សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ការកែច្នៃប្លាស្ទីកនៅក្នុងស្រុកបច្ចុប្បន្ននេះនៅមានកម្រិតតិចតួចនៅឡើយ ដូច្នោះហើយរាល់ការកែច្នៃទាំងអស់សុទ្ធតែទទួលបានការលើកទឹកចិត្តពីអ្នកពាក់ព័ន្ធ។ បើតាមរបាយការណ៍ពីក្រសួងបរិស្ថាន សំណល់ប្លាស្ទីក ដែលត្រូវបានចោលទៅក្នុងបរិស្ថាន មានត្រឹមតែប្រមាណ ២០ភាគរយប៉ុណ្ណោះ ដែលត្រូវបានយកមកកែច្នៃ។
ដោយចង់រួមចំណែកក្នុងការកាត់បន្ថយការប្រើប្រាស់ប្លាស្ទីក ក៏ដូចជាមានចំណែកជួយបង្កើតការងារជូនប្រជាពលរដ្ឋក្នុងសហគមន៍ បុរសម្នាក់បានប្រមូលយកប្លាស្ទីកទៅបង្កើតចេញជាអំបោសសម្រាប់ប្រើប្រាស់ឡើងវិញ។
បើតាមការឱ្យដឹងពីលោក ហាស់ គា ដែលជាម្ចាស់សិប្បកម្មអំបោសប្លាស្ទីក បានឱ្យដឹងថា ដោយមើលឃើញពីតម្រូវការនៃការប្រើប្រាស់អំបោសច្រើន លោកបានបង្កើតសិប្បកម្មកែច្នៃនេះកាលពីឆ្នាំ២០២៣ ហើយម្យ៉ាងទៀត អំបោសដែលធ្វើពីប្លាស្ទីកនេះមានគុណភាពល្អ ដែលអាចប្រើប្រាស់បានយូរជាងអំបោសធម្មតា។
អំបោសដែលមានដងធ្វើពីឬស្សី និងមានមុខជាសសៃៗកើតចេញពីដបប្លាស្ទីក ជាសមិទ្ធផលចេញពីការអង្គុយក្រងយ៉ាងផ្ចិតផ្ចង់របស់ស្ត្រីដែលមានចំណាស់ៗនៅក្នុងសហគមន៍ ដែលកន្លងមកធ្លាប់តែនៅផ្ទះ មិនអាចរកចំណូលបាន។
លោក ហាស់ គា បានបន្តឱ្យដឹងទៀតថា ៖
«បង្កើតបានជិតមួយឆ្នាំនេះ យើងបានជួយទាំងបរិស្ថាន ហើយក៏បានបង្កើតការងារជូនដល់អ៊ុំៗស្ត្រីចំណាស់ៗដែលមិនមានចំណូលផងដែរ។ ជាក់ស្ដែង បច្ចុប្បន្ន សិប្បកម្មដែលមានទីតាំងស្ថិតនៅខណ្ឌពោធិ៍សែនជ័យ រាជធានីភ្នំពេញមួយនេះ មានបុគ្គលិក ៧ ទៅ ៨នាក់ ដោយខ្ញុំគិតជាភាគរយជូនពួកគាត់ ហើយចំណូលជាមធ្យម គឺចន្លោះពី ២៣០០០រៀល ទៅ ២៥០០០រៀលក្នុងមួយថ្ងៃ រីឯអំបោសដែលពួកគាត់ក្រងបានគឺ ចន្លោះពី ៣០ ទៅ ៤០អំបោស»។
ជាមួយគ្នានេះដែរ លោកក៏បានផ្ដល់សេរីភាពក្នុងការធ្វើការដល់បុគ្គលិក និងក្រុមការងារ ដោយបង្ហាត់បង្រៀនពួកគេឱ្យចេះ ក្រង បន្ទាប់មកពួកគេអាចយកប្លាស្ទីកនោះទៅក្រងនៅផ្ទះរៀងខ្លួនក៏បាន។ ដោយឡែក សម្រាប់វត្ថុធាតុដើមវិញ គឺលោកប្រមូលទិញពីអ្នករស់នៅក្នុងតំបន់នោះតែម្ដង ដោយលោកឱ្យតម្លៃក្នុងមួយគីឡូ ១៥០០រៀល ដែលថ្លៃជាងការលក់ឱ្យអេតចាយ។
ចំពោះការគាំទ្រវិញ លោក ហាស់ គា បានឱ្យដឹងថា សិប្បកម្មលោកមានការបញ្ជាទិញពីបងប្អូននៅក្នុងស្រុកច្រើន ទាំងដុំ និងរាយ ដោយសារតែអំបោសប្លាស្ទិកនេះអាចប្រើជាប់បានយូរ ដែលមានតម្លៃចាប់ពី១៥០០០រៀលឡើងទៅ។ ក្រៅពីនោះ ក៏មានការបញ្ជាទិញដាក់ទីវត្តអារាម និងសាលារៀនផងដែរ ដោយកន្លងមកន្លែងទាំងនេះធ្លាប់តែចំណាយថវិកាជាញឹកញាប់លើការទិញអំបោស។
យ៉ាងណាក៏ដោយ ជាក់ស្ដែង បើទោះបីជាវាមានតម្លៃថ្លៃជាងអំបោសទូទៅបន្តិចក្ដី ប៉ុន្តែអ្នកប្រើប្រាស់អាចចំណេញថវិកា ដោយមិនចាំបាច់ត្រូវទិញច្រើនដង ម្យ៉ាងអតិថិជនដែលទិញអំបោសនេះសុទ្ធតែមានចំណែកចូលរួមគាំទ្រជីវភាពសហគមន៍ និងចូលរួមគាំទ្រការកែច្នៃសំរាមប្លាស្ទីកផងដែរ៕
Account
Security
Favourite Content