សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ជាទូទៅ នៅពេលដែលនិយាយពីទូសម្ងួត ឬរោងសម្ងួតផលិតផលកសិផលដើម្បីអាចរក្សាទុកបានយូរ ឬកែច្នៃទៅជាផលិតផលថ្មី ដូចជា ម្ទេសក្រៀម ស្វាយក្រៀម តែស្លឹកគ្រៃ ក៏ដូចជា សម្ងួតត្រី សាច់ផ្សេងៗ ធ្វើជាងៀត ភាគច្រើនប្រជាកសិករ ក៏ដូចជាអ្នកកែច្នៃតែងលើកឡើងពីផលលំបាកពាក់ព័ន្ធទៅនឹងតម្លៃថ្លៃលើសពីលទ្ធភាពរបស់ខ្លួន រួមជាមួយនឹងបច្ចេកទេសនៅពេលប្រើមានភាពសាំញាំច្រើន។ ប៉ុន្តែពេលនេះ ផលលំបាកដូចដែលបានលើកឡើងហាក់លែងជាបញ្ហាទៀតហើយ ខណៈដែលអ្នកជំនាញក្នុងស្រុក បានកែច្នៃ និងបង្កើតរោងសម្ងួតវៃឆ្លាត ប្រើថាមពលពន្លឺព្រះអាទិត្យ ឬបន្ទះសូឡា មានច្រើនខ្នាត ច្រើនទំហំ ជាមួយតម្លៃសមរម្យស្របតាមលទ្ធភាពអ្នកប្រើប្រាស់។
លោក ហុង សុត ដែលជាម្ចាស់អាជីវកម្មបង្កើតរោងសម្ងួតដែលមានឈ្មោះថា «កសិករឆ្លាត» (Kasekor Chhlat) បានប្រាប់ឱ្យដឹងថា បច្ចុប្បន្ន រោងសម្ងួត ឬទូសម្ងួតដែលសិប្បកម្មរបស់លោកបានកែច្នៃ និងផលិតឡើងនេះ មានច្រើនទំហំ ច្រើនខ្នាត ហើយកំពុងទទួលបានការគាំទ្រពីសំណាក់អតិថិជនច្រើនគួរសម ទាំងប្រភេទខ្នាតធំ និងខ្នាតតូច ដោយតម្លៃមានចាប់ពី ១៨០ដុល្លារ រហូតដល់ ១៧៥០០ដុល្លារ។ យ៉ាងណាក៏ដោយ លោកបានបញ្ជាក់ដែរថា មិនថាចំពោះទូរសម្ងួតទំហំណានោះទេ ចំពោះគុណភាពនៃការសម្ងួតគឺមានគុណភាពដូចគ្នា ខុសត្រង់ថា តើអ្នកប្រើប្រាស់គាត់ដាក់សម្ងួតតិច ឬច្រើន ដែលមិនលើសពីទំហំនៃសមត្ថភាពរបស់ទូរសម្ងួតតែប៉ុណ្ណោះ ។
ដោយឡែក និយាយពីសមត្ថភាព និងគុណភាពរបស់ទូសម្ងួត ឬរោងសម្ងួត «កសិករឆ្លាត» គឺអាចធ្វើការសម្ងួតបានស្ទើរគ្រប់ប្រភេទ មិនថាការសម្ងួតផ្លែម្ទេស ចេក ម្រេច ស្លឹកគ្រៃ ស្វាយ រមៀត រួមជាមួយកសិផលដទៃទៀត ជាពិសេស សូម្បីតែប្រភេទសាច់ក៏អាចសម្ងួតបាន ដូចជាត្រី សាច់គោ សាច់ក្របី ធ្វើជាសាច់ងៀត ក៏បានដែរ។
លោក ហុង សុត ជាម្ចាស់អាជីវកម្មរោងសម្ងួតកសិករឆ្លាត (Kasekor Chhlat) បានមានប្រសាសន៍ប្រាប់ AMS ឱ្យដឹងថា៖
« ទូសម្ងួតរបស់យើងមានចាប់ពី ២៥គីឡូក្រាម ឬទំហំសម្រាប់គ្រួសារ ដោយសម្ងួតក្នុងបរិមាណតិចតួច។ ចំពោះទូខ្នាតតូចលក្ខណៈគ្រួសារដែលខាងយើងលក់មានដូចជា ទំហំសម្ងួត ៦គីឡូក្រាម តម្លៃ១៨០ដុល្លារ ១០គីឡូក្រាម តម្លៃ៣០០ដុល្លារ និង ១៥គីឡូក្រាម តម្លៃ ៥០០ដុល្លារ ដែលវាអាចសម្ងួតកសិផលច្រើនមុខដូចជា ចេក ស្វាយ ម្រេច ផ្សិត ម្ទេស ម្ជូរព្រឹក តែ និងឪសថបុរាណ ក៏ដូចជាសាច់ងៀតផងដែរ រួមមាន ងៀតគោក្របី ត្រីងៀត សាច់ប្រឡាក់ជាដើម។ ក្រៅពីនេះ ក៏មានទូទំហំធំ ដោយមានតម្លៃចាប់ពី ១៧៥០០ដុល្លារ មានសមត្ថភាពសម្ងួតរហូតដល់ ៥តោនក្នុងការសម្ងួតម្ដង»។
ដោយឡែកពាក់ព័ន្ធទៅនឹងការប្រើប្រាស់ និងថែទាំវិញ ត្រូវបានលោកបញ្ជាក់ឱ្យដឹងថា វាមានភាពងាយស្រួលក្នុងការប្រើ ព្រោះនៅក្នុងទូសម្ងួតនីមួយៗ ទាំងទំហំធំ ទាំងទំហំតូច សុទ្ធតែបានរៀបចំធ្វើឡើងយ៉ាងមានរបៀប រៀបជាថ្នាក់ច្រើនជាន់ ដែលអាចផ្តល់កម្ដៅបានល្អ ហើយចំពោះការថែទាំវិញគឺគ្រាន់តែបោសជូតសម្អាតធម្មតា ខណៈដែលខាងក្រុហ៊ុនដែលជាអ្នកផ្គត់ផ្គង់ក៏មានការធានាជូនរហូតដល់១ឆ្នាំឯណោះ។
នៅក្នុងឱកាសនេះផងដែរ ម្ចាស់អាជីវកម្មខាងលើក៏បានលើកទឹកចិត្តដល់កសិករទូទៅ គួរតែមានរោងសម្ងួតប្រភេទណាមួយសម្រាប់គ្រួសារ ឬការកែច្នៃផលិតផលកសិកម្ម ដោយសារតែវាជាផលិតផលក្នុងស្រុក មានអត្ថប្រយោជន៍ច្រើន អាចជួយដល់បរិស្ថាន និងជួយកាត់បន្ថយការខាតបង់៕
Account
Security
Favourite Content