួន៦។

យោងតាមរបាយការណ៍របស់ក្រសួងពាណិជ្ជកម្ម បានឱ្យដឹងថា៖ គម្រោងជំនួយដែលបានទទួលការគាំទ្រទាំង៦នោះ រួមមាន៖ ១)គម្រោងរៀបចំក្របខ័ណ្ឌគោលនយោបាយពាណិជ្ជកម្មកម្ពុជាឆ្ពោះទៅឆ្នាំ ២០៣០ និងសិក្សា​ពីសមិទ្ធិលទ្ធភាពធ្វើកិច្ចព្រមព្រៀងពាណិជ្ជកម្មសេរីកម្ពុជា-ស្វីស គាំទ្រដោយ EIF ,២) គម្រោងបង្កើតថ្នាលកិច្ចព្រមព្រៀងពាណិជ្ជកម្មសេរី (FTAs Portal) គាំទ្រដោយមូលនិធិ CAPREDដែលជាជំនួយរបស់ DFAT Australia, ៣) គម្រោង AIMS ជំហានទី២ គាំទ្រដោយមូលនិធិអន្តរជាតិសម្រាប់ការអភិវឌ្ឍន៍កសិកម្ម (IFAD), ៤) គម្រោងផ្សព្វផ្សាយ​កិច្ចព្រមព្រៀង RCEP និង AANZFTA ទៅវិស័យឯកជន និងភាគីពាក់ព័ន្ធ និងគម្រោងពង្រឹងការធ្វើពាណិជ្ជកម្មអេឡិចត្រូនិកជនបទ គាំទ្រដោយមូលនិធិអភិវឌ្ឍន៍ពាណិជ្ជកម្មតំបន់ (RT4D) ដែលជាជំនួយរបស់ DFAT Australia ,៥) អនុកម្មវិធីទី៣ នៃកម្មវិធីពង្រឹងភាពប្រកួតប្រជែងពាណិជ្ជកម្មគាំទ្រដោយ ADB, ៦) គម្រោង EU-German GATE ដែលជាជំនួយរបស់រដ្ឋា​ភិ​បាល​​អាល្លឺម៉ង់ និងសហភាពអឺរ៉ុប ដើម្បីរៀបចំ និងអនុវត្តគោលនយោបាយពាណិជ្ជកម្ម,កិច្ចសម្រួលពាណិជ្ជកម្ម, ការគ្រប់គ្រងហានិភ័យ, ពាណិជ្ជកម្មសេដ្ឋកិច្ចឌីជីថល និងបង្កើនភាពប្រកួតប្រជែងរបស់សហគ្រាស ធុនតូចនិងមធ្យម។

ក្របខ័ណ្ឌគោលនយោបាយពាណិជ្ជកម្មកម្ពុជា ឆ្ពោះទៅឆ្នាំ២០៣០ មានសសរស្តម្ភចំនួន៦ ៖ – សសរស្តម្ភទី១៖ ការធ្វើសមាហរណកម្មពាណិជ្ជកម្មទៅក្នុងសេដ្ឋកិច្ចពិភពលោក – សសរ​ស្តម្ភទី២៖ ការពង្រឹងភាពប្រកួតប្រជែងពាណិជ្ជកម្មក្នុងទីផ្សារសកល – សសរស្តម្ភទី៣៖ ការលើកកម្ពស់ពាណិជ្ជកម្មប្រកបដោយបរិយាប័ន្ន និងចីរភាព – សសរស្តម្ភទី៤៖ ការជំរុញ និងការអភិវឌ្ឍពាណិជ្ជកម្មឌីជីថល – សសរស្តម្ភទី៥៖ ការអភិវឌ្ឍពាណិជ្ជកម្មតាមវិស័យគោលដៅ – សសរស្តម្ភទី៦៖ ការត្រៀមខ្លួនសម្រាប់ការចាកចេញពីប្រទេសអភិវឌ្ឍន៍តិចតួច។ បន្ថែមពីនេះ ក្របខ័ណ្ឌគោលនយោ​បាយនេះ ក៏មានគោលដៅជំរុញ និងពន្លឿនកំណើនសេដ្ឋកិច្ច តាមរយៈការកែលម្អបរិយាកាសពាណិជ្ជកម្ម និងហេដ្ឋារចនាសម្ព័ន្ធពាណិជ្ជកម្ម រក្សាទីផ្សារ​ចាស់ និងពង្រីកទីផ្សារថ្មី និងជំរុញការអភិវឌ្ឍពាណិជ្ជកម្មតាមវិស័យគោលដៅផងដែរ។

