សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ស្ពៃបូកគោ ជាបន្លែមួយប្រភេទដែលគេនិយមទទួលទាន ពិសេសអាចច្នៃស្លបានច្រើនមុនមិនថាឆារ ឬស្ងោរនោះទេ តែភាគច្រើនគេទិញស្ពៃនេះមកពីផ្សារច្រើនជាងការដាំដុះដោយខ្លួនឯងជាលក្ខណៈគ្រួសារ។ ឆ្លៀតនៅក្នុងឱកាសនេះ AMS សូមជូនជាយោបល់ថា ទោះជាលោកអ្នកមិនមានដីធំទូលាយសម្រាប់ការដាំដុះក្ដី ប៉ុន្តែក៏អាចប្រើប្រាស់ដីដែលដាក់ក្នុងផើងសម្រាប់ដាំក៏បានដែលមានលក្ខណៈងាយស្រួល ចំណាយលុយតិច និងទទួលបានបន្លែសុវត្ថិភាពសម្រាប់ក្រុមគ្រួសារ ដោយការដកស្រងចេញពីគណនីអ្នកជំនាញកសិកម្ម «រៀនដាំ»។
ក្នុងការដាំស្ពៃបូកគោ អ្វីដែលគេត្រូវការនោះគឺផើងតូចល្មមសម្រាប់ដាក់ដីដាំដំណាំ ហើយល្បាយដីសម្រាប់ដាំស្ពៃត្រូវមានលាយជាមួយនឹងធ្យូងអង្កាម ក៏ដូចជាជីកំប៉ុស្តិ៍ដើម្បីឱ្យដីមានជីជាតិគ្រប់គ្រាប់សម្រាប់ដំណាំ។ សម្រាប់ទីតាំង យើងអាចដាក់ផើងរុក្ខជាតិនៅកន្លែងដែលមានពន្លឺថ្ងៃគ្រប់គ្រាន់ និងមិនមានសត្វណាអាចមកចឹកបំផ្លាញបាន។
ចំពោះ កូនស្ពៃបូកគោ គេត្រូវបណ្ដុះកូនពូជសម្រាប់ដាក់ដាំ ដោយមានអាយុប្រមាណ ២សប្ដាហ៍ ឬតូចជាងនេះ ហើយកូនរុក្ខជាតិនេះអាចយកកូនស្ពៃដាំលើទឹកក៏អាចយកមកដាំលើដីបានដូចគ្នា។ បន្ទាប់មក គេត្រូវដាក់ដាំនៅពេលល្ងាចមេឃត្រជាក់ទើបកូនដំណាំមិនត្រូវក្ដៅខ្លាំង ធ្វើឱ្យកូនស្ពៃអន់។
សម្រាប់ការថែទាំ ស្ពៃបូកគោក៏មិនខុសពីបន្លែស្លឹកដទៃទៀតដែរ ដែលអ្នកដាំត្រូវការមើលថែ ពិសេសរយៈពេលមួយសប្ដាហ៍ដំបូងគេត្រូវស្រោចទឹកឱ្យបានគ្រប់គ្រាន់ និងគ្របកូនស្ពៃកុំឱ្យត្រូវកម្ដៅខ្លាំង។ ក្រៅពីនេះ គេក៏ត្រូវការដកស្មៅ ជ្រោយដី បន្ថែមជីកំប៉ុស្តិ៍ប្រមាណ ១សប្ដាហ៍ម្ដង និងស្រោចជីទឹករៀងរាល់៣-៥ថ្ងៃម្ដង ដើម្បីបំប៉នដំណាំឱ្យទទួលបានជីជាតិគ្រប់គ្រាន់។
ពាក់ព័ន្ធនឹងការស្រោចទឹក គេត្រូវស្រោចដោយប្រើប្រព័ន្ធដំណក់ទឹក ឬស្រោចទៅលើគល់ដំណាំ ចៀសវាងស្រោចលើស្លឹកដំណាំធ្វើឱ្យស្ពៃមិនក្ដោបល្អ ហើយការស្រោចទឹកនេះផងដែរ កសិករក៏ត្រូវយកចិត្តទុកដាក់ ពោលគឺស្រោចទឹកក្នុងបរិមាណសមល្មម មិនស្រោចជោគពេកធ្វើឱ្យស្ពៃអាចរលួយ ខាតប្រយោជន៍។ បន្ទាប់ពីដាំបានរយៈពេល ១ខែ គេអាចបេះស្លឹកណាដែលមិនល្អចេញ និងបន្ថែមជីកំប៉ុស្តិ៍ដើម្បីបំប៉នដំណាំ ហើយរយៈពេលដាំរបស់ស្ពៃបូកគោគឺ ៧០-៧៥ថ្ងៃ អាស្រ័យទៅតាមពូជផងដែរ។
គួរបញ្ជាក់ដែរថា បងប្អូនមិនថានៅតំបន់ជនបទ ឬទីក្រុងដែលពុំមានដីធំសម្រាប់ដាំដំណាំក៏ដោយ ក៏អាចសាកល្បងដាំដំណាំក្នុងផើងបានដែរ ដោយសារវាងាយស្រួលក្នុងការគ្រប់គ្រង ការរៀបចំដី ប្រើទីធ្លាតូចមិនចាំបាច់ទាល់តែមានដីធំទើបអាចដាំបន្លែបាននោះទេ ពិសេសគឺអាចទទួលបានបន្លែធម្មជាតិសម្រាប់ទទួលទានក្នុងក្រុមគ្រួសារ៕
Account
Security
Favourite Content