សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ មហាវិថីសំរោង ដែលស្ថិតនៅក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ ត្រូវបានដាក់ឱ្យប្រើប្រាស់ជាផ្លូវការនៅព្រឹកថ្ងៃទី២១ សីហា ២០២៣ ។ មហាវិថីនេះ មានប្រវែងតែជាង៥គីឡូម៉ែត្រប៉ុណ្ណោះ ប៉ុន្តែវាគឺជាសរសៃឈាមដ៏សំខាន់នៅភាគខាងជើងរាជធានីផ្នំពេញ ដោយតភ្ជាប់ពីផ្លូវជាតិលេខ៥ ឆ្ពោះទៅកាន់ផ្លូវក្រវាត់ក្រុងទី៣ និងភ្ជាប់ទៅផ្លូវល្បឿនលឿនភ្នំពេញ ក្រុងព្រះសីហនុ ។
បើតាមឯកឧត្តម ឃួង ស្រេង អភិបាលរាជធានីភ្នំពេញបានមានប្រសាសន៍នៅក្នុងពិធីសម្ពោធជាផ្លូវការឱ្យដឹងថា មហាវិថី សំរោងនេះ នឹងក្លាយជាមុខមាត់ថ្មី ក៏ដូចជាសរសៃឈាមដ៏សំខាន់ នៅភាគខាងជើងរាជធានីភ្នំពេញ ដោយតភ្ជាប់ពីផ្លូវជាតិលេខ៥ ឆ្ពោះទៅកាន់ផ្លូវក្រវាត់ក្រុងទី៣ កាត់តាមបុរីភូមិសំរោង ដែលបានជួយសម្រួលដល់ចរាចរណ៍មួយផ្នែកធំនៅតំបន់ស្ពានព្រែកព្នៅ ។
ឯកឧត្តមមានប្រសាសន៍ថា មហាវិថីនេះ មានប្រវែងតែជាង៥គីឡូម៉ែត្រប៉ុណ្ណោះ តភ្ជាប់ពីផ្លូវជាតិលេខ៥ មកកាន់ផ្លូវ១៣០ត្រង់ផ្លូវទំនប់កប់ស្រូវ ដែលជាផ្លូវក្រវាត់ក្រុងទី ៣ ។ វានឹងជួយសម្រួលដល់ការធ្វើដំណោះររបស់ប្រជាជនគ្រប់បណ្ដាខេត្តក្នុងប្រទេសកម្ពុជា ជាពិសេសវានឹងតភ្ជាប់ទៅកាន់ផ្លូវល្បឿនលឿនភ្នំពេញ ក្រុងព្រះសីហនុ ។
បើតាមអ្នកជំនាញនៃវិស័យអចលនទ្រព្យបានមើលឃើញថាតំបន់ប៉ែកខាងជើងមួយរយៈចុងក្រោយនេះ ហាក់មានការរីកលូតលាស់លឿន ជាពិសេសហេដ្ឋារចនាសម្ព័ន្ធថ្មីៗត្រូវបានលេចរូបរាងជាបន្តបន្ទាប់ ដែលធ្វើឱ្យតំបន់នោះ កាន់តែមានភាពទាក់ទាញពីសំណាក់វិនិយោគក្នុងនិងក្រៅប្រទេសជាច្រើន ។
លោកស្រីហ្គ្រេស រចនីហ្វុង អគ្គនាយិកាក្រុមហ៊ុន Century 21 Cambodia បានលើកឡើងថា តំបន់ប៉ែកខាងជើងមានការទាក់ទាញអ្នកវិនិយោគជាច្រើន ដោយសារតែកត្តាមួយចំនួន ដូចជាពហុកីឡដ្ឋានជាតិមរតកតេជោ វិមានឈ្នះឈ្នះ សមិទ្ធផលផ្លូវជាច្រើនខ្សែនៅប៉ែកខាងជើង ត្រូវបានសាងសង់និងដាក់ដំណើរការជាបន្តបន្ទាប់ ។
លោកស្រីបន្តថា នៅពេលស្ថានភាពសេដ្ឋកិច្ចបានល្អឡើងវិញ តំបន់ប៉ែកខាងជើងរាជធានីភ្នំពេញ នឹងទាក់ទាញអ្នកវិនិយោគបរទេសកាន់តែច្រើនទៀត ជាពិសេសទៅលើការអភិវឌ្ឍលំនៅឋាន ជាក់ស្ដែងនៅតំបន់តាមបណ្ដោយផ្លូវជាតិលេខ៦អា នាពេលបច្ចុប្បន្នកំពុងមានភាពទាក់ទាញការអភិវឌ្ឍលំនៅឋានប្រភេទតម្លៃខ្ពស់ៗ និងមានគម្រោងអភិវឌ្ឍន៍លមនៅឋាន ។
អ្នកជំនាញជាច្រើនទៀត បានលើកឡើងផងដែរ ការសាងសង់ហេដ្ឋារចនាសម្ព័ន្ធ ជាពិសេសផ្លូវ បានទាក់ទាញវិនិយោគិនចូលទៅអភិវឌ្ឍន៍ទីនោះ ជាក់ស្ដែងនៅពេលរដ្ឋាភិបាលមានគម្រោងសាងសង់ផ្លូវធំៗនៅតំបន់ណា នៅតំបន់នោះតែងតែឃើញមានគម្រោងអភិវឌ្ឍន៍ថ្មីជាច្រើនរីកដុះដាលជាបន្តបន្ទាប់ ៕
Account
Security
Favourite Content