សូមជម្រាបថា ថ្នាលព័ត៌មានកិច្ចព្រមព្រៀងពាណិជ្ជកម្មសេរីកម្ពុជា​​ ត្រូវបានបង្កើតដើម្បីជួយសម្រួលឱ្យធុរជន វិនិយោគិន ផលិតករ អ្នកសិក្សាស្រាវជ្រាវ និងសាធារណជន​ អាចចូលប្រើប្រាស់ និងស្វែងរកព័ត៌មាន ពីកិច្ចព្រមព្រៀងពាណិជ្ជកម្មសេរី ដែលកម្ពុជាជាសមាជិក។

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មបញ្ជាក់ថា រដ្ឋាភិបាលអូស្ត្រាលី មានចំណែកក្នុងការបង្កើតថ្នាលព័ត៌មានកិច្ចព្រមព្រៀងពាណិជ្ជកម្មសេរីកម្ពុជា​​ តាមរយៈកម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍសេដ្ឋកិច្ច ប្រកបដោយភាពធន់។

លោកជំទាវរដ្ឋមន្ត្រី បានបន្តថា៖

«ថ្នាលព័ត៌មាននេះ នឹងជួយឱ្យពាណិជ្ជករ អ្នកវិនិយោគ និងភាគីពាក់ព័ន្ធ ទទួលបានការយល់ដឹងពីកិច្ចព្រម ព្រៀងពាណិជ្ជកម្មសេរី ដែលកម្ពុជាជាសមាជិក, ការយល់ដឹងពីស្ថានភាព និងនីតិវិធីនៃការនាំចេញ និងការជំរុញការធ្វើសេរីភាវូបនីយកម្មពាណិជ្ជកម្ម និងបង្កើនកិច្ចសហប្រតិបត្តិការសេដ្ឋកិច្ច»។

ឯកឧត្តម ប៉ែន សុវិជាតិ រដ្ឋលេខាធិការក្រសួងពាណិជ្ជកម្ម បានឱ្យដឹងថា គម្រោងជំរុញទីផ្សារសម្រាប់កសិកម្មខ្នាតតូច (AIMS) ជំហានទី២ កំពុងបន្តជំរុញផលិតកម្ម និងផលិតផលប្រណិតរបស់កសិករខ្នាតតូច ដើម្បីឆ្លើយតបនឹងតម្រូវការទីផ្សារ ខណៈដែលគម្រោង AIMS ជំហានទី១ ត្រូវបានអនុវត្តសម្រេចដោយជោគជ័យ។

ឯកឧត្តមរដ្ឋលេខាធិការ បានបញ្ជាក់ថា អេមស៍( AIMS) គឺជាគម្រោងអនុវត្តដោយក្រសួងពាណិជ្ជកម្ម ដែលជាគំនិតផ្តួចផ្តើមរួមគ្នារបស់រាជរដ្ឋាភិបាលកម្ពុជា និង IFAD ក្នុងគោលបំណងជំរុញកំណើនទីផ្សារប្រកបដោយបរិយា​ប​ន្ន សម្រាប់ផលិតផលកសិកម្មដែលមានតម្លៃខ្ពស់ និងការអភិវឌ្ឍចង្កោមអាជីវកម្មតាមជនបទ ដែលអ្នកផលិតជាក្រុមកសិករខ្នាតតូច ក្នុងនោះកសិករក្រីក្រ ក៏អាចទទួលបានផលប្រយោជន៍រួមគ្នា។

មកដល់ពេលនេះ គម្រោងនេះបាន និងកំពុងជួយគាំទ្រដល់កសិករខ្នាតតូចចំនួន ៩៤,៤៩៩ គ្រួសារ លើសពីគោលដៅកំណត់ត្រឹមចំនួន៨៨,២០០គ្រួសារ សម្រាប់ការអនុវត្តគម្រោងរហូតដល់ឆ្នាំ២០​២​៧​។ គម្រោង នៅតែបន្តគាំទ្រកសិករខ្នាតតូច ក្នុងការអនុវត្តបច្ចេកទេសផលិតកម្មដែលមានភាពប្រសើរ ជួយសម្របសម្រួលទីផ្សារឱ្យកាន់តែរឹងមាំ និងពង្រីកភាពជាដៃគូពាណិជ្ជកម្មឱ្យបានកាន់តែទូលំទូលាយផងដែរ៕