សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានអះអាងថា អនុវិស័យដំណាំកម្ពុជាក្នុងឆ្នាំ២០២៤ សម្រេចបានផលិតកម្មប្រមាណជិត៤០លានតោន កើនឡើងជិត ៣លានតោន បើធៀបនឹងឆ្នាំ២០២៣។ ការថ្លែងបែបនេះត្រូវបានធ្វើឡើងនៅក្នុងពិធីបិទសន្និបាតបូកសរុបការងារកសិកម្មទូទាំងប្រទេស ឆ្នាំ២០២៤ និងទិសដៅអនុវត្តឆ្នាំ២០២៥ ដើម្បីបង្កើនល្បឿនអភិវឌ្ឍក្នុងវិស័យកសិកម្មឱ្យក្លាយជាកម្លាំងចលករដ៏រឹងមាំ ក្នុងការធានាសន្តិសុខស្បៀង កាលពីថ្ងៃទី២២ ខែមករា ឆ្នាំ២០២៥ ក្រោមអធិបតីភាព ឯកឧត្តម សុខ ចិន្តាសោភា ឧបនាយករដ្ឋមន្ត្រី នាទីស្ដីការក្រសួង។
នៅក្នុងឱកាសនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានមានប្រសាសន៍ពីកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការនៃក្រសួង រយៈពេលជាងមួយឆ្នាំកន្លងទៅ ដោយបានរួមកម្លាំងគ្នាជាធ្លុងមួយ ជំរុញអនុវត្តផែនការ និងសកម្មភាពការងារដែលបានគ្រោងទុកឆ្នាំ២០២៤ និងស្មារតីបុរេសកម្ម និងទំនួលខុសត្រូវខ្ពស់ស្របតាមយុទ្ធសាស្រ្តបញ្ចកោណដំណាក់កាលទី១ គោលនយោបាយអាទិភាពទី៥ និងទី៦ របស់រាជរដ្ឋាភិបាល និងផែនការអភិវឌ្ឍវិស័យកសិកម្មឆ្នាំ២០២៤ ដល់ឆ្នាំ២០២៨ ។
ឯកឧត្តមរដ្ឋមន្ត្រីបានគូសបញ្ជាក់ថា អនុវិស័យដំណាំដែលចូលរួមធំជាងគេក្នុងការងារវិស័យកសិកម្មទាំងមូលរហូតដល់៦១% ក្នុងឆ្នាំ២០២៤ សម្រេចបានផលិតកម្ម ៣៩.៤លានតោន កើនឡើង២,៥៩លានតោន បើធៀបនឹងឆ្នាំ២០២៣។ ក្នុងនោះផលិតកម្មស្រូវសម្រេចបាន ១៣,៨៩លានតោន ដែលធានាបានទាំងស្រុងនូវសន្តិសុខស្បៀងកម្ពុជា និងមានអត្តលេខ ៨,២លានតោន សម្រាប់ការនាំចេញជាស្រូវ និងអង្ករផងដែរ។
ឯកឧត្តមរដ្ឋមន្ត្រី បានបញ្ជាក់ថា ៖
«ក្នុងរយៈពេលកន្លងទៅនេះ បើទោះបីជាមានការប៉ះពាល់ដោយគ្រោះធម្មជាតិ ទឹកជំនន់ គ្រោះរាំងស្ងួត ការបំផ្លិចបំផ្លាញដោយរុយស មមាញត្នោត ដង្កូវហ្វូង ឬដង្កូវមូរស្លឹកក៏ដោយ ប៉ុន្តែជាលទ្ធផល យើងនៅតែអាចសម្រេចបានជាវិជ្ជមាន។ នេះសបញ្ជាក់ថា យើងកាន់តែមានភាពធន់នឹងបម្រែបម្រួលអាកាសធាតុនៅក្នុងអនុវិស័យដំណាំ ហើយក៏ជាលទ្ធផលដែលបានពីការបង្កើនការផ្សព្វផ្សាយ និងផ្ដល់ជំនួយបច្ចេកទេសដល់កសិករក្នុងការប្រើប្រាស់ពូជ ជី ថ្នាំ កាន់តែប្រសើរឡើង ព្រមទាំងការប្រើប្រាស់បច្ចេកវិទ្យា និងគ្រឿងយន្តកសិកម្ម កាន់តែទូលំទូលាយនៅក្នុងផលិតកម្មកសិកម្មកម្ពុជា»។
ជាការកត់សម្គាល់ ជាមួយនឹងតួលេខដ៏ច្រើនៅក្នុងផលិតកម្មដំណាំដែលសម្រេចបាន សម្រាប់ឆ្នាំ២០២៤ កម្ពុជាបានធ្វើការនាំចេញផលិតផលកសិផលគួរឱ្យកត់សម្គាល់ដោយមានបរិមាណប្រមាណ១២លានតោន ឆ្ពោះទៅកាន់ ៩៥ប្រទេស កើនឡើងជាង ៣លានតោន និងបាននាំមកនូវចំណូល ៥,៣ពាន់លានដុល្លារ។
សូមជម្រាបថា ក្នុងគោលបំណងធ្វើពិពិធកម្មវិស័យកសិកម្មឱ្យកាន់តែរីកចម្រើន នៅក្នុងរយៈពេលដ៏ខ្លី ក្រសួងកសិកម្ម រុក្ខាប្រមាញ់ និងនេសាទ បានបង្កើតសហគមន៍កសិកម្មទំនើបបានចំនួន៩ នៅក្នុងខេត្តចំនួន៦ ដោយផ្តោតទៅលើដំណាំយុទ្ធសាស្រ្ត៤ គឺស្រូវ បន្លែ ស្វាយចន្ទី និងម្រេច ។ ក្នុងនោះក្រសួងបានជួយសម្រួលក្នុងការពង្រីកកិច្ចសហការជាមួយដៃគូធនាគារ ក្នុងការផ្តល់ប្រាក់កម្ចី ការប្រាក់ទាប ជូនដល់សហគមន៍ដែលបានបង្កើតឡើង ដើម្បីអាចទទួលបានប្រាក់កម្ចីយកមកប្រើប្រាស់ក្នុងការធ្វើកសិកម្ម៕
Account
Security
Favourite Content