ភ្នំពេញ ៖​ ​របាយការណ៍​ពី​ក្រសួងពាណិជ្ជកម្ម បាន​បង្ហាញថា ចាប់ពី​ខែមករា ដល់ ខែ​មីនា ឆ្នាំ​២០២៣ ​នេះ ការនាំចេញ​ផលិតផល​ដំឡូង​មី និង​ម្សៅ​មីរបស់​កម្ពុជាទៅ​ក្រៅប្រទេស សម្រេចបាន​ក្នុង​ទំហំ​ទឹក​ប្រាក់ជាង​ ២៨៥​ លាន​ដុល្លារ កើនឡើង​ជិត ​៣០​ភាគរយ ធៀប​នឹង​រយៈពេល​ដូចគ្នាក្នុង​ឆ្នាំ​២០២២ ដែលមាន​ទឹកប្រាក់​ប្រមាណ​ជាង ​២២១​ លាន​ដុល្លារ​។​

​ក្រសួងកសិកម្ម រុក្ខាប្រមាញ់ និង​នេសាទ បានឱ្យដឹងថា ចំពោះ​បរិ​មាណនៃ​ការនាំចេញដំឡូង​មី​ស្រ​ស់​នៅក្នុង​រយៈពេល​៣​ខែ ដើមឆ្នាំ​នេះ មាន​ចំនួន ១៥៥ ២១០​តោន ក្នុងនោះ​នាំចេញ​ទៅ​វៀតណាម ១៣១ ៧១០​តោន និង​ថៃ​ ២៣ ៥០០​តោន​។ ​ដោយឡែក​ម្សៅដំឡូង​មី មាន​ចំនួន​ជាង ១៤ ៧០១​តោន ក្នុងនោះ​នាំចេញ​ទៅ​ចិន​ចំនួន ១៤ ៦៤២ តោន ,​ជប៉ុន​ជាង ​២៥​តោន ,​អ៊ីតាលី ១៧​តោន និង​ឥណ្ឌា​១៧​តោន​។ ចំណែក​ការនាំចេញ​កាកសំណល់​ដំឡូង​មី​វិញ នាំចេញ​បាន​៣៨ ២៥២​តោន ដោយ​នាំទៅ​វៀតណាម ៣០ ៥០០​តោន ​ថៃ ៧ ១០០​តោន​ និង​ចិន ៦៥២​តោន​។​

​មន្ទីរ​កសិកម្ម​ខេត្តបាត់ដំបង បាន​ឱ្យដឹង​ បរិមាណ​ដំឡូង​មី ដែល​នាំចេញ​ក្នុង​រយៈ​ពេ​លេ​ដើមឆ្នាំ​២០២៣​នេះ គឺជា​ដំឡូង​មី​ដែល​បាន​ពី​ការប្រមូល​ផលកាល​ពី​ឆ្នាំ​២០២២​កន្លងទៅ ដោយសារតែ​កសិករ​ត្រូវ​ទុក​ពូជ​សម្រាប់​ដាំ​ដុះ​នៅ​ឆ្នាំ​បន្ទាប់ ដែលមាន​ទាំង​មើម និង​ដើម ខណៈដែល​ការដាំដុះ​ដំឡូង​មី​ត្រូវ​ចំណាយពេល​១០​ខែ​ទៅ​១​ឆ្នាំ ដើម្បី​អាច​ប្រមូល​ផល​បាន​។ ​ដើមឆ្នាំនេះការប្រមូល​ផល​ដំឡូង​មី ខេត្តបាត់ដំបង មាន​ប្រមាណ​១០​ទៅ​២០​ភាគរយ​ប៉ុណ្ណោះ នៅក្នុង​ចំណោម​ផ្ទៃដី​ដាំដំឡូង​មី​សរុប​ជាង​១០​ម៉ឺន​ហិកតា ជា​ដំឡូង​មី​ដែល​នៅ​សេសសល់​ពី​ការប្រមូល​ក្នុង​ឆ្នាំ​ចាស់​។ ​ចំណែក​​​តម្លៃ​ដំឡូង​មី​ក្រៀម​បច្ចុប្បន្ន គឺមានតម្លៃ​៦០០​ទៅ​៧០០​រៀល​ក្នុង​១​គីឡូ​។​

ដោយឡែកថ្ងៃទី១១ ខែមីនា ឆ្នាំ២០២៣កន្លងទៅ សហភាពសហគមន៍បន្លែសុវត្ថិភាពកម្ពុជា និងក្រុមហ៊ុន Global Ecological Rice (Cambodia) Co., Ltd. របស់ភាគីចិន បានចុះអនុស្សរណៈយោគយល់ និងកិច្ចសន្យាផលិតកម្មកសិកម្មដំឡូងមីកម្ពុជា ដើម្បីជំរុញការនាំចេញដំឡូងមីទៅកាន់ទីផ្សារប្រទេសចិន។

