សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ វិស័យសំណង់ និងអចលនទ្រព្យត្រូវបានរាជរដ្ឋាភិបាលកម្ពុជាយកចិត្តទុកដាក់ ដោយបានដាក់ចេញនូវវិធានការជាបន្តបន្ទាប់ ដើម្បីស្ដារ និងជំរុញវិស័យនេះឱ្យមានសកម្មភាព និងកំណើនឡើងវិញ ពោលគឺតាំងពីរាជរដ្ឋាភិបាលអាណត្តិចាស់មកម្ល៉េះ ជាពិសេសរាជរដ្ឋាភិបាលអាណត្តិថ្មីអាណត្តិទី៧នៃរដ្ឋសភា ជាមួយនឹងការកំណត់នូវវិធនាការអាទិភាពមួយចំនួន ។
បើតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ដែលបានផ្សព្វផ្សាយក្រោយកិច្ចប្រជុំរវាងក្រសួងរៀបចំដែនដី និងវិស័យឯកជនបានបង្ហាញថា ចាប់តាំងពីការកកើតនូវរាជរដ្ឋាភិបាលអាណត្តិទី៧ កម្ពុជាបានដាក់ចេញនូវវិធានការមួយចំនួនរួចហើយនៅក្នុងវេទិការាជរដ្ឋាភិបាល-ផ្នែកឯកជនលើកទី១៩ ។
ក្នុងវេទិការាជរដ្ឋាភិបាលជាមួយផ្នែកឯកជនលើកទី១៩ ដើម្បីបង្កើនការជួយដល់វិស័យសំណង់ និងអចលនទ្រព្យ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានដាក់ចេញនូវវិធានការថ្មីបន្ថែមលើវិធនាការដែលមានស្រាប់ រួមមាន ៖
- បញ្ចូលសេវាសាធារណៈទៅក្នុងប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ក្រោយការប្រកាសដំណាក់កាលទី៣ ដូចជា សេវាផ្ដល់ការពិនិត្យព័ត៌មានសុរិយោដីតាមប្រព័ន្ធអេឡិចត្រូនិករបស់ក្រសួងរៀបចំដែនដី នគរូបនីយកម្ម និងសំណង់ ។
- លើកលែងពន្ធប្រថាប់ត្រាបន្ថែមទៀតលើការផ្ទេរកម្មសិទ្ធិ ឬសិទ្ធិកាន់កាប់លំនៅឋានគ្រប់ប្រភេទដែលមានលក្ខណៈជាបុរីក្រោមតម្លៃ៧ម៉ឺនដុល្លារ ហើយចំពោះលំនៅដ្ឋានដែលមានតម្លៃលើស ៧ម៉ឺនដុល្លារអាមេរិក គឺអនុញ្ញាតឱ្យដកទំហំទឹកប្រាក់៧ម៉ឺនដុល្លារអាមេរិកចេញពីមូលដ្ឋានគិតពន្ធប្រថាប់សម្រាប់ការទិញលំនៅឋានក្នុងគម្រោងអភិវឌ្ឍន៍លំនៅឋានជាបុរី ដែលមានអាជ្ញាបណ្ណ អាជីវកម្មអចលនវត្ថុ និងបានចុះបញ្ជីត្រឹមត្រូវរហូតដល់ដំណាច់ឆ្នាំ២០២៤ ។
- ការផ្ដល់សិទ្ធិដល់ជនបរទេសទិញលំនៅឋាន ៖ ជនបរទេសអាចទិញ និងកាន់កាប់អចលនទ្រព្យដោយមានសិទ្ធិស្ទើរតែដូចគ្នានឹងសិទ្ធិរបស់កម្មសិទ្ធិករដែរ តាមរយៈយន្តការចំនួន៣បន្ថែមទៀត រួមមានយន្តការតាមរយៈតំណាងជាជនជាតិខ្មែរ ,យន្តការតាមរយៈក្រុមហ៊ុនបរធនបាល និងយន្តការវិនិយោគតំបន់ទេសចរណ៍ពិសិដ្ឋ ។
ដោយឡែក វិធានការមួយទៀតដែលរាជរដ្ឋាភិបាលបានដាក់ចេញក្នុងវេទិការាជរដ្ឋាភិបាល និងផ្នែកឯកជនលើកទី១៩ ពាក់ព័ន្ធនឹងការបន្ធូរបន្ថយបន្ទុកអនុលោមភាពដែលអាចជំរុញការស្ដារវិស័យសំណង់ និងអចលនទ្រព្យ ក្នុងនោះអនុញ្ញាតឱ្យគ្រឹះស្ថានធនាគារ និងហិរញ្ញវត្ថុ បន្តអនុវត្តអនុបាតទ្រនាប់ដើមទុនខនស៊ើវេសិនត្រឹមកម្រិត១,២៥ភាគរយ រហូតដល់ថ្ងៃទី៣១ ខែធ្នូ ឆ្នាំ២០២៤ និងអនុញ្ញាតឱ្យគ្រឹះស្ថានធនាគារ និងហិរញ្ញវត្ថុ បន្តអនុវត្តអត្រាប្រាក់បម្រុងកាតព្វកិច្ចជារូបិយប័ណ្ណកម្រិត៧ភាគរយ រហូតដល់ថ្ងៃទី៣១ ខែធ្នូ ឆ្នាំ ២០២៤ និងលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុ រៀបចំឥណទានឡើងវិញចំពោះវិស័យអចលនទ្រព្យជូនអតិថិជនដែលជួបការលំបាកផ្នែកហិរញ្ញវត្ថុបណ្ដោះអាសន្នដោយត្រូវអនុវត្តម៉ឺងម៉ាត់តាមបទប្បញ្ញត្តិរបស់ធនាគារជាតិនៃកម្ពុជា ៕
Account
Security
Favourite Content