បរទេស៖ យោងទៅតាមប្រភពព័ត៌មានពី Weforum បានរាយការណ៍ថា រលកកំដៅកំពុងធ្វើឱ្យទីក្រុងមួយចំនួនក្លាយជាកន្លែងក្តៅបំផុត ដោយសារហេដ្ឋារចនាសម្ព័ន្ធនៅក្នុងទីក្រុងទាំងនោះ ក្នុងស្រូបទាញយកកំដៅ នៅមានកម្រិត។ តំបន់មានសីតុណ្ហភាពក្តៅទាំងនោះមានដូចជា អឺរ៉ុប ចិន ឥណ្ឌា ប៉ាគីស្ថាន សហរដ្ឋអាមេរិក និងអាហ្រ្វិកកំពុងប្រឈមនឹងកំដៅក្តៅខ្លាំង។

យោងតាមកម្មវិធីបរិស្ថានរបស់អង្គការសហប្រជាជាតិបានរាយការណ៍ថា ប្រមាណជិត ៩០ ទីក្រុងបានផ្តល់ការជូនដំណឹងអំពីកំដៅក្តៅខ្លាំងនៅរដូវក្តៅកាលពីឆ្នាំ ២០២២ កន្លងទៅនេះ ហើយទីក្រុងទាំងនោះក៏​កំពុងសិក្សា ដើម្បី​ទប់ទល់​នឹង​កម្ដៅ​ខ្លាំង ប៉ុន្តែក្នុងនោះមានទីក្រុងចំនួនប្រាំពីរ ដែលរៀបចំបានល្អជាងគេ។

Seville ជាទីក្រុងមួយរបស់ប្រទេសអេស្ប៉ាញបានឡើងកំដៅដល់ ៤០ អង្សាសេជាទៀងទាត់ នៅក្នុងរដូវក្តៅ ហើយត្រូវបានគេចាត់ទុកជាទីក្រុងដែលមានរលកកំដៅដំបូងគេនៅលើពិភពលោក។ ដើម្បីទប់ទល់នឹងការកើនឡើងកំដៅ សំយ៉ាបជាច្រើនត្រូវបានដំឡើងនៅទូទាំងទីក្រុងមួយនេះ។ លោក Antonio Muñoz អភិបាលក្រុង បាននិយាយថា ពួកគេហៅវាថាជាគោលនយោបាយម្លប់ និងជារឿងចាំបាច់មួយក្នុងចំណោមរឿងជាច្រើនដែលពួកគេត្រូវធ្វើ។ ការធ្វើសំយ៉ាបគឺបានផ្តល់ម្លប់ការពារពីកំដៅ និងមានភាពងាយស្រួលដល់ការប្រើប្រាស់ផ្លូវរបស់មនុស្ស។ ទីក្រុង Seville ក៏បានដាំដើមឈើចំនួនប្រហែល ៥ ០០០ ដើមក្នុងមួយៗឆ្នាំផងដែរ និងកំពុងដំឡើងប្រភពទឹកសាធារណៈបន្ថែមទៀត។

Greater Sydney ជាតំបន់គ្របដណ្តប់ទៅដោយផ្ទៃដី ១,៣ លានហិកតាជុំវិញទីក្រុងរដ្ឋធានីស៊ីដនីបស់ប្រទេសអូស្ត្រាលី មានគម្រោងបង្កើនដើមឈើ ដោយដាំដើមឈើចំនួន ៥​លានដើមបន្ថែមទៀត រហូតដល់ឆ្នាំ ២០៣០ ដោយសារដើមឈើជួយធ្វើឱ្យទីក្រុងត្រជាក់ មានម្លប់ និ ផ្តល់សំណើម។ ពួកវាក៏ស្រូបយក និងរក្សាទុកកាបូនឌីអុកស៊ីត ដោយធម្មជាតិ ដែលជួយទប់ទល់នឹងការប្រែប្រួលអាកាសធាតុផងដែរ។

