សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពោធិ៍សាត់ ៖ ដោយឈរលើគុណភាពសាច់ និងរស់ជាតិឆ្ងាញ់របស់វា បានធ្វើឱ្យបង្កងចិញ្ចឹមពូជអូស្ត្រាលីរបស់អ្នកខេត្តពោធិ៍សាត់មួយកន្លែងមានតម្លៃថ្លៃគួរសម និងមានការបញ្ជាទិញឥតដាច់ពីអតិថិជន ជាពិសេសនៅរដូវចូលឆ្នាំចិនតែម្ដង រហូតដល់កសិដ្ឋានមួយនេះផ្គង់ផ្គង់ឱ្យអ្នកទិញមិនគ្រប់តាមតម្រូវការទៀតផង។
យុវជន យ៉ាន់ ពិសិដ្ឋ ម្ចាស់កសិដ្ឋានចិញ្ចឹមបង្កងពូជអូស្ត្រាលីនៅខេត្តពោធិ៍សាត់ មានទីតាំងភូមិក្រញុំា ឃុំផ្ទះរ៉ុង ស្រុកតាឡូសែនជ័យ បានប្រាប់ AMS Economy ឱ្យដឹងថា ជាធម្មតាមានអតិថិជនតាមបណ្តាខេត្តផ្សេងៗបញ្ជាទិញជារៀងរាល់ថ្ងៃ ដោយក្នុងមួយថ្ងៃជាមធ្យមចន្លោះពី១០គីឡូក្រាម ទៅ ៣០គីឡីក្រាមប៉ុណ្ណោះ ប៉ុន្តែសម្រាប់រដូវចូលឆ្នាំចិន ឆ្នាំ២០២៥នេះវិញ អតិថិជនខ្មែរកម្ម៉ង់ទិញហូរហែ ជាពិសេសអតិថិជនដែលជាជនជាតិចិនតែម្ដង ទិញច្រើនៗ ដោយសរុបក្នុងមួយថ្ងៃអាចចន្លោះពី ៣០០ ទៅ ៤០០គីឡូក្រាមឯណោះ។
ម្ចាស់កសិដ្ឋានវ័យក្មេងខាងលើនេះបានអះអាងថា បង្កងចិញ្ចឹមនេះមានឈ្មោះថា បង្កងអូស្ត្រាលី ដែលកសិករខ្មែរនាំចូលតៗគ្នាមកពីប្រទេសថៃ វាមានរស់ជាតិមិនចាញ់បង្កងធម្មជាតិនោះទេ។ បើតាមការឱ្យដឹងពីអតិថិជនដែលជាអ្នកទទួលទានវិញបានបញ្ជាក់ថា បង្កងពូជនេះមានសាច់ស្វិតជាងបង្កងទន្លេ ហើយតម្លៃរបស់វាមិនចាញ់បង្កងចិញ្ចឹមតាមទន្លេនោះទេ ពោលគឺលក់សាច់បង្កងមានខ្នាតតូច ខ្នាត់ធំមួយគីឡូជាង១០ក្បាល រហូតដល់មួយគីឡូមានចំនួនជាង២០ក្បាល ចំណែកតម្លៃរបស់វាខុសគ្នាបន្តិចបន្តួច ប្រភេទលេខ១ តម្លៃ២៥ដុល្លារ ប្រភេទលេខ២ តម្លៃ២០ដុល្លារ។ ប៉ុន្តែបើជាអតិថិជនម៉ូយដុំ កម្ម៉ង់យកទៅលក់បន្តវិញកសិកដ្ឋានខាងលើលក់ជូនក្នុងតម្លៃ១៨ដុល្លារ ប៉ុណ្ណោះក្នុងមួយគីឡូក្រាម។
គួរបញ្ជាក់ថា យុវជន ពិសិដ្ឋ បានចាប់ផ្តើមចិញ្ចឹមបង្កងអូស្រ្តាលីនេះមានរយៈពេល០៤ឆ្នាំមកហើយ ចាប់តាំងពីខ្លួនត្រឡប់ពីធ្វើពលករនៅប្រទេសកូរ៉េមក ហើយមកទល់បច្ចុប្បន្ន ខ្លួនបានពង្រីកអាងចិញ្ចឹមបង្កងបានចំនួន១២អាង ដែលក្នុងមួយអាង អាចដាក់កូនបង្កងប្រមាណជា ២០០ក្បាល។ បង្កងប្រភេទនេះមានលក្ខណៈងាយស្រួលចិញ្ចឹម ដោយគ្រាន់តែរៀបចំអាង រៀបចំដាក់ទុយោជ័រ ឬគល់ឈើងាប់ៗ ចូលក្នុងទឹកទុកឱ្យបង្កងតោង ឬជ្រក ហើយយកកូនបង្កងដាក់ចិញ្ចឹមជាការស្រេច។ បង្កងមិនស៊ីចំណីច្រើនពេកនោះទេ ហើយក្នុងមួយថ្ងៃ គេត្រូវដាក់ចំណី០២ដងព្រឹកម្តង និងល្ងាចម្តង។ បង្កងងាយស្រួលផ្តល់ចំណីដូចជា ចេកទុំ ត្រឡាច ល្ពៅ បន្លែផ្សេងៗ ឬស្បែកគោក៏ជាចំណីដ៍ឆ្ងាញ់របស់បង្កងដែរ។
សូមជម្រាបថា បច្ចុប្បន្ននេះ យុវជន យ៉ាន់ ពិសិដ្ឋ ក្រៅពីមានកសិដ្ឋានចិញ្ចឹមផ្ទាល់ខ្លួន ក៏មានសហការចិញ្ចឹមជាមួយកសិករផ្សេងទៀតនៅក្នុងតំបន់ផងដែរ ដោយបំបែកកសិដ្ឋានចិញ្ចឹមបានច្រើនកន្លែង ហើយនៅពេលបង្កងធំធាតុត្រូវគីឡូលក់នៅលើទីផ្សារ យុវជនរូបនេះជាអ្នកប្រមូលទិញវិញ និងលក់បន្តឱ្យម៉ូយនៅតាមបណ្តាខេត្តផ្សេងៗផងដែរ។ ជាមួយគ្នានេះ ដោយសារមានការគាំទ្រខ្លាំងដូច្នេះ នៅថ្ងៃខាងមុខនេះ យ៉ាន់ ពិសិដ្ឋ មានមហិច្ឆិតាចង់ពង្រីកកសិដ្ឋានឱ្យបានចំនួនកាន់តែច្រើនឡើងៗ ដើម្បីនាំចេញសាច់បង្កងទៅលក់នៅទីផ្សារ ទាំងនៅក្នុងស្រុក និងនាំចេញទៅក្រៅប្រទេសថែមទៀតផង៕ វិន ឈុនហ៊ាត
Account
Security
Favourite Content