សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ អ្នកឧកញ៉ា ម៉ុង ឬទ្ធី ដែលជាទូទៅគេដឹងថាជាស្ដេចកសិកម្មមួយរូបនៅកម្ពុជា បានអំពាវនាវដល់អ្នកដែលមានលុយនៅកម្ពុជា ក៏ដូចជាវិនិយោគិនបរទេស បណ្ដាក់ទុនវិនិយោគលើការបង្កើតរោងចក្រផលិតចំណីសត្វ ដើម្បីជួយរក្សាលំនឹងទីផ្សារកសិផលរបស់ប្រជាកសិករខ្មែរ និងទទួលបានតម្លៃសមរម្យ។
ជាទូទៅ គេតែងតែសង្កេតឃើញថា នៅពេលរដូវប្រមូលផលម្ដងៗ ទីផ្សារកសិផលរបស់កសិករកម្ពុជា ដូចជា ស្រូវ ដំបូងមី ពោតជាដើម តែងតែចុះថ្លៃ ឬពិបាករកទីផ្សារ ដោយសារតែកសិផលមួយចំនួនត្រូវពឹងលើទីផ្សារបរទេស ហើយនៅពេលបរទេសចងក្រឡុកទីផ្សារ ក៏បានទម្លាក់ថ្លៃកសិផលទាំងនោះ ធ្វើឱ្យកសិករត្រូវលក់កសិផលទាំងខាតដើម ។
អ្នកឧកញ៉ា ម៉ុង ឬទ្ធី អគ្គនាយកក្រុមហ៊ុន ម៉ុង ឬទ្ធី គ្រុប និងត្រូវបានចាត់ទុកជាស្ដេចកសិកម្មមួយរូបនៅកម្ពុជាបានមានប្រសាសន៍ថា ដើម្បីអាចធ្វើឱ្យទីផ្សារកសិផលរបស់កសិករកម្ពុជាមានភាពល្អប្រសើរ និងរក្សាតម្លៃសមរម្យបាន សូមស្នើ និងអំពាវនាវឱ្យអ្នកដែលមានលុយនៅកម្ពុជា ក៏ដូចជាវិនិយោគិនបរទេសបណ្ដាក់ទុនវិនិយោគលើការបង្កើតរោងចក្រផលិតចំណីសត្វឱ្យបានកាន់តែច្រើន ដែលអាចទាញយកកសិផលមកធ្វើជាវត្ថុធាតុដើមក្នុងការផលិត និងបង្កើនតម្លៃថ្លៃដើម ។
អ្នកឧកញ៉ាបន្តថា ៖
«ក្រៅពីការរកទីផ្សារសម្រាប់កសិផលរបស់កសិករកម្ពុជាហើយនោះ ការវិនិយោគលើរោងចក្រផលិតចំណីសត្វនៅកម្ពុជាក៏បានផ្ដល់នូវផលិតផលចំណីសត្វ ដែលអាចជួយដល់អ្នកចិញ្ចឹមសត្វក្នុងប្រទេសកម្ពុជាទទួលបានចំណីសត្វមានតម្លៃទាប ធ្វើឱ្យការចិញ្ចឹមអស់ថ្លៃដើមតិច និងរកប្រាក់ចំណេញបានច្រើន ។ ជាក់ស្ដែង សព្វថ្ងៃនេះ រោងចក្រផលិតចំណិសត្វរបស់ខ្ញុំនៅខេត្តព្រះសីហនុបានជួយទិញកសិផលពីកសិករប្រមាណ៤០លានដុល្លារអាម៉េរិកក្នុងមួយឆ្នាំៗ ពោលគឺទិញយកមកស្តុកទុករហូតដល់ពេញឃ្លាំង ប៉ុន្តែដោយសារតែឃ្លាំងស្តុកមានកំណត់ មិនអាចទិញពីកសិករបានទាំងអស់ឡើយ ដូច្នេះហើយត្រូវពឹងលើការវិនិយោគពីអ្នកមានលុយដើម្បីវិនិយោគលើរោងចក្រផលិតផលចំណីសត្វនេះ»។
លោក លី ឡាវីល អ្នកគ្រប់គ្រងរោងចក្រផលិតចំណីសត្វ អឹម ភីក បានមានប្រសាសន៍ថា សមត្ថភាពផលិតរបស់រោងចក្រទាំង២ របស់ក្រុមហ៊ុន អឹម ភីក អាចផលិតបាន៥០តោនក្នុងមួយម៉ោង ហើយបើក្នុងមួយឆ្នាំអាចផលិតបានរហូតដល់ ៣៥ម៉ឺនតោន ដោយបានប្រមូលទិញកសិផលពីកសិករកម្ពុជាប្រមាណ ១២ ទៅ ១៣ម៉ឺនតោនក្នុងមួយឆ្នាំ រួមមាន ពោត ចុងអង្ករ ដោយចំណាយថវិកាប្រមាណ ៤០លានដុល្លារអាម៉េរិក ។
លោកបន្តថា ៖
«សម្រាប់ទីផ្សារកសិផលដែលក្រុមហ៊ុនបានទិញពីកសិកររៀងរាល់ឆ្នាំ គឺពឹងអាស្រ័យលើទីផ្សារអន្តរជាតិ មិនទិញក្នុងតម្លៃខ្ពស់ពេក ហើយក៏មិនថោកពេកដែរ ។ ឧទាហរណ៍ថា បើសិនជាទីផ្សារពោតអន្តរជាតិឡើងថ្លៃ ក្រុមហ៊ុនក៏ប្រមូលទិញពីកសិករក្នុងតម្លៃខ្ពស់ ហើយបើសិនជាទីផ្សារអន្តរជាតិចុះថ្លៃ យើងក៏ទិញទៅតាមតម្លៃទីផ្សារនោះ តែមិនធ្វើឱ្យកសិករខាតបង់ឡើយ ។ បើសិនជាក្រុមហ៊ុនគិតតែពីទិញក្នុងតម្លៃទាប នោះកសិករនឹងលែងដាំដុះ ហើយរោងចក្រក៏លែងមានវត្ថុធាតុដើមសម្រាប់ផលិតដែរ»។
គួរបញ្ជាក់ថា បច្ចុប្បន្ននេះ នៅក្នុងប្រទេសមានរោងចក្រផលិតចំណីសត្វធំៗមួយចំនួនកំពុងដំណើរការផលិតដើម្បីផ្គត់ផ្គង់លើទីផ្សារ ដោយកាត់បន្ថយការនាំចូលបានមួយចំនួនធំ ក្នុងនោះ មានរោងចក្រ ស៊ី ភី, រោងចក្រចំនួន២ របស់ក្រុមហ៊ុន អឹម ភីក, រោងចក្រ ដឹ ហឺស្ស, រោងចក្រ បេតាហ្ក្រូ និងរោងចក្រផលិតចំណីរបស់ក្រុមហ៊ុន ហ្គ្រីនហ្វីត ជាដើម ដោយក្រុមហ៊ុន និងរោងចក្រទាំងនេះបានចូលរួមជួយទិញកសិផលពីកសិករបានមួយចំនួនធំក្នុងមួយឆ្នាំៗ ៕
Account
Security
Favourite Content