ទីក្រុង Los Angeles របស់សហរដ្ឋអាមេរិកបានធ្វើការលាបពណ៌សលើហេរដ្ឋារចនាសម្ព័ន្ន ដើម្បីការពារពីរលកកំដៅ ដោយអាជ្ញាធរទីក្រុងនេះបានចាប់ផ្តើមធ្វើការពិសោធលើការលាបផ្លូវពណ៌សកាលពីឆ្នាំ ២០១៩ កន្លងទៅនេះ។ គោល​បំណង​ គឺ​ដើម្បី​ឱ្យ​កាំរស្មី​ព្រះអាទិត្យ​ត្រឡប់​ទៅ​ក្នុង​លំហ​វិញ និងដើម្បី​ធ្វើ​ឱ្យ​តំបន់​ជុំវិញ​នោះ​ត្រជាក់ ដែលរហូត​មក​ដល់​ពេល​នេះ ផ្លូវនៅ​ក្នុងសង្កាត់​ចំនួន​ដប់​ត្រូវ​បាន​គេ​លាប​ពណ៌ស។ មន្ត្រី​មួយរូបនៅក្នុង​ទីក្រុងនេះ បាន​និយាយ​ថា នៅ​ថ្ងៃ​ដែលក្តៅ ថ្នាំពណ៌​ស​ដែលលាបនោះធ្វើ​ឱ្យកម្តៅនៅលើ​ផ្ទៃ​ផ្លូវអន់ថយជាងមុន។

នៅក្នុងទីក្រុង Abu Dhabi របស់អារ៉ាប់រួម ការប្រែប្រួលអាកាសធាតុត្រូវបានព្យាករណ៍ថាអាចនឹងជំរុញសីតុណ្ហភាពជាមធ្យមលើសពី ៥០​ អង្សារសេនៅប៉ុន្មានសតវត្សខាងមុខទៀត ដោយនាំមកនូវលក្ខខណ្ឌរលកកំដៅខ្លាំង ដែលអាចធ្វើឱ្យទីក្រុងអាចពិបាករស់នៅបាន។ ទោះជាយ៉ាងណាក្តី ​ការ​រចនា​ប្រកបដោយ​ភាព​ច្នៃប្រឌិត​អាច​ជួយការពារ​អគារពី​កកំដៅបាន។ ជាក់ស្តែង អគារ Al Bahar នកម្ពស់ ២៦ ជាន់ត្រូវបានបំពាក់ដោយកញ្ចក់បត់បែនបាន ដែលគ្រប់គ្រងដោយកុំព្យូទ័រ។ មួយវិញទៀតនោះ វាអាចបិទ ឬ បើកបានអាស្រ័យលើទីតាំងកម្តៅរបស់ព្រះអាទិត្យដែលជះមក។
ទីក្រុងប៉ារីសរបស់ប្រទេសបារាំង បានបង្កើតកោះត្រជាក់ដើម្បីទប់ទល់នឹងរលកកំដៅ។ រលកកំដៅនៅទូទាំងប្រទេសបារាំងបានបំបែកកំណត់ត្រាសីតុណ្ហភាពកាលពីរដូវក្តៅមុន ដោយសីតុណ្ហភាពនៅទីក្រុងប៉ារីសបានឡើងដល់ ៣៦ អង្សាសេរកាលពីខែសីហាកន្លងទៅនេះ។ ក្រោយមក គេបានសិក្សាឃើញថា ទីក្រុងប៉ារីសអាចនឹងមានហានិភ័យនៃការរស់នៅ ដោយសារការឡើងកំដៅខ្ពស់បំផុតនៅតំបន់ចំនួន ៨៥៤ នៅអឺរ៉ុប។ ជាការឆ្លើយតបទៅនឹងបញ្ហានេះ ទីក្រុងប៉ារីសគ្រោងនឹងបង្កើតតំបន់ត្រជាក់ចំនួន ៨០០ នៅទូទាំងទីក្រុង ហើយកន្លែងទាំងនោះ​ត្រូវ​បាន​ចុះ​បញ្ជី​នៅ​លើ​កម្មវិធី​មួយ ហើយ​រួម​បញ្ចូល​ទាំង​សួន​ឧទ្យាន កន្លែង​បាញ់​ទឹក អគារ​សាធារណៈ​ អាង​ហែល​ទឹក និង​សារមន្ទីរជាដើម និងមានសីតុណ្ហភាពចន្លោះពី ២ ទៅ ៤ អង្សារសេ។

