សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី BBC បានរាយការណ៍ថា ប្រធានាធិបតីសហរដ្ឋអាម៉េរិក Donald Trump បានអះអាងអំពីការយកពន្ធ ២៥ភាគរយពីសហភាពអឺរ៉ុបក្នុងពេលឆាប់ៗខាងមុខនេះ។
ថ្មីៗនេះ ប្រធានាធិបតីសហរដ្ឋអាម៉េរិក លោក Donald Trump បានលើកឡើងថា លោកគ្រោងនឹងយកពន្ធ ២៥ ភាគរយលើទំនិញដែលផលិតក្នុងសហភាពអឺរ៉ុប ដោយអះអាងថា តំបន់នេះបានធ្វើឲ្យសហរដ្ឋអាម៉េរិកមានភាពរញ៉េរញ៉ៃ។ ការយកពន្ធ ២៥ ភាគរយនេះនឹងមាននៅលើរថយន្ត និងទំនិញអ្វីៗផ្សេងទៀតទាំងអស់។ ជាការឆ្លើយតប សហភាពអឺរ៉ុបបាននិយាយថា ខ្លួននឹងប្រតិកម្មយ៉ាងម៉ឺងម៉ាត់ និងប្រឆាំងទៅវិញភ្លាមៗនឹងការយកពន្ធមិនសមហេតុផលបែបនេះ ខណៈដែល Trump បានរិះគន់ថា គោលនយោបាយអឺរ៉ុបបានធ្វើឱ្យអ្នកនាំចេញផលិតផលអាហារ និងរថយន្តរបស់អាម៉េរិកមានគុណវិបត្តិ។ គោលបំណងនៃការបង្កើតសហភាពអឺរ៉ុប គឺដើម្បីបំបាក់សហរដ្ឋអាមេរិក ប៉ុន្តែឥឡូវនេះ Trump គឺជាប្រធានាធិបតី ដែលពិបាកនឹងបំបាក់ណាស់
យ៉ាងណាមិញ អ្នកនាំពាក្យគណៈកម្មការសហភាពអឺរ៉ុបបានច្រានចោលការចោទប្រកាន់របស់ Trump ដោយលើកឡើងថា ការបង្កើតទីផ្សារក្នុងតំបន់បានធ្វើឱ្យការធ្វើអាជីវកម្មនៅអឺរ៉ុបមានភាពងាយស្រួលសម្រាប់ក្រុមហ៊ុនអាម៉េរិក និងជាប្រយោជន៍សម្រាប់សហរដ្ឋអាមេរិក។ ប្រសិនបើសហរដ្ឋអាម៉េរិកអនុម័តការយកពន្ធពិតមែន សហភាពអឺរ៉ុបក៏នឹងឆ្លើយតបទៅវិញ ដើម្បីការពារអ្នកប្រើប្រាស់ និងអាជីវកម្មរបស់ពួកគេផងដែរ។
ជាទូទៅ ពន្ធគយគឺជាពន្ធលើការនាំចូលដែលត្រូវបានប្រមូលដោយរដ្ឋាភិបាល និងបង់ដោយក្រុមហ៊ុនដែលនាំយកទំនិញ។ នេះមានន័យថា ក្រុមហ៊ុននៅក្នុងសហរដ្ឋអាម៉េរិកជាអ្នកបង់លុយលើទំនិញនាំចូលទាំងនោះ ហើយជាលទ្ធផល ទំនិញនាំចូលនឹងមានតម្លៃថ្លៃជាងមុនសម្រាប់អ្នកប្រើប្រាស់។ Trump បានប្តេជ្ញាថានឹងប្រើប្រាស់យុទ្ធសាស្ត្រការយកពន្ធនេះ ដើម្បីជំរុញការផលិតរបស់សហរដ្ឋអាម៉េរិក បង្កើនប្រាក់ចំណូល និងជំរុញប្រទេសផ្សេងទៀតឱ្យផ្លាស់ប្តូរគោលនយោបាយដែលគាត់ប្រឆាំង។
គួរកត់សម្គាល់ថា ចាប់តាំងពី Trump ឡើងកាន់អំណាចជាប្រធានាធិបតីជាលើកទី២មក បានបង្កឱ្យពិភពលោកមានការព្រួយបារម្ភអំពីផែនការពាណិជ្ជកម្មរបស់គាត់។ កាលពីខែមុន Trump បានប្រកាសថា ការយកពន្ធគយលើទំនិញនាំចូលពីម៉ិកស៊ិក និងកាណាដាគ្រោងនឹងចូលជាធរមាននៅថ្ងៃទី ៤ ខែមីនា។ យ៉ាងណាមិញ ការយកពន្ធលើប្រទេសទាំងពីរនេះអាចត្រូវបានពន្យារពេលម្តងទៀត។ បន្ថែមពីនេះ Trump បានដំឡើងពន្ធ ១០ ភាគរយលើទំនិញពីប្រទេសចិន និងចាត់វិធានការដើម្បីរឹតបន្តឹងលើការនាំចូលផ្សេងទៀត។ មិនត្រឹមតែប៉ុណ្ណោះ Trump មានបំណងដាក់ពន្ធសងសឹកឲ្យមានភាពស្មើគ្នាសម្រាប់ប្រទេសនីមួយៗ ជាពិសេសប្រទេសដែលមានអតិរេកពាណិជ្ជកម្មជាមួយនឹងអាម៉េរិក៕
Account
Security
Favourite Content