 GER (Cambodia) Co.,Ltd. ត្រូវបានបង្កើតនៅកម្ពុជា ហើយបានប្រកបអាជីវកម្មជាចម្បងលើការទិញ និងនាំចេញអង្ករកម្ពុជាទៅកាន់ប្រទេសចិន។ ក្រុមហ៊ុនGlobal នៅកម្ពុជា ក៏បានសហការជាមួយក្រុមហ៊ុនកែច្នៃដំឡូងមី អឺខាង ដែលអភិវឌ្ឍន៍ផ្នែកបច្ចេកទេស ហើយក្រុមហ៊ុននេះក៏បានវិនិយោគនៅខេត្តបាត់ដំបងចំនួន២ពាន់លានយ័ន ក្នុងឆ្នាំ២០១៣ ដោយកសាងសួនកសិកម្មដែលមានផ្ទៃដី ២ពាន់ហិកតា។

ខេត្តក្រចេះថ្មីៗ​នេះ​​ថា តម្លៃដំឡូងមី​ឆ្នាំនេះ​កើនលើស​ឆ្នាំ​មុន ដោយ​ដំឡូងមីស្រស់អាច​លក់ចេញ​​បាន​ចន្លោះពី ៣០០-៥០០រៀល/គីឡូ និងដំឡូងមីក្រៀមតម្លៃចន្លោះពី ៨០០-៩០០ រៀល/គីឡូ។

​​របាយការណ៍របស់​រដ្ឋបាលខេត្តក្រចេះនៅ​ក្នុងសន្និសីទ​ ​​«ភាព​ជោគជ័យ​រយៈ​ពេល ៥ ​ឆ្នាំ​របស់​ខេត្ត​ក្រចេះ» ​ខេត្តក្រចេះ​មាន​​ក្រុមហ៊ុន​ចំនួន ៤៨ ក្រុមហ៊ុន បាន​​មក​វិនិយោគ​សម្បទាន​ដី​សេដ្ឋកិច្ចលើ​ផ្ទៃ​ដី ១៩៨.៩៧០ ហិកតា ដែល​ក្នុង​នោះ​ ​ការ​ដាំ​ដុះ​កៅស៊ូ​, ចេក​អំបូង​លឿង​ អំពៅ ម៉ៃសាក់ ស្វាយចន្ទី និង​ឈើ​ហូបផ្លែ និងដំឡូង​មី​ចំនួន ១.០០០ហិកតា។

ដោយឡែកខេត្តព្រះវិហារបើតាមលោកពឹង ទ្រីដា bjrFanប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ព្រះវិហារ បានឱ្យដឹងថាសហគមន៌កសិកម្មចំនួន០៦ ក្នុងខេត្តព្រះវិហារ កំពុងមមាញឹកប្រមូលផលដំឡូងមីចំណិតក្រៀមលក់ជូនក្រុមហ៊ុន Heng Klang Public Company Limited(Thailand) តាមកិច្ចសន្យា។ តម្លៃដែលសហគមន៌ទទួលបាន ដំឡូងមីស្ងួតតម្លៃ ២៣០$/តោន ប្រមាណ៩៥០៛/គីឡូក្រាម។ ក្រុមហ៊ុនបានប្រមូលទិញដំឡូងមីដឹកជញ្ជូននាំចេញទៅព្រះរាជាណាចក្រថៃ ដោយចុះកិច្ចសន្យាផ្ទាល់ជាមួយសហគមន៌កសិកម្ម។

សូមបញ្ជាក់ថា រដ្ឋាភិបាលកម្ពុជា ​បាន​​ប្រកាស​ដាក់​ចេញ​គោលនយោបាយជាតិស្តីពីដំឡូងមី ឆ្នាំ២០២០-២០២៥ ដើម្បី​ប្រែក្លាយ​កម្ពុជាក្លាយជាទីតាំងផលិត កែច្នៃ និងជាអ្នកផ្គត់ផ្គង់ផលិតផលដំឡូងមី ដោយគោលនយោបាយជាតិនេះ មានគោលដៅសំខាន់ចំនួន៣ គឺទី១- ការផ្លាស់ប្តូរពីផលិតកម្មដំឡូងមីបែបប្រពៃណីឬគ្រួសារ ឱ្យទៅជាផលិតកម្មដំឡូងមីបែបពាណិជ្ជកម្ម ទី២- ការគាំទ្រដល់អ្នកកែច្នៃផលិតផលដំឡូងមីឱ្យមានសក្តានុពល​ និងទាក់ទាញវិនិយោគ ដើម្បីកែច្នៃផលិតផលពីដំឡូងមី ដែលមានតម្លៃបន្ថែមខ្ពស់សម្រាប់ផ្គត់ផ្គង់ទីផ្សារ និង​គោលដៅ​​ទី៣- ការលើកកម្ពស់ភាពប្រកួតប្រជែងពាណិជ្ជកម្ម តាមរយៈការជ្រៀតចូលនិងចាប់យកចំណែកទីផ្សារ ដោយផ្សារភ្ជាប់ទៅនឹងអន្តរវិស័យដែលពាក់ព័ន្ធក្នុងការនាំចេញ៕