សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមគោលការណ៍ប្រទានកម្មរបស់រាជរដ្ឋាភិបាលកម្ពុជា វិទ្យាស្ថានជាតិ កសិកម្ម ព្រែកលៀប និងប្រជាពលរដ្ឋក្នុងសហគមន៍ព្រែកខ្វិតចំនួន៥១ គ្រួសារ ស្ថិតក្នុងភូមិព្រែកលៀប សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ ទទួលបានវិញ្ញាបនបត្រសម្គាល់ម្ចាស់អចលនវត្ថុ នារសៀលថ្ងៃទី ១៦ ខែកក្កដា ឆ្នាំ២០២៥ ។
ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភានៃព្រះរាជាណាចក្រកម្ពុជា និងជាអតីតនាយកវិទ្យាស្ថានជាតិ កសិកម្ម ព្រែកលៀប បានចូលរួមអបអរសាទរដល់ប្រជាពលរដ្ឋក្នុងសហគមន៍ព្រែកខ្វិតចំនួន ៥១ គ្រួសារ ដែលទទួលបានវិញ្ញាបនប័ត្រសម្គាល់ម្ចាស់អចលនវត្ថុនាពេលនេះពីរាជរដ្ឋាភិបាល និងបានថ្លែងអំណរគុណដល់អាជ្ញាធរ ក៏ដូចជាក្រសួងរៀបចំដែនដី នគរូបនីយកម្ម និងសំណង់ និងមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ ដែលបានខិតខំប្រឹងប្រែងជំរុញការងារចេញវិញ្ញាបនបត្រសម្គាល់ម្ចាស់អចលនវត្ថុជូនវិទ្យាស្ថានជាតិ កសិកម្ម ព្រែកលៀប និងប្រជាពលរដ្ឋក្នុងសហគមន៍ព្រែកខ្វិតនេះបានសម្រេចជោគជ័យ។
ឯកឧត្តម បានផ្ដាំផ្ញើដល់វិទ្យាស្ថានជាតិ កសិកម្ម ព្រែកលៀប និងប្រជាពលរដ្ឋដែលរស់នៅជុំវិញវិទ្យាស្ថាននេះឱ្យរស់នៅជាសហគមន៍ ចេះគោរពស្រឡាញ់គ្នា យល់អធ្យាស្រ័យគ្នាទៅវិញទៅមក ចេះចូលរួមថែរក្សាអនាម័យបរិស្ថាន ទុកដាក់សំរាមឱ្យបានត្រឹមត្រូវដើម្បីការរស់នៅស្អាត និងសុខភាពល្អទាំងអស់គ្នា ព្រមទាំងត្រូវចេះបង្កើនជីវភាពរស់នៅ និងសមត្ថភាពរបស់ខ្លួនបន្ថែមទៀត ចូលរួមអភិវឌ្ឍន៍ប្រទេសជាតិ។
ក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែងអំណរគុណដល់មន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញ,និង លោកគ្រូ អ្នកគ្រូ សាស្ត្រាចារ្យនៅវិទ្យាស្ថានជាតិ កសិកម្ម ព្រែកលៀប, ប្រជាពលរដ្ឋ, ក្រសួងកសិកម្ម រុក្ខាប្រមាញ់ និងនេសាទ, ក្រសួងសេដ្ឋកិច្ច និងហិរញ្ញវត្ថុ ព្រមទាំងអាជ្ញាធរដែនដីដែលបានខិតខំប្រឹងប្រែងជំរុញ និងចូលរួមផ្ដល់កិច្ចសហការសម្រេចយុទ្ធនាការចុះបញ្ជីដីធ្លីបង្ហើយរហូតឈានឲ្យប្រជាពលរដ្ឋក្នុងសហគមន៍ព្រែកខ្វិតទទួលបានវិញ្ញាបនបត្រសម្គាល់ម្ចាស់អចលនវត្ថុនាពេលនេះ។
ឯកឧត្តមឧបនាយករដ្ឋមន្ត្រីបានបញ្ជាក់ថា ក្រសួងរៀបចំដែនដី នគរូបនីយកម្ម និងសំណង់ បានកំណត់ព្រំជាក់លាក់ ធ្វើការចុះបញ្ជី និងចេញវិញ្ញាបនបត្រសម្គាល់ម្ចាស់អចលនវត្ថុជូនវិទ្យាស្ថានជាតិ កសិកម្ម ព្រែកលៀប និងប្រជាពលរដ្ឋសហគមន៍ព្រែកខ្វិត។ នេះគឺជាដីដែលនៅសេសសល់ត្រូវចុះបញ្ជី ជាដីដែលមានភាពមិនច្បាស់លាស់រវាងស្ថាប័នរដ្ឋ និងប្រជាពលរដ្ឋ ហើយនេះគឺជាឧទាហរណ៍មួយដ៏ថ្លៃថ្លាដែលយើងនឹងអនុវត្តនៅតាមបណ្តាអង្គភាពផ្សេងៗទៀតដែលមានបញ្ហា។
ជាមួយនេះ ឯកឧត្តមឧបនាយករដ្ឋមន្ត្រី ក៏បានផ្ដល់ការណែនាំឲ្យប្រជាពលរដ្ឋផ្លាស់ប្ដូរផ្នត់គំនិតដោយបង្វែរការគិតគូរទៅលើគុណតម្លៃដីជាជាងគិតគូរទៅលើតម្លៃដីតែម្យ៉ាង មានន័យថា ត្រូវគិតគូរលើការយកដីមកប្រើប្រាស់ធ្វើកសិកម្ម ឬធ្វើអ្វីមួយឱ្យមានប្រយោជន៍ ដើម្បីទទួលបានប្រាក់ចំណូលសម្រាប់ផ្គត់ផ្គង់គ្រួសារប្រចាំថ្ងៃប្រសើរជាជាងការលក់ដី។ រាល់បេសកកម្មដែលក្រសួងរៀបចំដែនដី នគរូបនីយកម្មនិងសំណង់ ខិតខំប្រឹងប្រែងធ្វើទាំងអស់នេះបានបង្ហាញឱ្យឃើញថា នៅក្នុងសម័យសម្ដេចមហាបវរធិបតី ហ៊ុន ម៉ាណែត គឺជាសហសម័យកម្ពុជាដែលយើងទាំងអស់គ្នាមានសមត្ថភាពខាងផ្លូវច្បាប់ក្នុងការកាន់កាប់អចលនទ្រព្យដោយខ្លួនឯងដូចដែលប្រជាពលរដ្ឋក្នុងសហគមន៍ព្រែកខ្វិតចំនួន៥១ គ្រួសារទទួលបាននាពេលនេះ ៕
Account
Security
Favourite Content