ក្រៅពីធានាលើការបង្កើតការងារ និងប្រាក់ចំណូលជូនប្រជាពលរដ្ឋ អ្វីដែលរាជរដ្ឋាភិបាលផ្ដោតជាបន្តទៅទៀតគឺសុខមាលភាព ដើម្បីធានាបានប្រសិទ្ធភាពការងារ។ ជាក់ស្ដែង ទាំងស្ថាប័នរដ្ឋ និងវិស័យឯកជនបានចូលរួមក្នុងការលើកកម្ពស់សុខមាលភាពប្រជាជន តាមរយៈការផ្ដល់ជូននូវសេវាគាំពាសង្គម។

បេឡាជាតិរបបសន្តិសុខសង្គម (ប.ស.ស) ដែលស្ថិតក្រោមអាណាព្យាបាលបច្ចេកទេសនៃ​ក្រសួង​ទទួលបន្ទុកវិស័យរបបសន្តិសុខសង្គម និងស្ថិតក្រោមអាណាព្យាបាល ហិរញ្ញវត្ថុនៃក្រសួង​សេដ្ឋកិច្ច និងហិរញ្ញវត្ថុ ថ្មីៗនេះបានពង្រឹង និងពង្រីកនូវសេវាគាំពារសង្គមរបស់ខ្លួនឱ្យកាន់តែទូលាយថែមទៀត ដោយផ្ដោតជាពិសេសលើក្រុមប្រជាពលរដ្ឋដែលប្រកបមុខរបរក្រៅប្រព័ន្ធ។

បេឡាជាតិសន្តិសុខសង្គម ព្យយាមចាក់បញ្ចូលនូវសេវាគាំពារសង្គមឱ្យជ្រួតជ្រាបចូលទៅដល់ប្រជាជនគ្រប់ស្រទាប់វណ្ណៈ ជាមួយនឹងប្រាក់វិភាគទានដែលសមស្របទៅនឹងជីវភាពរបស់ពួកគេ។

វិស័យឯកជនឯណោះវិញ ជាពិសេសក្រុមហ៊ុនធានារ៉ាប់រង ក៏ចាប់ផ្ដើមបង្វែរមកផ្ដល់សេវាកម្មធានារ៉ាប់រងសុខភាពបុគ្គលិក និយោជិតផងដែរ។ ជាក់ស្ដែង កាលពីពេលថ្មីៗនេះ ក្រុមហ៊ុនហ្វតេ ឡាយហ្វ័ បានបង្កើតផលិតផលមួយមានឈ្មោះថា “គ្រុបមេដបូ” និង “គ្រុបមេដប្រូផ្លើស” ដែលបំពេញបន្ថែមពីលើសេវា ប.ស.ស ដែលរដ្ឋផ្ដល់ជូន។ សេវាកម្មពីវិស័យឯកជនមួយនេះ ដើរស្របទៅនឹងគោលនយោបាយគាំពាសង្គមរបស់រដ្ឋាភិបាល ដោយជួយបំពេញនូវចន្លោះប្រហោងបន្ថែមទៅលើសេវាកម្មសុខភាពបុគ្គលិកនៅក្នុងក្រុមហ៊ុន​នីមួយ​ៗ។

យ៉ាងណាមិញ ក្នុងឱកាសជួបសំណេះសំណាលជាមួយកម្មករ កម្មការិនី តាមបណ្ដារោងចក្រ សហគ្រាសមួយចំនួនក្នុងខេត្តតាកែវ កាលពីពេលកន្លងទៅ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក៏បានមានប្រសាសន៍ផងដែរថា បច្ចុប្បន្នរាជរដ្ឋាភិបាលបាន និងកំពុងផ្ដល់ការយកចិត្តទុកដាក់ខ្ពស់ទៅលើការបង្កើតការងារ ការបណ្ដុះបណ្ដាលចំណេះដឹង ការធានានូវបរិស្ថានធ្វើការងារសមស្រប។

សម្ដេចធិបតីបានបន្តមានប្រសាសន៍ថា វិស័យការងារជារួមពឹងលើកត្តាសំខាន់៣គឺ រាជរដ្ឋាភិបាលដែលប្រៀបបាននឹងអាណាព្យាល និយោជិត និងម្ចាស់សហគ្រាស ដែលប្រៀបបាននឹងប្ដីប្រពន្ធ។ ដើម្បីឱ្យសេដ្ឋកិច្ចគ្រួសារនេះមានភាពរីកចម្រើនបាន បុគ្គលទាំង៣ត្រូវតែមានភាពចុះសម្រុងនឹងគ្នា និងជួយ​គ្នា​ទៅវិញ​ទៅមក។

រដ្ឋាភិបាលដែលជាអាជ្ញាព្យាបាលគឺជាអ្នកស្វះស្វែងរកវិនិយោគិន បង្កើតគោលនយោបាយទាក់ទាញអ្នកវិនិយោគ ខិតខំធានានូវបរិស្ថានការងារ សុខសន្តិភាព ម៉ាក្រូសេដ្ឋកិច្ច។ រីឯភាគីនិយោជិត និងនិយោជក គឺត្រូវខិតខំសម្រុះសម្រួលគ្នាលើការចរចាប្រាក់ខែ ដែលសម្ដេចធិបតីស្នើឱ្យបញ្ចប់ការចរចានៅមុនពិធីបុណ្យភ្ជុំបិណ្ឌខាងមុខ។

យ៉ាងណាមិញ បើផ្ដោតតែទៅលើកម្មករ និយោជិត សម្ដេចធិបតីបានសង្កត់ធ្ងន់ថា ​រដ្ឋាភិបាល​បានពង្រីកបន្ថែមនូវសេវាគាំពារសង្គម ដោយមិនត្រឹមតែរ៉ាប់រងលើសុខភាព​របស់បុគ្គលិកប៉ុណ្ណោះទេ ប៉ុន្តែបច្ចុប្បន្ននេះនៅតាមរោងចក្រ សហគ្រាសមួយចំនួនក៏ចាប់ផ្ដើមអនុវត្តគោលការណ៍ ផ្ដល់ប្រាក់សោធននិវត្តន៍ជូនពួកគេផងដែរ។

ជារួម ទាំងអស់នេះសុទ្ធសឹងតែជាធាតុចូលដ៏សំខាន់ដែលមិនអាចខ្វះបាន ដែលអាចជំរុញកម្ពុជាឱ្យ ក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូល ខ្ពស់នៅឆ្នាំ២០៥០៕