សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
យោងតាមប្រភពពី Weforum បានបង្ហាញថា មនុស្សរាប់ពាន់នាក់ក្នុងទីក្រុងកេប៊ិចនៃប្រទេសកាណាដា បានចាកចេញពីផ្ទះរបស់ពួកគេ ដោយសារតែភ្លើងឆេះព្រៃកើតមាបឡើងនាពេលថ្មីៗនេះ។ ឥទ្ធិពលមហន្តរាយនៃភ្លើងឆេះព្រៃក្នុងទីក្រុងកេបិចបានបង្កឱ្យមានផលប៉ះពាល់យ៉ាងធ្ងន់ធ្ងរដល់គម្របព្រៃឈើ ឈានដល់បញ្ហាបម្រែបម្រួលអាកាសាធាតុ និងសេដ្ឋកិច្ចជាតិទាំងមូល។
ភ្លើងឆេះព្រៃបានបង្កើតឲ្យមានខ្យល់អ័ព្ទ និងពុល ដែលមានឥទ្ធិពលរីករាលដាលដល់គុណភាពខ្យល់សម្រាប់អ្នករស់នៅក្នុងទីក្រុង ជាពិសេស ផ្សែងដែលចេញពីភ្លើងឆេះព្រៃបានហោះជាមួយនឹងខ្យល់បានរាប់រយគីឡូម៉េត្រ ហើយភាគល្អិតៗនៅក្នុងផ្សែងបានបង្កការគំរាមកំហែងដ៏ធំបំផុតដល់សុខភាពមនុស្ស ដែលអាចបណ្តាលឱ្យក្រហាយភ្នែក ជំងឺផ្លូវដង្ហើម រលាកទងសួត និងកាន់តែធ្ងន់ធ្ងរសម្រាប់អ្នកដែលមានជំងឺបេះដូង ឬសួត។ ជាឧទាហរណ៍ ទីភ្នាក់ងារការពារបរិស្ថានរបស់សហរដ្ឋអាមេរិកបានចាត់ចំណាត់ថ្នាក់សន្ទស្សន៍គុណភាពខ្យល់លើសពី ១៥០ គឺមិនល្អសម្រាប់សុខភាពមនុស្សនោះទេ។
មិនត្រឹមតែប៉ុណ្ណោះ ភ្លើងឆេះព្រៃអាចផលិតឧស្ម័នដែលរឹតតែបង្កជាហានិភ័យដល់បម្រែបម្រួលអកាសធាតុ ។ ដូច្នោះហើយ នៅពេលដែលភ្លើងឆេះព្រៃនៅប្រទេសកាណាដាបាននាំឱ្យមានការបំភាយកាបូនយ៉ាងច្រើនឈានដល់បំបែកកំណត់ត្រាជាប្រវត្តិសាស្ត្រ។ ការបាត់បង់ដើមឈើបានកាត់បន្ថយសមត្ថភាពរបស់ព្រៃឈើក្នុងការចាប់យក និងរក្សាទុកកាបូនអស់រយៈពេលជាច្រើនឆ្នាំ ព្រមទាំងអាចធ្វើឱ្យមានវិបត្តិអាកាសធាតុកាន់តែអាក្រក់ទៅៗ។
ដើមឈើបង្កើនការជ្រៀតចូលនៃទឹកចូលទៅក្រោមដី និងកាត់បន្ថយអត្រានៃសំណឹកដែលការពារដល់ដីល្បាប់ និងការបំពុលផ្សេងៗមិនឱ្យប៉ះពាល់ទៅដល់ទន្លេ។ លើសពីនេះ ព្រៃលិចទឹកអាចជួយធានាការផ្គត់ផ្គង់ទឹកជាប់លាប់ពេញមួយឆ្នាំ និងបញ្ចូលទឹកក្រោមដីឡើងវិញ។ ដើមឈើមានសមត្ថភាពបញ្ចេញចំហាយទឹក ដែលអាចគ្រប់គ្រងអាកាសធាតុ និងទឹកភ្លៀងបានផងដែរ ដោយដើម និងឫសរបស់ដើមឈើអាចជួយបន្ថយល្បឿនលំហូរទឹក។ ដូច្នោះហើយ ភ្លើងឆេះព្រៃអាចបណ្តាលឱ្យបាត់បង់រនាំងការពារព្រៃ និងប៉ះពាល់ដល់ដីផ្នែកខាងក្រោម។ វានាំឲ្យមានដើមឈើតិចជាងមុន ដែលពិបាករារាំងលំហូរទឹកពីព្យុះ ដីងាយនឹងសំណឹក និងការបំពុលកាន់តែច្រើននឹងហូរចូលទៅក្នុងប្រភពទឹក។ ផលប៉ះពាល់ទាំងនេះនឹងបណ្តាលឱ្យមានទឹកស្អាតប្រើប្រាស់តិចជាងសម្រាប់ទីក្រុង និងតំបន់ផ្សេងទៀតដែលពឹងផ្អែកលើព្រៃឈើ។
លើសពីនេះ ភ្លើងឆេះព្រៃអាចបង្កើនហានិភ័យនៃទឹកជំនន់ ហើយទីក្រុងងាយរងគ្រោះដោយសារទឹកជំនន់ជាងគេ ពីព្រោះពួកវាសំបូរផ្ទៃដែលមិនជ្រាបទឹក ដែលបណ្តាលឱ្យមានទឹកហូរកាន់តែច្រើននៅពេលមានភ្លៀងធ្លាក់។ ព្រៃឈើដែលនៅជិតទីក្រុងមានសមត្ថភាពរក្សាទុកទឹកហូរនោះ និងជារបាំងដែលការពារទីក្រុងពីទឹកជំនន់។ ដូច្នោះហើយភ្លើងឆេះព្រៃនឹងធ្វើឲ្យដើមឈើយដីមិនមានលទ្ធភាពស្តុកទឹកហូរ។ ទន្ទឹមនឹងនេះ ភ្លើងឆេះព្រៃអាចបណ្តាលឱ្យមានការខាតបង់សេដ្ឋកិច្ចផងដែរ។ ភ្លើងឆេះព្រៃធ្វើឲ្យខូចគុណភាពខ្យល់ ដែលបង្កជាផលប៉ះពាល់ដល់សុខភាព ហើយអាចនាំឱ្យមនុស្សចំណាយលើថ្លៃព្យាបាល។ នៅសហរដ្ឋអាមេរិក ផលប៉ះពាល់សុខភាពពីផ្សែងភ្លើងឆេះព្រៃមានតម្លៃ ១៦ ពាន់លានដុល្លារក្នុងមួយឆ្នាំ។ ភ្លើងឆេះព្រៃអាចកាត់បន្ថយសកម្មភាពសេដ្ឋកិច្ចផងដែរ ដោយកាលពីឆ្នាំ២០១៨ កន្លងទៅនេះ អ្នកទេសចរ ១១ ភាគរយបានលុបចោលការធ្វើដំណើររបស់ពួកគេទៅកាន់រដ្ឋកាលីហ្វ័រញ៉ា ដោយសារការព្រួយបារម្ភអំពីភ្លើងឆេះព្រៃ។ បញ្ហានេះបាននាំឱ្យរដ្ឋាភិបាលខាតបង់ប្រាក់ចំណូលចំនួន ២០ លានដុល្លារសម្រាប់វិស័យទេសចរណ៍ក្នុងរយៈពេលតែមួយខែប៉ុណ្ណោះ៕
Account
Security
Favourite Content