សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ លោកបណ្ឌិត យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងថា សហគមន៍ផលិតកម្មកសិកម្មស្រូវផ្សារភ្ជាប់មកទីផ្សារ (សហគមន៍កសិកម្មទំនើប)នឹងជួយដោះស្រាយបញ្ហាប្រឈមជាច្រើនរបស់កសិករដូចជាការចំណាយទុន និងបំណុល ជួយបង្កើនទិន្នផល និងពង្រីកទីផ្សារ។
ឯកឧត្តមរដ្ឋលេខាធិការបានឱ្យដឹងទៀតថា សហគមន៍កសិកម្មទំនើប ក៏នឹងនាំមកនូវផលប្រយោជន៍ជាច្រើនទៀតជូនកសិករដូចជា៖ ១)បង្កើនផលិតភាពរបស់ដីស្រែ, ២)កាត់បន្ថយថ្លៃដើមផលិតស្រូវ, ៣)ងាយស្រួលចូលទីផ្សារ និងទទួលបានតម្លៃសមរម្យ, ៤) កាត់បន្ថយបន្ទុករបស់កសិករក្នុងការធ្វើស្រែ និងមានឱកាសរកចំណូលបន្ថែមពីប្រភពផ្សេងទៀត និង ៥)បង្កើនប្រាក់ចំណូលដល់កសិករ និងសមត្ថភាពប្រកួតប្រជែងរបស់វិស័យស្រូវអង្ករ។
ឯកឧត្តមបណ្ឌិត យ៉ង សាំងកុមារ បានបញ្ជាក់ថា ៖ ការកសាងសហគមន៍ផលិតកម្មកសិកម្មបានជោគជ័យអាស្រ័យលើការចូលរួមដោយប្រសិទ្ធភាពពីកសិករ និងភាគីពាក់ព័ន្ធ និងធនធានមនុស្សជាអ្នកជំនាញក្នុងការគាំទ្រ និងធ្វើការគ្របគ្រងអាជីវកម្មរបស់សហគមន៍ ខណៈដែលមានការតាំងចិត្តថា នឹងខំធ្វើកិច្ចការនេះឲ្យបានល្អដោយចាប់ផ្តើមពីសហគមន៍ផលិតកម្មស្រូវនាងអំសៀមរាប។
គួរជម្រាបផងដែរថា ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១១ ខែមករា ឆ្នាំ២០២៤ បានដឹកនាំកិច្ចប្រជុំផ្សព្វផ្សាយត្រៀមរៀបចំសហគមន៍កសិកម្មទំនើបនៅស្រុកស្វាយលើ ខេត្តសៀមរាប។
កិច្ចប្រជុំនេះមានគោលបំណងផ្សព្វផ្សាយ និងពិភាក្សាជាមួយនឹងប្រជាពលរដ្ឋចំនួន៧៦ គ្រួសារ មកពីឃុំកន្ទួត ស្រុកស្វាយលើ ខេត្តសៀមរាបដែលកិច្ចប្រជុំផ្តោតទៅលើការត្រៀមរៀបចំសហគមន៍កសិកម្មទំនើបសម្រាប់ផលិតកម្មស្រូវនាងអំ ។
បន្ទាប់ពីការពិភាក្សាជាលទ្ធផល ប្រជាកសិករដែលបានចូលរួម មានការយល់ដឹងកាន់តែច្បាស់ពីសហគមន៍កសិកម្មទំនើប និងស្ម័គ្រចិត្តចូលរួមក្នុងការអនុវត្តន៍ ដើម្បីជំរុញសហគមន៍ទំនើបឱ្យលេចចេញជារូបរាងឡើង ប្រកបដោយភាពជោគជ័យ។ ជាមួយគ្នានោះ នាយកដ្ឋានសហគមន៍កសិកម្ម នៃក្រសួងកសិកម្ម រុក្ខាប្រមាញ់ និងនេសាទ នឹងជួយសម្របសម្រួល ដោយគាំទ្រសហគមន៍កសិកម្មទំនើបដែលនឹងបង្កើតថ្មីនេះបន្តទៀត។
សូមបញ្ជាក់ថាជូនដែរថា ប្រជាកសិករចំនួន៧៦គ្រួសារ នៅក្នុងឃុំកន្ទួត ស្រុកស្វាយលើ ខេត្តសៀមរាប មានផ្ទៃដីសរុបចំនួន ៧៤០ហិកតា បានស្ម័គ្រចិត្តចូលរួម ដាក់ដីស្រែរួមគ្នា ដើម្បីរៀបចំសហគមន៍ទំនើបនេះ៕
Account
Security
Favourite Content