សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ បិទទ្វារប្រទេសអស់រយៈពេលជាង៥ឆ្នាំមកហើយសម្រាប់ភ្ញៀវទេសចរបរទេស ប៉ុន្តែនៅពេលនេះ ប្រទេសកូរ៉េខាងជើងបានសម្រេចចិត្តក្នុងការអនុញ្ញាតឲ្យទេសចរមួយក្រុមដែលមានប្រភពមកពីតំបន់អឺរ៉ុបចូលមកធ្វើដំណើរកំសាន្តក្នុងប្រទេសរបស់ខ្លួនជាលើកដំបូងសាជាថ្មី។
ក្រៅតែពីភ្ញៀវទេសចរជនជាតិរុស្ស៊ី និងចិន ដែលអាចធ្វើដំណើរចូលមកដល់ប្រទេសកូរ៉េខាងជើងនោះ គេពុំមើលឃើញមានភ្ញៀវបរទេសណាផ្សេងឡើយក្រៅតែពីក្រុមទេសចរលើកដំបូងដែលមានសមាជិកចំនួន១៣នាក់ និងមានសញ្ជាតិផ្សេងគ្នាមកពីប្រទេសអង់គ្លេស កាណាដា អូទ្រីស អូស្ត្រាលី ព្រមទាំងអ៊ីតាលីផងដែរ។
អ្នកជំនាញសេដ្ឋកិច្ចជាច្រើនបានថ្លែងប្រាប់ក្រុមការងារកាសែត AP ថា កញ្ចប់ធ្វើដំណើរដោយភ្ញៀវទេសចរបរទេសលោកខាងលិចលើកនេះ ទំនងជាអាចជួយស្តារវិស័យទេសចរ និងស្រោចស្រងសេដ្ឋកិច្ចជាតិរបស់កូរ៉េខាងជើងមួយផ្នែកឡើងវិញ ខណៈដែលកំពុងយ៉ាប់យ៉ឺនខ្លាំងតាមរយៈការចាក់បញ្ចូលក្នុងប្រទេសដោយរូបិយបណ្ណបរទេស។
ប្រធានក្រុមហ៊ុនទេសចរ Koryo Tours ដែលជាអ្នករៀបចំកញ្ចប់ទេសចរលើកនេះ គឺលោក Simon Cockerell បាននិយាយថា គោលដៅទេសចរដែលពួកគេនឹងត្រូវធ្វើដំណើរនៅកូរ៉េខាងជើងនោះមានដូចជារោងចក្រ ហាងលក់ទំនិញ សាលារៀន ព្រមទាំងទីតាំងរូបសំណាក់មេដឹកនាំជំនាន់មុនគឺលោក Kim Il Sung និងលោក Kim Jong Il ដែលជាឪពុក និងជាជីតារបស់មេដឹកនាំសព្វថ្ងៃលោក Kim Jong Un ផងដែរ។
លោកបន្តថា៖
«ចាប់តាំងតែពីខែមករាឆ្នា២០២០មក កូរ៉េខាងជើងបានបិទទ្វារទាំងស្រុងពីសំណាក់ក្រុមភ្ញៀវទេសចរបរទេស លើកលែងតែរុស្ស៊ី និងចិន។ យើងរីករាយខ្លាំងណាស់ដែលទីបំផុតទ្វារទេសចរសម្រាប់កូរ៉េខាងជើងបានបើកដំណើរការឡើងវិញ។ តាមផែនការ ក្រោយកញ្ចប់ទេសចរដំបូងនេះហើយនោះ យើងក៏នឹងអាចបន្តរៀបចំកញ្ចប៉ទេសចរជាក្រុម និងឯកជនជាច្រើនបន្ថែមទៀតផងដែរ»។
គួរឲ្យដឹងដែរថា Koryo Tours គឺជាក្រុមហ៊ុនទេសចរដែលមានមូលដ្ឋាននៅក្នុងទីក្រុងប៉េកាំង ហើយដំណើរទស្សនាកំសាន្តនេះមានរយៈពេល៥ថ្ងៃ គិតចាប់ពីថ្ងៃទី២០ ខែកុម្ភៈ ឆ្នាំ២០២៥កន្លងទៅនេះ ជាមួយនឹងភ្ញៀវទេសចរមគពីលោកខាងលិចភាគច្រើន ហើយទីក្រុង Rason គឺជាគោលដៅទេសចរណ៍លើកនេះ ហើយក៏ជាទីក្រុងតែមួយគត់របស់កូរ៉េខាងជើងដែលមានតំបន់សេដ្ឋកិច្ចពិសេសកំពុងប្រតិបត្តិការ។
ចាប់តាំងតែពីបើកទ្វារប្រទេសឡើងវិញកាលពីឆ្នាំ២០២២ក្រោយបញ្ចប់វិបត្តិកូវីដ ប្រទេសកូរ៉េខាងជើងបានទទួលស្វាគមន៍ភ្ញៀវទេសចរបរទេសបានតិចតួចណាស់ ដោយក្នុងនោះខែកុម្ភៈ ឆ្នាំ២០២៤ទទួលបានភ្ញៀវរុស្ស៊ីជាង១០០នាក់ និងសរុបពេញមួយឆ្នាំមានជនជាតិរុស្ស៊ីជាទេសចរប្រមាណជា៨៨០នាក់ប៉ុណ្ណោះ។ យ៉ាងណាក្តី កូរ៉េខាងជើងនៅតែផ្ដោតការរំពឹងទុកខ្លាំងជាងគេនោះគឺជាភ្ញៀវទេសចរមកពីប្រទេសចិន ពីព្រោះថា វាគឺជាចំណែកដ៏ធំជាងគេបំផុតនៃចំនួនទេសចរបរទេសទាំងអស់ ជាក់ស្តែងមុនកូវីដ និងការបិទទ្វារប្រទេស កូរ៉េខាងជើងអាចស្វាគមន៍ភ្ញៀវទេសចរចិនយ៉ាងហោចណាស់៣០ម៉ឺននាក៉ជារៀងរាល់ឆ្នាំ៕
Account
Security
Favourite Content