គួរបញ្ជាក់ថា តំបន់ត្រជាក់គឺជាកន្លែងបណ្តោះអាសន្ន ដែលអាចប្រើប្រាស់ឡើងវិញបាន និងត្រូវបានរចនាឡើងដើម្បីដោះស្រាយផលប៉ះពាល់នៃរលកកំដៅនៅកណ្តាលទីក្រុង។ វាផ្តល់នូវអារម្មណ៍ស្រស់ស្រាយតាមរយៈដំបូលដែលមានម្លប់ និងកន្លែងអង្គុយដែលត្រជាក់តាមរយៈការតភ្ជាប់ទៅបណ្តាញ។ វាគឺជាវិធីមួយក្នុងការសម្របទីក្រុងទៅនឹងការឡើងកំដៅផែនដី និងការពារមនុស្សនៅពេលមានកំដៅខ្លាំង។ មិនត្រឹមតែប៉ុណ្ណោះ ទីក្រុងប៉ារីសក៏មានគម្រោងដាំដើមឈើចំនួន ១៧០ ០០០ ដើមនៅឆ្នាំ ២០២៦ ខាងមុខនេះផងដែរ។

ទីក្រុង Rotterdam របស់ហូឡង់បាននបង្ហាញពីគំនិតផ្តួចផ្តើមនៃការដាំរុក្ខជាតិបៃតងនៅលើដំបូល ឬ​ Rotterdam Rooftop Walk ដែលអាចជួយឱ្យទីក្រុងរក្សាភាពត្រជាក់។ ទីក្រុងនេះសង្ឃឹមថានឹងមានដំបូលពណ៌បៃតងជាង ៩០០ ០០០ ម៉ែត្រការ៉េ ហើយតាមរយៈការស្តុកទឹក ដំបូលដែលដាំរុក្ខជាតិទាំងនេះក៏អាចជួយកាត់បន្ថយការជន់លិចផងដែរ។ យោងតាមទីភ្នាក់ងារការពារបរិស្ថានរបស់សហរដ្ឋអាមេរិក បានបង្ហាញថា ដំបូលពណ៌បៃតងអាចកាត់បន្ថយសីតុណ្ហភាពក្នុងទីក្រុងបានរហូតដល់ ១៥ អង្សារសេ។

ទីក្រុង Medellin នៅប្រទេសកូឡុំប៊ីបានបង្កើតច្រករបៀងពណ៌បៃតងសម្រាប់ប្រជាពលរដ្ឋ។ ក្នុងនាមជាទីក្រុងធំជាងគេទីពីររបស់ប្រទេស Medellin បានបង្កើតបណ្តាញផ្លូវចំនួន ៣០ នៅទូទាំងទីក្រុងដែលគេស្គាល់ថាជា “ច្រករបៀងពណ៌បៃតង’’ ដើម្បីទប់ទល់នឹងរលកកំដៅ។ លើសពីនេះផងដែរ ដើមឈើរាប់ពាន់ដើម ដើមត្នោត ឫស្សី និងរុក្ខជាតិត្រូពិចត្រូវបានដាំនៅជុំវិញចិញ្ចើមផ្លូវ សួនច្បារ និងផ្លូវចរាចរណ៍ដ៏មមាញឹក ដើម្បីផ្តល់ជាម្លប់សម្រាប់មនុស្ស៕